¿Nire abokän Jesukristo?

1. Jesús jämi nüke Kä tibienbätä ye känenkri, nämenena nüne kä kwinbiti ni üaire kwrere. Niara ye abokän sribebare käne Ngöbökwe; medenbätä kädekata Ngöbö Monsoi “mubai”. (Colosenses 1:15; Revelación 3:14.) Jesús Ngöbö Monsoi niara ye aibe Ngöbökwe sribebare kaibe, ni mada diebiti ñakare. Jesús nämenena kä kwinbätä aune Jehová käkwe dianinkä “sribikä kwin krubäte”, niara ye köböire Ngöbökwe jondron jökrä kä kwinbiti bätä Kä tibienbätä sribebare. (Proverbios 8:22-31; Colosenses 1:16, 17.) Ni bäri ütiäte ye erere Ngöbökwe dianinkä ja kukwei niekäre ni madai. Ne medenbätä Jesús kädekata “Kukwe”. (Juan 1:1-3; Revelación 19:13.)

2. Ngöbökwe Monsoi kwe juani Kä tibienbätä, mikani nüke nire kwe Mariabätä. Ne medenbätä Jesús rün ñaka ni kä nebätä; arato niara därebare töi metre aune ja mika ngite ye ñaka namani kwe. Ngöbökwe Jesús juani Kä tibienbätä kukwe ketämäbätä: 1) kukwe metre driekäre Ngöböbätä nie (Juan 18:37), 2) ja mikakäre erametre täte ne kwrere kukwe bämikani kwe ni käne ne kwe nikwe nuaindre erere arato (1 Pedro 2:21) bätä 3) ja biankäre murie ketadre ni mikakäreta kwäre ja mikata ngite bätä gata yebätä arato. ¿Ñobätä ütiäte Jesukwe ja nire biandre ni ütiäre? (Mateo 20:28.)

3. Ni brare kena Adán, käkwe ñaka Ngöbö kukwei mikani täte. Kukwe käme nuainbare kwe ye meden abokän Biblia kätä kädeke ja mika “ngite”. Ye medenbätä Ngöbökwe gata ñäkäbare kräke. (Génesis 3:17-19.) Ñaka namanina ja ngwen Ngöbö kukwei ye erere ye medenbätä, töi ñaka namanina metre. Bätärekä bätärekä jatani umbre, biti mrä mada krütani. Adán käkwe ja mikani ngite, ye juani jökrä monsoi kwebiti kwe. Ye medenbätä ni ne arato tä nemen umbre, nita kite bren biti nita krüte. ¿Ñokänti ni jökrä diantari raba? (Romanos 3:23; 5:12.)

4. Jesús ye abokän töi nämene metre Adán kwrere arato. Akwa Jesús käkwe ja ngwani jene, ne ñan ñobätä, kukwe tare nakaninkäbätä akwa Ngöbö mikani metre täte kwe. Ne medenbätä niara rabadre ja nire metre ye bien, Adán käkwe ja mikani ngite ye ütiä biankäre. Kukwe nuainbare ne abokän Biblia kätä kädeke ni “kökatarita”. Ne köböire Adán monsoi mika rabadreta kwäre gata ñäkäni kräketre ye kisete. Ni jökrä kätä tödeke Jesuye, ye abokän ja mike ngite, ye dianka rabadre bitita bätä ja nire käre rabadre kwe. (1 Timoteo 2:5, 6; Juan 3:16; Romanos 5:18, 19.)

Jesukwe sribibare, diribare kwe, jondron ñaka tuabare nuainbare kwe biti mrä ja nire biani kwe ni ütiäre.

5. Jesús nämene Kä tibienbätä angwane, ni bren mikaninta kwin kwe, nitre ie mrö namani bukani kwe bätä murie dite krubäte ketaninbätä kwe. Arato ni krütanina mikaninta nire kwe. ¿Ñobätä jondron ñaka tuabare nuainbare kwe? 1) Nitre nämene tarenike ye namani tuin bobre ie, tönamani dimikai. 2) Jondron ñaka tuabare nuainbare kwe, ye käkwe mikani gare ñiara ye abokän Ngöbö Monsoi. 3) Rabadi gobrane Reire Kä tibien nebiti, ye angwane, dre nuaindi kwe nitre Ngöbö mikaka metre täte yekrä ye abokän bämikani kwe. (Mateo 14:14; Marcos 2:10-12; Juan 5:28, 29.)

6. Jesús krütani, Ngöbökwe ganinkröta biti nikaninta kä kwinbiti ni nire üaire kwrere. (1 Pedro 3:18.) Bitikäre Ngöbökwe mikani Reire. Kä nibira ja ken ne kwe Jesukwe jondron jökrä käme bätä tare nikata ye diandrekä Kä nebätä. (Salmo 37:9-11; Proverbios 2:21, 22.)

Copyright © 2011 Watch Tower Bible and Tract Society of Pennsylvania. All rights reserved.