Библи бӕлвырдӕй цы дзуры?

ДӔ КЪУХМӔ цыфӕнды газет ма райсай,– терроризм, хӕст ӕмӕ фыдракӕндты йеддӕмӕ дзы ӕндӕр ницӕй кой ис. Уӕдӕ адӕймаг йӕхӕдӕг дӕр ӕнӕмӕт, ӕнӕсагъӕс нӕу. Цӕвиттон, ӕнцон нӕу низимӕ тох кӕнын. Ӕмӕ нын мӕлӕт нӕ хиуӕттӕй искӕй куы байсы, уӕд уый та куыд зын вӕййы. Ӕвӕццӕгӕн, ды дӕр, кӕддӕр рӕстуд адӕймаг Иов куыд дзырдта, афтӕ фӕзӕгъыс, «мастӕй мӕ хъуырмӕ сдӕн», зӕгъгӕ (Иов 10:15).

Ахъуыды ма кӕн ацы фарстытыл:

• Хуыцауы уый фӕндыд? Уымӕн сфӕлдыста мӕн дӕр ӕмӕ иннӕ адӕмы дӕр?
• Мӕ зындзинӕдты мын чи баххуыс кӕндзӕн?
• Искуы зӕххыл сабыр цард уыдзӕн?

Ацы фарстытӕй алкӕцыйӕн дӕр Библи дӕтты зӕрдӕзӕгъгӕ дзуапп.

БИБЛИ ЗӔГЪЫ, ХУЫЦАУ ЗӔХХЫЛ КӔЙ СКӔНДЗӔН ДИССАДЖЫ ЦАРД

«Хуыцау сын сӕ цӕстытӕй ныссӕрфдзӕн сӕ цӕссыг; нал уыдзӕн нӕдӕр мӕлӕт, нӕдӕр хъыгтӕ, нӕдӕр хъарӕг, нӕдӕр рыст» (Раргомад 21:4, НТ).

«Къуылых гӕппытӕ кӕндзӕн сагау» (Исай 35:6).

«Куырмыты цӕстытӕ байгом уыдзысты» (Исай 35:5).

«Ингӕнты чи ис, уыдон сеппӕт дӕр... райгас уыдзысты» (Иоанны 5:28, 29, НТ).

«Иу адӕймаг дӕр нал зӕгъдзӕн: „Ӕз рынчын дӕн“» (Исай 33:24).

«Уыдзӕн хъӕздыг хорӕрзад зӕххыл, хӕхты сӕр» (Псалом 71:16).

БИБЛИ ЦЫ ДЗУРЫ, УЫЙ ДЫН АХЪАЗ ФӔУӔД

Чи зоны дӕм афтӕ кӕсы, ӕмӕ адӕттӕ аргъӕуттӕ сты. Фӕлӕ уый афтӕ нӕу. Хуыцау йӕхӕдӕг загъта, зӕххыл ахӕм диссаджы цард кӕй скӕндзӕн. Куыд, уый та нын ӕмбарын кӕны Библийы.

Фӕлӕ нын Библи ӕрмӕст фидӕны кой нӕ кӕны. Ӕмбарын ма нын кӕны, цы хъӕуы, цӕмӕй нӕ цардӕй ныртӕккӕ дӕр нӕ зӕрдӕ райа. Дӕ сагъӕс цӕуыл у, цӕмӕй тыхсыс, уыдӕттыл ма ахъуыды кӕн. Чи зоны, ӕхцайӕ цух ӕййафыс, кӕнӕ дын хӕдзары цыдӕр мӕстытӕ ис, йе та дӕ низ тыхсын кӕны, кӕнӕ дӕ хиуӕттӕй чидӕр амард. Библи дын уыдзӕн стыр ӕххуыс уыцы зындзинӕдтӕн фидар фӕлӕууынӕн. Стӕй дын ӕрхӕсдзӕн удӕнцой, уымӕн ӕмӕ дзы дзуапп ссардзынӕ ахӕм фарстытӕн:

• Цӕмӕн удхар кӕнӕм?
• Царды сагъӕстӕн куыд быхсӕм?
• Цӕмӕй нӕ бинонтӕ амондджын уой, уый тыххӕй цы кӕнын хъӕуы?
• Адӕймаг куы амӕлы, уӕд цы фӕвӕййы?
• Нӕ хиуӕттӕй абон немӕ чи нал ис, уыдоны ма искуы фендзыстӕм?
• Куыд ӕй ис базонӕн, ӕмӕ Хуыцау фидӕны тыххӕй цы загъта, уый ӕцӕгдӕр кӕй сӕххӕст кӕндзӕн?

Ацы чиныг дӕ къухы кӕй ис, кӕй йӕ кӕсыс, уый ууыл дзурӕг у, ӕмӕ дӕ зӕрдиагӕй фӕнды, Библи цы дзуры, уый базонын. Ӕмӕ ацы чиныг дӕр уый тыххӕй у. Ӕркӕс ма, алы фарсыл дӕр дзы абзацтӕм бынӕй ис фарстытӕ. Бирӕтӕ уарзынц фарстытӕ ӕмӕ дзуаппыты руаджы Иегъовӕйы Ӕвдисӕнтимӕ Библийыл ныхас кӕнын. Ныфс нӕ ис, ӕмӕ уый дӕ зӕрдӕмӕ дӕр кӕй фӕцӕудзӕн. Уӕдӕ дын Хуыцау ахӕм арфӕ ракӕнӕд, Библи бӕлвырдӕй цы дзуры, уый куыд базонай ӕмӕ дӕ фарстытӕн зӕрдӕзӕгъгӕ дзуаппытӕ куыд ссарай!

БАЗОН ДӔ БИБЛИ

Библийы ис 66 гыццыл чиныджы, иутӕ дзы сты фыстӕджытӕ. Цӕмӕй ӕнцондӕр кӕсӕн уа, уый тыххӕй дзы алы чиныг дӕр ныддихтӕ кодтой хицӕн сӕртыл, сӕртӕ та — хицӕн стихтыл. Ацы чиныджы цы стихтӕ ис, уыдон ссарӕн ис афтӕ: Библийы чиныджы номы фӕстӕ фыццаг нымӕц амоны, кӕцы сӕрӕй у, уый, дыккаг нымӕц та — кӕцы стих у. Зӕгъӕм, фыст дзы ис — 2 Тимофеймӕ 3:16. Уый у Тимофеймӕ ӕрвыст фыстӕджытӕй дыккаг, 3-аг сӕр, 16-ӕм стих.

Ацы чиныджы цы стихтӕ ис, уыдон-иу Библийӕн йӕхимидӕг куы ссарай, уӕд ӕй тагъд бахъуыды кӕндзынӕ, Библийы чингуытӕй чи кӕм ис, уый. Стӕй ма хорз уаид, Библи алы бон дӕр куы кӕсис. Бон дзы ӕртӕ-фондз сӕры куы кӕсай, уӕд дын иу азмӕ каст фӕуыдзӕн.