Ekkewe Foffor Kot A Oput

1. Noun Kot kewe chon angang ra tongei minne mi pwung. Nge epwe pwal lamot ar repwe oput minne mi ngau. (Kol Fel 97:10) A wewe ngeni ach sipwe tumunukich seni ewe sokkun foffor Kot a oput. Ikkefa ekkoch ekkena fofforingau?

2. Lisowu mwaal: Lisowufengen mwen apupulu, an emon lisowu ngeni emon lukun puluwan we, lisowu ngeni emon man, an emon lisowu ngeni pwisin aramasan, me tipisin Sotom, ir meinisin ekkoch fofforun tipis ngeni Kot. (Lifitikos 18:6; Rom 1:26, 27; 1 Korint 6:9, 10) Ika ruuemon ra nonnomfengen nge rese wesewesen pupulufengen, repwe ita kaimufesen are pupulu me ren pwungun alluk.—Ipru 13:4.

Kot a oput unupuch, sola, ppet won moni, me fofforun akkachofesa

3. Kapas chofona, Ppet won moni, Sola: Jiowa Kot ese tongeni kapas chofona. (Taitos 1:2) Ir kewe mi mochen kuna ewe chenin Kot repwe ti seniir kapas chofona. (An Salomon Fos 6:16-19; Kolose 3:9, 10) Iteiten sokkun ppet won moni meinisin ra popu seni tipemmong. Iwe, ekkewe chon Kraist meinisin resap fori ekkewe sokkun ppet won moni meinisin, awewe chok pinko, ppet won oris are an emon epwe mooni tiket fan iten an epwe tufichin winneni och pisek are moni. (Efisus 5:3-5) Iwe, ekkewe chon Kraist rese sola. Resap mooni ekkewe pisek ika ra silei pwe emon a sola seni pwal emon, resap pwal angeimwaalli pisekin emon ika esor ar mumuta.—Ekistos 20:15; Efisus 4:28.

4. Songokai, Fofforun Akkachofesa: Ika emon esap tongeni nemeni an song, epwe tongeni emmwen ngeni fofforun akkachofesa. (Keneses 4:5-8) Esap tufich emon mi mwanesol epwe emon chiechien Kot. (Kol Fel 11:5; An Salomon Fos 22:24, 25) A mwaal ach sipwe liwini ingau ngeni ir kewe mi fofforingau ngenikich.—An Salomon Fos 24:29; Rom 12:17-21.

5. Forior me Angangen Roong: Ekkoch aramas ra kutta alillis seni ekkewe ngun pwe repwe apochokkula ir kewe mi semmwen. Pwal ekkoch ra pout ngeni ekkewe chon oput ir pwe repwe semmwen are pwal mwo nge malo. Manamanen ekkeei foffor a popu seni Setan. Ina minne a lamot pwe ekkewe chon Kraist resap fiti ekkeei sokkun foffor meinisin. (Tuteronomi 18:9-13) Ach sipwe fitipach ngeni Jiowa epwe tumunukich seni an aramas forior ngenikich.—An Salomon Fos 18:10.

6. An Aramas Unupuch: Ese ngau an emon unumi ekis wain, pio, are pwal och sokkun sakau. (Kol Fel 104:15; 1 Timoti 5:23) Nge a mwaal mwen mesen Kot an emon unummong me unupuch. (1 Korint 5:11-13; 1 Timoti 3:8) Om kopwe unummong sakau epwe tongeni atai pochokkulen inisum me aosukosuka om famili. Epwe pwal tongeni amwokutuk om kopwe muttir turutiu fan ekkewe ekkoch sossot.—An Salomon Fos 23:20, 21, 29-35.

7. Ekkewe aramas mi foffori ekkewe mettoch Kot a era mi ngau resap “alemwiri ewe muun Kot.” (Kalesia 5:19-21) Ika ka wesewesen tongei Kot me mochen apwapwai i, kopwe tongeni su seni ekkeei sokkun foffor. (1 Jon 5:3) Achocho ngeni om kopwe oput minne Kot a apasa pwe mi ngau. (Rom 12:9) Chiechi ngeni aramas mi atipeeufengenni manauer ngeni Kot. (An Salomon Fos 13:20) Eli ekkewe chon Kraist mi asimau repwe eu minen alillis. (Jemes 5:14) Lap seni meinisin, kutta an Kot alillis ren om iotek.—Filipai 4:6, 7, 13.

Copyright © 2011 Watch Tower Bible and Tract Society of Pennsylvania. All rights reserved.