Famili Em God i Ken Amamas Long En

1. Baibel i tok man marit em i het bilong famili. (1 Korin 11:3) Man i ken kisim wanpela meri tasol. Tupela i mas marit stret long lo bilong gavman.—1 Timoti 3:2; Taitus 3:1.

2. Man i mas laikim tru meri bilong em olsem em i laikim em yet. Em i mas mekim gutpela pasin long em olsem Jisas i mekim long ol disaipel bilong em. (Efesus 5:25, 28, 29) Em i no ken paitim meri bilong em o mekim nogut long em long narapela rot. Nogat. Em i mas mekim gutpela pasin long meri na givim biknem long em.—Kolosi 3:19; 1 Pita 3:7.

Papa i gat pasin sori em bai lukautim famili bilong em long ol samting bilong skin na spirit

3. Papa i mas wok strong bilong lukautim famili bilong em. Em i mas lukautim meri pikinini long kaikai, na klos, na haus. Na tu, em i mas lukautim famili long ol samting bilong spirit. (1 Timoti 5:8) Em i mas go pas long helpim famili long kisim save long God na long laik bilong Em.—Lo 6:4-9; Efesus 6:4.

4. Meri i mas i stap olsem gutpela helpim bilong man bilong em. (Stat 2:18) Em i mas helpim man bilong em long skulim ol pikinini bilong ol. (Sindaun 1:8) Jehova i laik meri i mas helpim famili bilong em long pasin sori. (Sindaun 31:10, 15, 26, 27; Taitus 2:4, 5) Em i mas stap daun long man bilong em.—Efesus 5:22, 23, 33.

5. God i laik ol pikinini i mas bihainim tok bilong papamama. (Efesus 6:1-3) Em i laik ol papamama i mas skulim na stretim ol pikinini. Ol papamama i mas makim taim bilong stap wantaim ol pikinini na stadi wantaim ol long Baibel, olsem lukautim ol long ol samting bilong spirit na mekim bel bilong ol i stap isi. (Lo 11:18, 19; Sindaun 22:6, 15) Ol papamama i no ken stretim pikinini bilong ol long hatpela pasin o bagarapim ol.—Kolosi 3:21.

God i laik ol papamama i mas skulim na stretim ol pikinini bilong ol

6. Sapos ol marit i no save stap gut wantaim, ol i mas wok strong long bihainim ol tok bilong Baibel. Baibel i tokim yumi long mekim pasin sori na lusim rong bilong narapela. (Kolosi 3:12-14) Tok Bilong God i no orait long man o meri marit i lusim poroman olsem rot bilong stretim ol liklik hevi. Tasol meri i ken lusim man bilong em sapos (1) man i bikhet na i no laik lukautim famili bilong em, o (2) em i save paitim nogut tru meri na bai meri inap bagarap o i dai, o (3) em i birua nogut tru long meri na meri i no gat rot long lotuim Jehova.—1 Korin 7:12, 13.

7. Man o meri marit i mas i stap gut long poroman bilong em. Pasin pamuk em i wanpela sin long God na long poroman marit. (Hibru 13:4) Sapos man o meri marit i slip wantaim wanpela i no poroman marit bilong em, Baibel i tok long dispela as tasol Kristen i ken katim marit na marit gen. (Matyu 19:6-9; Rom 7:2, 3) Jehova i nolaik tru sapos man o meri i katim marit na dispela i no stret wantaim Baibel na em i go maritim narapela.—Malakai 2:14-16.

Copyright © 2008 Watch Tower Bible and Tract Society of Pennsylvania. All rights reserved.