Ñokänti Ngöbö kukwei metre ye raba kwen mäi

1. Jesús käkwe Ngöbö kukwei kristiano metre kwatibe ükaninte. Ye medenbätä kä nengwane nitre Ngöbö Jehová mikaka metre täte ye abokän kukwei kwatibe. (Juan 4:23, 24; Efesios 4:4, 5, Kukwe Kuin Ngöbökwe.) Biblia kätä niere ji krächi kä näin ni ngwena ja nire kokwäre ye abokänbiti ni braibe tä näin. (Mateo 7:13, 14.)

2. Biblia käkwe niebare nitre nänkä Jesube ye krütai bitikäre bätärekä jatäri kukwe ngwarbe ñaka kwin, aune kukwe ñaka kristiano drie jatai nitre nänkä metre kukwebätä ye ngätäite. Nitre ruäre kä rabai nitre kukwe mike täte ye denkä jakri, rabaitre denkä mento ne kwe ñaka rabadrera näin Kristo jiebiti. (Mateo 7:15, 21-23; Hechos 20:29, 30.) Ye medenbätä kukwe kwati bätäkä ngwarbe tuin nie abokän kätä ja bientre kristiano. ¿Ñokänti nitre kristiano erametre ye raba nüke gare nie?

3. Nitre kristiano erametre ye nüke gare bäri kwin ja tare erametre kwärikwäri kwetre yebätä. (Juan 13:34, 35, Kukwe Kuin Ngöbökwe.) Ni mada kwata bä jene yebätä nikwe bikadre bäri kribätä, ye abokän drie ñaka ietre. Ni kä madabiti yekrä ni brukwä rabadre, ye drie ñaka ietre arato. (Hechos 10:34, 35.) Ye medenbätä rü nuainta yekri ñaka nekete jire chi. Nitre kristiano erametre ye ie ja tuin kwärikwäri ni ja etebare bätä ni ja ngwaire ye kwrere. (1 Juan 4:20, 21.)

Nitre kristiano erametre ye kwe ja tare kwärikwäri, tätre Biblia ye mike ütiäte jai aune tätre Gobran Ngöbökwe ye kukwei driere

4. Nitre Ngöbö kukwei metre nuainkä yekrä Biblia ye ütiäte krubäte yebätä nüke gare arato. Tätre mike Ngöbö Kukwei erere jai bätä dre nieta tärä yebätä abokän tä miketre erametre jai. (Juan 17:17, Kukwe Kuin Ngöbökwe; 2 Timoteo 3:16, 17.) Niaratre yekrä, Ngöbö Kukwei ye bäri ütiäte ni kä tibienbätä töi ño o dre nuainne yekrä. (Mateo 15:1-3, 7-9.) Dre nieta Tärä Ngöbökwe yebätä ye ererebätä tätre ja di ngwen näin kärera niera. Ne erere, ñaka kukwe driere biti nuainne bä jene. (Tito 1:15, 16.)

5. Nitre Ngöbö kukwei metre nuainkä ye käkwe Ngöbö kä ye mikadre ütiäte jai arato. (Mateo 6:9.) Ngöbö kä Jehová ye Jesukwe mikani gare, nitre kristiano erametre ye käkwe nuaindre erere arato. (Juan 17:6, 26; Romanos 10:13, 14.) ¿Nire nire käta Ngöbö kä ye mike gare mä käibiti?

6. Nitre kristiano erametre ye käkwe Gobran Ngöbökwe ye kukwei driedre. Jesús käkwe nuainbare. Käre niara nämene blite Gobran Ngöbökwe yebätä. (Lucas 8:1.) Ne mada, Kä jökräbiti tibien kukwe ne arabe drie manamene kwe nitre nänkä ben yei. (Mateo 24:14, Kukwe Kuin Ngöbökwe; 28:19, 20.) Gobran Ngöbökwe ye aibe ngöräbe käkwe ni mikai nüne jäme täte metre kwärikwäri jabe Kä tibien nebätä. Kukwe ne abokän ie ni kristiano erametre tä tö ngwen. (Salmo 146:3-5.)

7. Nitre nänkä Jesube ye ñaka ja mike nitre kukwe käme nuainkä kä nebätä yekri. (Juan 17:16.) Ñaka ja mrite kukwe gobrankwe yebe bätä nitre kukwe ngwarbe dätekä jabe kä nebätä yebe. Nitre ja ngwen käme o kukwe käme nuainkä kärera niera, ye erere ñaka ja sribere. Arato nitre kä nebätä kärera niera töi käme, ye abokän erere ñaka ja töimike. (Santiago 1:27; 4:4.) Kukwe kädirite nete nebätä nüke gare nie nire kristiano erametre. Mätä nüne ye känti, ¿nitre nänkä kukwe medenbätä tärä nuainne ne erere gare mäi?

Copyright © 2011 Watch Tower Bible and Tract Society of Pennsylvania. All rights reserved.