Satan Em i Husat?

1. Insait bilong dispela tok “Satan” i olsem birua. Dispela tok i makim nambawan birua bilong God. Em i man bilong mekim ol tok giaman nogut long narapela man. Pastaim em i wanpela gutpela ensel i stap wantaim God long heven. Tasol bihain em i hambak tru na em i no laik bai ol man i lotu long God—em i laik ol i mas lotu long em.—Matyu 4:8-10.

2. Dispela ensel, em Satan, i bin toktok wantaim Iv long rot bilong wanpela snek. Em i giamanim Iv, na dispela i kirapim Iv long sakim tok bilong God. Long dispela pasin Satan i birua long wok bilong God olsem nambawan bos, o namba bilong em olsem God Antap Tru. Satan i sutim tok long God olsem em i no bosim ol man long gutpela pasin na helpim tru ol. Na Satan i tok, i no gat wanpela man bai i stap gut long God. Taim Satan i mekim olsem, em i kamap birua bilong God. Long dispela as Baibel i kolim em Satan.—Stat 3:1-5; Jop 1:8-11; KTH 12:9.

3. Satan i wok strong long trikim ol man bambai ol i lotu long em. (2 Korin 11:3, 14) Wanpela rot bilong em long giamanim ol man em long rot bilong lotu giaman. Sapos wanpela lotu i skulim ol man long God, tasol tok bilong ol i giaman, ol i helpim wok bilong Satan. (Jon 8:44) Ol man i insait long ol lotu giaman, ating ol i bilip tru olsem ol i lotu long trupela God. Tasol nogat. Ol i mekim wok bilong Satan. Em i “giaman god bilong dispela graun.”—2 Korin 4:4.

Lotu giaman, marila posin samting, litimapim kantri, dispela i paulim ol man

4. Narapela rot bilong Satan long bosim ol man, em long rot bilong marila posin samting. Ating ol man i singautim ol spirit long lukautim ol, o long bagarapim ol narapela, o long tokaut long ol samting i kamap bihain, o long wokim mirakel. Dispela spirit nogut Satan em i as bilong ol dispela samting. Bilong mekim ol samting God i laikim, yumi no ken insait liklik long wok bilong ol spirit nogut.—Lo 18:10-12; Aposel 19:18, 19.

5. Satan i paulim ol man tu long rot bilong hambak tumas long lain bilong ol na long pasin bilong lotuim ol lain politik. Sampela man i ting kantri o lain bilong ol i winim ol narapela. Tasol dispela i no tru. (Aposel 10:34, 35) Na sampela man i ting ol lain politik inap stretim ol hevi bilong yumi. Taim ol i mekim olsem ol i sakim Kingdom bilong God. Em tasol inap long stretim ol hevi bilong yumi.—Daniel 2:44.

Sakim Satan na wok long kisim sampela save moa long Jehova

6. Narapela rot bilong Satan long paulim ol man em i olsem: Em i traim ol long bihainim ol laik nogut. Jehova i tokim yumi long abrusim ol pasin nogut, long wanem, em i save dispela bai nogutim yumi. (Galesia 6:7, 8) Ating sampela i laik bai yu bihainim ol long mekim pasin nogut. Tasol tingim! Satan i as bilong dispela samting—em i laik bai yu mekim pasin nogut.—1 Korin 6:9, 10; 15:33.

7. Ating Satan bai kirapim ol man long mekim nogut long yu o birua long yu bambai yu lusim Jehova. Ating sampela long famili bilong yu bai i kros tru, long wanem, yu stadi long Baibel. Ating sampela bai tok bilas long yu. Tasol husat i bin givim laip long yu? Satan i laik pretim yu bambai yu no ken kisim sampela save moa long Jehova. No ken larim Satan i win! (Matyu 10:34-39; 1 Pita 5:8, 9) Taim yu sakim Satan yu inap mekim Jehova i amamas na yu kamapim klia olsem yu tingim Em i stap Nambawan Bos.—Sindaun 27:11.

Copyright © 2008 Watch Tower Bible and Tract Society of Pennsylvania. All rights reserved.