¿Nire abokän Ngöbö?

1. Nitre tä jondron bätäkä mike Ngöböre jai. Akwa, Biblia kätä niere nie Ngöbö METRE ye abokän itibe. Niarakwe jondron jökrä tä kä kwinbiti bätä Kä tibienbätä ye sribebare. Niara käkwe ja nire biani nie, ye medenbätä niara ye aibe mika raba Ngöböre nikwe jai. (1 Corintios 8:5, 6; Revelación [Apocalipsis] 4:11.)

2. Ngöbö ye kädekateta keta kabre akwa kä kwe kwatibe: JEHOVÁ. Biblia kwatibätä Ngöbö kä ye dianinkä, täte mada mikani yebiti kädekateta jene jene Dänkien o Ngöbö. Akwa, Biblia ye tikani angwane, kä Jehová nämene tikani mil kwä kükü närebätä. (Éxodo 3:15; Salmo 83:18.)

3. Jehová ngrabare tärä, akwa ñaka ni ne erere. “Ngöbö abko üai [“üaire”, NM]”, Biblia kätä niere. (Juan 4:24, Kukwe Kuin Ngöbökwe.) Ni üaire nieta ye ni nire arato, akwa bäri kri nikrä. Ni ñakare iti kä nebätä käkwe Ngöbö ye tuabare jire chi. Jehová ye tä nüne kä kwinbiti akwa jondron jökrä raba tuin ie. (Salmo 11:4, 5; Juan 1:18.) ¿Dre abokän gärätä üai deme? Ye ñaka ni nire Ngöbö erere, Ngöbö die kri medenbiti tä jondron jökrä nuainne ye meden gärätä. (Salmo 104:30.)

4. Biblia kätä mike gare nie Jehová ye abokän ño. Ne mada töi meden meden kwin bäri kri abokän kädekateta krörö: ni tare kwe, kukwe jökrä nuainne erametre, töbätä kri bätä die krubäte. (Deuteronomio 32:4; Job 12:13; Isaías 40:26; 1 Juan 4:8.) Arato tä niere ni tuin bobre ie, töi kwin nikrä, ni ja mike ngite ye tä juenta nibiti, mantiame, arato bätärekä tä ni ngübarebätä. Monso ja mike täte ye erere, Ngöböta dre nuainne ye erere nikwe nuaindre arato. (Efesios 5:1, 2.)

Jondron dätebare bätä Biblia yebiti ni raba ja tötike Ngöbö yebätä

5. ¿Ni raba nemen ngukodokwäbiti ja driere jondron üai bämikata ye känenkri? Ñakare. (Éxodo 20:4, 5.) Jehová ye aibe nikwe mikadre Ngöböre jai tä niere. Niara ñaka tö ja mikamana kri ni mada o jondron madabe gwaire. Ne madakäre, jondron üai bämikata ye die ñaka jire chi ye medenbätä ñaka raba ni dimike. (Salmo 115:4-8; Isaías 42:8.)

6. Ñokänti Ngöbö ye raba nüke gare bäri kwin nie? Käne, jondron dätebare kwe ye mikadre ñärärä, biti töibikadre kwinbätä ne kwe rükadre gare nie dre nieta kwe niara yebätä nie. Jondron dätebare Ngöbökwe yeta mike gare nie niara ye die kri bätä töbätä krubäte. Jondron jökrä sribebare kwe ye köböire nüke gare nie ni tare kwe. (Salmo 19:1-6; Romanos 1:20, Kukwe Kuin Ngöbökwe.) Ne madakäre nikwe ja tötikadre Bibliabätä, yekänti Ngöbö raba nüke gare nie arato. Tärä yebätä niarata niere bäri kwin nie niara ye abokän Ngöbö ño. Niara tö dre nuainbätä ye tä mike gare nie bätä tö dre nuainmana nie ye tä niere arato. (Amós 3:7; 2 Timoteo 3:16, 17.)

Copyright © 2011 Watch Tower Bible and Tract Society of Pennsylvania. All rights reserved.