¿Nire abokän Diablu?

1. Kukwe kädekata “diablu” ye abokän ni kukwe ngwarbe käme niekä ni madabätä, meden gärätä. “Satana” abokän ni rüe o ni rüere meden gärätä. Kukwe ne tä mike gare kwin nire Ngöbö rüe bäri kri. Kena niara angel töi kwin metre, nämene nüne Ngöböbe kä kwinbiti. Akwa ja töi mikani jabebätä kwe bätä Ngöbö aibe mikadre kri täte jai ye erere tönamani ja mikamana täte arato. (Mateo 4:8-10.)

2. Ngöbö ye aibe Bäri Kri ni jökrä bitita. Akwa, angel Satana ye käkwe blitabare kulebra yebiti Evabe, biti kukwe ngwarbe kwe yebiti, mikani kwe Ngöbö kukwei mike ngwarbe jai. Ye erere gänti Satana käkwe ja mikani “gobran” Ngöbökwe ye rüere. Ngöbökwe gobrandi kwin o käme ni juta Kwe yekrä ye abokänbätä ni mikani töbike kwe. Arato niebare kwe, ni ñaka rabai iti jire chi ja mike täte Ngöböi. Ja mikani kore kwe känti nikwitani Ngöbö rüere. Ye medenbätä kädekani Satana Diablu. (Génesis 3:1-5; Job 1:8-11; Revelación 12:9.)

3. Satana tö ni jökrä ngökai ne kwe niara mikadre täte. (2 Corintios 11:3, 14, Kukwe Kuin Ngöbökwe.) Nitre kukwe ngwarbe driekä Ngöböbätä yebiti tä nuainne. Nitre meden kätä kukwe ngwarbe driere Ngöböbätä, ye angwane erametre Satana tö dre ie erere nuainta kwe. (Juan 8:44.) Nitre ja ketaka kukwe ngwarbe yebätä ye raba nütüre tä Ngöbö metre ye mike täte bökän, akwa metrere tä Satana mike täte, ne ñan ñobätä niarata ‘ngöböre kä nebtä’. (2 Corintios 4:4, Kukwe Kuin Ngöbökwe.)

Kukwe ngwarbe drieta Ngöböbätä, kukwe ja mäkätä chokabe bätä ni juta ruäre känti ja ruin bäri kri ie kukwe nebiti abokän ni ngökata

4. Kukwe ja mäkätä chokabe nieta yebiti, Satana tä nitre töite sribire arato, ne kwe niara tö dre ie erere nuaindre. Ni ruäre tärä ja driere choka üai käme yei ne kwe kriemikadre kwe bätä jondron käme nuaindre kwe ni madabätä. Arato dre rabai barebätä ja känenkäre, ye niedre kwe ie gäre o jondron mada ñan tuabare nuaindre kwe meden gäre. Satana die käme ye abokän kätä kukwe jökrä ne dätere. Ni törba kä mikai juto Ngöböbätä angwane, kukwe ja mäkätä chokabe nieta, ye ni ñaka rabadre nuainne jire chi. (Deuteronomio 18:10-12; Hechos 19:18, 19.)

5. Ni töi bikabätä bäri kri ni kwata bä jene jene yebätä, arato tödekata kukwe gobrankwe Kä tibienbätä yei, yebiti Satana tä nitre ngökö arato. Nitre ruäre nünanka juta madate bätä kwata bä jene, yebätä bäri kri o bäri ütiäte ni madakrä tä nemen ruin ie. Akwa ye erere ñaka. (Hechos 10:34, 35.) Nitre mada abokän gobrankwe kukwe tare jökrä ye ükaite nikrä abokän tä ngübare. Ne kwrere gänti Gobran Ngöbökwe ye aibe käkwe kukwe jökrä ükaite nikrä, ye abokän ñaka kain ngäbiti. (Daniel 2:44.)

Mäkwe ja dimika Satana ye rüere ye gäre mäkwe ja tötika jankunu Jehovabätä

6. Kukwe madabiti Satana kätä ni ngökö arato, ye abokän tä ni töimike kukwe käme jiebiti. Kukwe käme ye nikwe ñaka nuaindre Jehovata niere nie ne ñan ñobätä ye käme nikrä gare ie yebätä. (Gálatas 6:7, 8.) Kukwe käme, ye ni ruäre törbai nuainmana jabe mäi. Akwa mäkwe ngwan törö jai, Satana ye ara tö kukwe ye erere nuainmana mäi. (1 Corintios 6:9, 10; 15:33.)

7. Satana raba ni rüe mike o ni mada mike ni rüere ne kwe nikwe kämikadrekä Jehovabätä. Mätä ja tötike Bibliabätä, ye abokän dukwäre mä mräkätre ruäre raba nemen rubun krubäte mäkrä. Ni mada abokän raba mä kötaire. Akwa, ¿nirekwe ja nire biani mäi? Satana tö mä ngwain nikenkä ne kwe mäkwe ñaka ja tötikadre Jehovabätä. Mäkwe ñaka ja kwärbemana ie. (Mateo 10:34-39; 1 Pedro 5:8, 9.) Mäkwe ja dimikai Diablu ye rüere angwane, mä raba kä mike juto Jehovabätä. Arato gobran Kwe bäri kri yekri mätä ja kete ye mäkwe bämikai. (Proverbios 27:11.)

Copyright © 2011 Watch Tower Bible and Tract Society of Pennsylvania. All rights reserved.