¿Ngöbö töita ño Kä tibien nekrä?

1. Jehovakwe Kä tibien ne sribebare ne kwe ni jökrä käkwe nünandre kwin te kärekäre. Niara tönamani nitre kukwe kwin metre nuainkä, arato kä jutobätä ye aibe käkwe nünandre Kä tibien nebätä. (Salmo 115:16; Isaías 45:18.) Kä tibien ne ñaka gaite jire chi; nuadi kärekäre kwe. (Salmo 104:5; Eclesiastés 1:4.)

2. Ni brare ye sribe jämi känenkri, Ngöbö käkwe Kä dianinkä chi biti kwitani kwe bä nuäre. Ye abokän kädekani kwe “jardin Edén”. Yete ni brare bätä merire kena mikani nüne kwe: Adán bätä Eva. Ngöbö tönamani monso tuai nemen kwe. Ne kwe nünandre Kä jökräbiti tibien kwetre gäre. Bätärekä jatäri Kä jökrä rabadre kwitabare bä nuäre ietre. (Génesis 1:28; 2:8, 15.)

Kä bä nuäre nianinte

3. Adán bätä Eva käkwe ja mikani ngite nierare, Ngöbö kukwei ñaka mikani täte kwetre. Ye dukwäre mada Jehovakwe juanintari kä bä nuäre Edén ye bäre, ye medenbätä kä bä nuäre ye nianinte. (Génesis 3:1-6, 23.) Akwa Jehová töi namani ño kena Kä nekrä, ye ñaka käi kwitekä jabiti. Niarata käbämike Kä ne kwitai kwe bä nuäre ne kwe ni jökrä käkwe nünandre kärekäre te. ¿Nuaindi ño kwe? (Salmo 37:29.)

4. Kä ne kwita jämi bä nuäre känenkri, ni kukwe käme nuainkä ye riaikä. (Salmo 37:38.) Ne rabai bare Armagedón yete, rü Ngöbökwe, ni kukwe käme nuainkä ye mikakäre krüte. Ne bitikäre mada, Satana ketaikä kä mil krati näre, ne gärätä abokän ni käme ñaka rabaira jire iti Kä tibien ne juankäre ngwarbe. Juta Ngöbökwe aibe rabaite nire. (Revelación 16:14, 16; 20:1-3.)

5. Ne bitikäre Jesukristo käkwe gobrandi Kä tibien nebiti kä mil krati näre. (Revelación 20:6.) Ye angwane bätärekä jatäri ja mika ngite ye näin denkä ni töibätä bätä ni ngrabare. Adán bätä Eva jämi ja mike ngite ye känenkri töi nämene metre kena ye erere ni rikwitai töi metre. Ye angwane bren, ni umbre bätä gata ye ñaka rabaira. Nitre bren rabaita kwin bätä nitre umbre rabaita bati. (Job 33:25; Isaías 33:24; Revelación 21:3, 4, Kukwe Kuin Ngöbökwe.)

6. Kä Mil krati te Jesukwe Gobrandi, ye angwane, ni Ngöbö mikaka metre täte aibe käkwe sribidi Kä jökrä kwitakäre bä nuäre. (Lucas 23:43.) Ne mada arato, ni kwati krütanina ye gaikröta nire, biti rabaita nüne ni Kä nebätä ye erere. (Hechos 24:15, Kukwe Kuin Ngöbökwe.) Ngöbö tö dre nuainmana ietre, ye erere nuaindi kwetre aune, nünandi kärekäre kwetre Kä tibien nebätä. Ne erere ñakare aune, gaite jökrä kärekäre. (Juan 5:28, 29; Revelación 20:11-15.)

7. Ne erere Ngöbökwe töbikabare ño kena Kä tibien nekrä ye rabai bare ie. ¿Mä törba jondron kwin tä kä ja känenkäre yete ye tuai nemen jakwe arato? Ne erere angwane, mä rabadre ja tötike jankunu Jehová yebätä bätä tä dre nuainmana nie ye erere mäkwe mikadre täte. Mäkwe ja ükadrekrö gätä nuainta Testikotre Jehovakwe mä käibiti yebe, ye käkwe mä dimikai ye erere nuainne. Gätä ne tä nemen bare Ju ja Ükarakrö Testikotre Jehovakwe yekänti. (Isaías 11:9; Hebreos 10:24, 25, Kukwe Kuin Ngöbökwe.)

Armagedón ye bitikäre, Kä tibien ne kwitai bä nuäre

Copyright © 2011 Watch Tower Bible and Tract Society of Pennsylvania. All rights reserved.