Иегъовӕйы Ӕвдисӕнтӕ Чи сты? Цӕуыл ӕууӕндынц?

Цӕуыл ӕууӕндынц?

ИЕГЪОВӔЙЫ ӔВДИСӔНТЫ уырны, арв ӕмӕ зӕхх Скӕнӕг Стыр Хуыцау Иегъовӕ кӕй у, уый. Нӕ алфамбылай дунейы цы диссӕгтӕ уынӕм, ӕрмӕст уыдонӕй дӕр бӕрӕг у, стыр зонд ӕмӕ хъомыс кӕмӕ ис, ахӕм Сфӕлдисӕг кӕй скодта ӕппӕтдӕр. Адӕймаг цавӕр миниуджыты хицау у, уый йӕ хъуыддӕгтӕй бӕрӕг куыд вӕййы, афтӕ Иегъовӕ цавӕр Хуыцау у, уый дӕр фенӕн ис, цы сарӕзта, уымӕ кӕсгӕйӕ. Библийы дзырдӕуы: «Уымӕн ӕмӕ Йӕ ӕнӕуынгӕ [«миниуджытӕ», НД], Йӕ мыггагмӕйы тых ӕмӕ Хуыцаудзинад, дунейы сфӕлдисынӕй нырмӕ цы скодта, уыдонмӕ кӕсгӕйӕ зынынц». Ӕцӕгдӕр, ӕнӕдзургӕйӕ «ӕрвтӕ хъусын кӕнынц Хуыцауы кад» (Ромӕгтӕм 1:20; Псалом 18:2—5).

ЗӔХХ... сфӕлдыста йӕ Иегъовӕ... базылдысты йӕм адӕм... цӕрдзысты йыл ӕнустӕм.

Адӕймаг исты куы фӕаразы, ӕлыг мигӕнӕн уа, телевизор уа ӕви компьютер, алцыдӕр аразы цыдӕр нысанӕн, цӕйдӕр тыххӕй. Ӕмӕ уӕд зӕхх, зӕххыл цы зайӕгойтӕ ӕмӕ цӕрӕгойтӕ ис, уыдон та бирӕ вазыгджындӕр ӕмӕ диссагдӕр арӕзт сты! Адӕймаджы буар триллион чырӕгӕй конд куыд у, уый нӕ зонд никуыд ахсы: хъуыды цы магъзы руаджы кӕнӕм, уый йӕхӕдӕг дӕр диссаг у! Ӕмӕ кӕд, адӕймаг цы гыццыл цыдӕртӕ саразы, уыдонӕй алцӕмӕндӕр йӕхи нысан ис, уӕд, кӕй зӕгъын ӕй хъӕуы, Иегъовӕ Хуыцау цы диссаг цыдӕртӕ скодта, уыдон дӕр ӕнӕхъуаджы конд не сты! Уымӕн бӕлвырдгӕнӕн сты Ӕмбисӕндты 16:4-ӕм стихы ныхӕстӕ: «Иегъовӕ цыдӕриддӕр аразы, алцӕмӕндӕр дзы ис йӕхи нысан».

Иегъовӕ фыццаг лӕг ӕмӕ усӕн цы загъта, уымӕй бӕрӕг у, зӕхх бӕлвырд нысанӕн кӕй сарӕзта: «Зӕнӕг рауадзут, сбирӕ ут ӕмӕ зӕхх байдзаг кӕнут... уӕ бар цӕуӕнт денджызы кӕсӕгтыл, уӕларвон мӕргътыл ӕмӕ зӕххыл хилӕг алкӕцы цӕрӕгойыл» (Уӕвынад 1:28). Фӕлӕ фыццаг дыууӕ адӕймаджы Хуыцауы коммӕ нӕ бакастысты, ӕмӕ уымӕ гӕсгӕ сӕ бон не сси зӕхх байдзаг кӕнын, зӕххӕн йӕхимӕ дӕр, стӕй зайӕгойтӕ ӕмӕ цӕрӕгойтӕм дӕр чи зылдаид, ахӕм рӕстаг бинонтӕй. Фӕлӕ хъуыддаг афтӕ кӕй рауад, уый ууыл дзурӕг нӕу, ӕмӕ Иегъовӕйы фӕндон нӕ сӕххӕст уыдзӕн. Уыцы хабарӕй миназтӕ фӕстӕдӕр фыст ӕрцыди ахӕм ныхӕстӕ: «Хуыцау, зӕххы Скӕнӕг... дзӕгъӕлы йӕ не сфӕлдыста». Хуыцау «ӕй цӕрынӕн сарӕзта». Зӕхх никуы фесӕфдзӕн, уый «лӕудзӕн ӕнустӕм» (Исай 45:18; Екклесиаст 1:4). Иегъовӕ цы сфӕнд кодта, уый ӕнӕмӕнг сӕххӕст уыдзӕн, уымӕн ӕмӕ нын йӕхӕдӕг дзуры: «Мӕ фӕнд сӕххӕст уыдзӕн, ӕмӕ мӕ цыдӕриддӕр фӕнды, уый сараздзынӕн» (Исай 46:10).

Уымӕ гӕсгӕ Иегъовӕйы Ӕвдисӕнты уырны, зӕхх кӕй никуы фесӕфдзӕн, фӕлӕ абоны адӕмӕй дӕр ӕмӕ, чи амарди, уыдонӕй дӕр Иегъовӕйы фӕндонмӕ гӕсгӕ зӕхх срӕсугъд кӕнын ӕмӕ йӕ адӕмӕй байдзаг кӕныныл чи архайа, уыдон ыл ӕнустӕм кӕй цӕрдзысты. Адӕм иууылдӕр Адам ӕмӕ Евӕйӕ сӕ туджы рахастой ӕнӕххӕстдзинад, ӕмӕ уымӕ гӕсгӕ сты тӕригъӕдджын (Ромӕгтӕм 5:12). Библи нын афтӕ дзуры: «Тӕригъӕды фиддон — мӕлӕт». «Удӕгӕстӕ зонынц, кӕй амӕлдзысты, мӕрдтӕ та ӕппындӕр ницы зонынц». «Тӕригъӕд ракӕнӕг уд — амӕлдзӕн» (Ромӕгтӕм 6:23; Екклесиаст 9:5; Иезекил 18:4, 20). Фӕлӕ уый гӕнӕн куыд ис, ӕмӕ адӕм цардмӕ раздӕхой ӕмӕ зӕххыл цы хорздзинӕдтӕ ис, уыдонӕй ӕфсӕст уой? Уымӕн гӕнӕн ис ӕрмӕстдӕр Йесо Чырыстийы ӕлхӕнӕг нывонды руаджы. Йесо йӕхӕдӕг загъта: «Ӕз Дӕн райгасдзинад ӕмӕ цард; мӕныл ӕууӕндӕг, куы амӕла, уӕддӕр райгас уыдзӕн». «Ӕппӕт ингӕнты уӕвджытӕ фехъусдзысты Хуыцауы Фырты хъӕлӕс, ӕмӕ рацӕудзысты» (Иоанны 5:28, 29; 11:25; Матфейы 20:28).

Куыд ӕрцӕудзысты ӕппӕт уыдӕттӕ? Ацы фарст адӕймаг бамбары, Йесо зӕххыл цы «Паддзахады Евангели» райдыдта хъусын кӕнын, уыимӕ куы базонгӕ вӕййы, уӕд (Матфейы 4:17—23). Абон Иегъовӕйы Ӕвдисӕнтӕ дӕр уыцы цины хабар хъусын кӕнынц ӕгас дунейыл.

ИЕГЪОВӔЙЫ ӔВДИСӔНТӔ ЦӔУЫЛ ӔУУӔНДЫНЦ

Цӕуыл ӕууӕндынц	Фыстад цы дзуры
Библи у Хуыцауы Ныхас ӕмӕ у ӕцӕгад	2 Тим. 3:16, 17; 2 Пет. 1:20, 21; Иоан. 17:17
Адӕмы ӕрымысгӕ ӕгъдӕуттӕй Библийыл фылдӕр ис ӕууӕндӕн	Матф. 15:3; Кол. 2:8
Хуыцауы ном у Иегъовӕ	Пс. 82:19, МГТ; Ис. 26:4; 42:8; Рац. 6:3
Чырысти у Хуыцауы Фырт ӕмӕ у Уымӕй дӕлдӕр	Матф. 3:17; Иоан. 8:42; 14:28; 20:17; 1 Кор. 11:3; 15:28
Хуыцау иууыл фыццаг сфӕлдыста Чырыстийы	Кол. 1:15; Рар. 3:14
Чырысти дзуарыл нӕ амард, фӕлӕ цӕджындзыл	Гал. 3:13; Ап. к. 5:30
Чырысти йӕ зӕххон цард радта коммӕгӕс адӕмы балхӕнынӕн	Матф. 20:28; 1 Пет. 2:24, НД; 1 Тим. 2:5, 6
Чырысти йӕ цард иу хатт радта нывондӕн, ӕмӕ уый фаг уыди	Ром. 6:10; Дзут. 9:25—28
Чырысти райгас ӕнӕуынгӕ уӕларвон гоймагӕй	1 Пет. 3:18; Ром. 6:9; Рар. 1:17, 18
Чырысти не ’хсӕн ис ӕнӕуынгӕ хуызы	Иоан. 14:19; Матф. 24:3, НД; 2 Кор. 5:16; Пс. 109:1, 2
Ныртӕккӕ мах цӕрӕм «фӕстаг бонты»	Матф. 24:3—14; 2 Тим. 3:1—5; Лук. 17:26—30
Чырысти цы Паддзахады сӕргъы ис, уый зӕххыл хицауиуӕг кӕндзӕн рӕстдзинад ӕмӕ сабырдзинады	Ис. 9:6, 7; 11:1—5; Дан. 7:13, 14; Матф. 6:10
Паддзахад зӕхмӕ ӕрхӕсдзӕн ӕххӕст царды уавӕртӕ	Пс. 71:1—4; Рар. 7:9, 10, 13—17; 21:3, 4
Зӕхх никуы фесӕфдзӕн ӕмӕ ӕдзӕрӕг дӕр никуы уыдзӕн	Екк. 1:4; Ис. 45:18; Пс. 77:69
Хуыцау абоны цардӕвӕрд фесафдзӕн Армагеддоны хӕсты	Рар. 16:14, 16; Соф. 3:8; Дан. 2:44; Ис. 34:2; 55:10, 11
Ӕвзӕргӕнджытӕ ӕнустӕм сӕфт ӕрцӕудзысты	Матф. 25:41—46; 2 Фес. 1:6—9
Хуыцау рӕстгӕнӕгыл кӕй банымайа, уыдон цӕрдзысты ӕнустӕм	Иоан. 3:16; 10:27, 28; 17:3; Маркы 10:29, 30
Ӕрмӕстдӕр иу фӕндаг кӕны цардмӕ	Матф. 7:13, 14; Еф. 4:4, 5
Адӕм мӕлынц Адамы тӕригъӕды аххосӕй	Ром. 5:12; 6:23
Адӕймаг куы амӕлы, уӕд амӕлы йӕ уд дӕр	Иез. 18:4; Екк. 9:10; Пс. 6:6; 145:4; Иоан. 11:11—14
Зындон у ӕппӕт адӕмы иумӕйаг ингӕн	Иов 14:13, Рар. 20:13, 14
Мӕрдтӕн ис райгасы ныфс	1 Кор. 15:20—22; Иоан. 5:28, 29; 11:25, 26
Адамы мӕлӕт нал уыдзӕн	1 Кор. 15:26, 54; Рар. 21:4; Ис. 25:8
Уӕларвмӕ ацӕудзӕн ӕрмӕстдӕр «гыццыл дзуг», 144 000 адӕймаджы, ӕмӕ уыдон паддзахиуӕг кӕндзысты Чырыстиимӕ	Лук. 12:32; Рар. 14:1, 3; 1 Кор. 15:40—53; Рар. 5:9, 10
144 000 райгуырдысты ногӕй Хуыцауы монон фырттӕй	1 Пет. 1:23; Иоан. 3:3; Рар. 7:3, 4
Ног цӕдис арӕзт у монон Израилимӕ	Иер. 31:31; Дзут. 8:10—13
Чырыстон ӕмбырд арӕзт у Чырыстийӕн йӕхиуыл	Еф. 2:20; Ис. 28:16; Матф. 21:42
Кувын хъӕуы ӕрмӕстдӕр Иегъовӕмӕ Чырыстийы уылты	Иоан. 14:6, 13, 14, НФ; 1 Тим. 2:5
Хуыцаумӕ кувынӕн дзуӕртты нывтӕй пайда кӕнын нӕ хъӕуы	Рац. 20:4, 5; Лев. 26:1; 1 Кор. 10:14; Пс. 113:12—16
Спиритизмимӕ нын хъуамӕ мацы иудзинад уа	Дык. з. 18:10—12; Гал. 5:19—21; Лев. 19:31
Ацы дунейы ӕнӕуынгӕ хицау у Сайтан	1 Иоан. 5:19; 2 Кор. 4:4; Иоан. 12:31
Чырыстон хъуамӕ ӕндӕр дины хъуыддӕгты ма архайа	2 Кор. 6:14—17; 11:13—15; Гал. 5:9; Дык. з. 7:1—5
Чырыстон хъуамӕ дунеимӕ лымӕн ма уа	Иак. 4:4; 1 Иоан. 2:15; Иоан. 15:19; 17:16
Адӕмы закъӕттӕ Хуыцауы закъӕтты ныхмӕ куы нӕ уой, уӕд сӕ хъӕуы ӕххӕст кӕнын	Матф. 22:20, 21; 1 Пет. 2:12; 4:15
Хуыцауы закъон нӕ дӕтты буары туг ауадзыны бар, нӕдӕр дзыхы, нӕдӕр тугдадзинты уылты	Уӕв. 9:3, 4; Лев. 17:14; Ап. к. 15:28, 29
Чырыстон хъуамӕ цӕра Библийы закъӕттӕм гӕсгӕ	1 Кор. 6:9, 10; Дзут. 13:4; 1 Тим. 3:2; Ӕмб. 5:1—23
Сабатбон кӕнын хъуыди ӕрмӕстдӕр израилӕгты ӕмӕ Моисейы Закъонимӕ иумӕ ӕрцыд йӕ кӕрон	Дык. з. 5:15; Рац. 31:13; Ром. 10:4; Гал. 4:9, 10; Кол. 2:16, 17
Сауджынтӕй нысан кӕнын ӕмӕ сӕ сӕрмагонд нӕмттӕй хонын раст нӕу	Матф. 23:8—12; 20:25—27; Иов 32:21, 22
Адӕймаг йӕхигъӕдӕй нӕ фӕзынд, Хуыцау ӕй сфӕлдыста	Ис. 45:12; Уӕв. 1:27; Матф. 19:4
Хуыцауӕн хъуамӕ лӕггад кӕнӕм, Чырысти нын цы дӕнцӕг ныууагъта, уымӕ гӕсгӕ	1 Пет. 2:21; Дзут. 10:7; Иоан. 4:34; 6:38
Аргъауын хъӕуы, адӕймаджы доны фӕныгъуылынгӕнгӕйӕ; уый ӕвдисы, адӕймаг йӕхи Хуыцауӕн кӕй снывонд кодта	Маркы 1:9, 10; Иоан. 3:23; Ап. к. 19:4, 5
Чырыстӕттӕ ӕхсызгонӕй хъусын кӕнынц Библийы ӕцӕгад	Ром. 10:10; Дзут. 13:15; Ис. 43:10—12

Мыхуыры рацыд 2002
Copyright © 2006 Watch Tower Bible and Tract Society of Pennsylvania. All rights reserved.