Krais Jisas Em i Husat?

1. Taim Jisas i no kam yet long graun em i wanpela spirit i bin i stap long heven. Em i namba wan samting God i bin wokim, olsem na Baibel i kolim em “namba wan” Pikinini bilong God. (Kolosi 1:15; KTH 3:14) God yet i wokim wanpela Pikinini tasol, em Jisas. Taim Jisas i no kamap man yet, Jehova i bin makim em olsem “saveman i bosim wok” bilong wokim olgeta narapela samting long heven na long graun. (Sindaun 8:22-31; Kolosi 1:16, 17) God i makim em tu long i stap nambawan mausman bilong em. Olsem na Baibel i kolim em “Tok.”—Jon 1:1-3; KTH 19:13.

2. God i bin putim laip bilong Jisas long bel bilong Maria; long dispela rot em i salim Pikinini bilong em i kam long graun. Jisas i no gat papa bilong graun. Olsem na em i no bin kisim sin o sik samting long dispela rot. I gat 3-pela as na God i salim Jisas i kam long graun: (1) Bilong skulim yumi long tok tru bilong God (Jon 18:37), (2) bilong stap gut long God bambai yumi ken bihainim dispela pasin bilong em (1 Pita 2:21), (3) bilong givim laip bilong em olsem ofa bambai yumi ken kamap fri long sin na dai. Bilong wanem Jisas i mas mekim olsem?—Matyu 20:28.

3. Taim namba wan man Adam i sakim lo bilong God, em i mekim samting Baibel i kolim “sin.” Olsem na God i tok em i mas i dai. (Stat 3:17-19) Em i no inapim moa ol lo God i bin putim, olsem na em i no gutpela olgeta moa. Isi isi em i go lapun na em i dai. Adam i givim sin long olgeta pikinini bilong em. Long dispela as tasol yumi tu i go lapun, na kisim sik, na yumi dai. Olsem wanem God inap kisim bek ol man?—Rom 5:12.

4. Jisas em i gutpela olgeta wankain olsem Adam. Tasol maski sampela bikpela traim i painim Jisas, em i bihainim olgeta tok bilong God—em i no bihainim pasin bilong Adam. Olsem na em inap long givim gutpela laip bilong em olsem ofa bilong baim sin bilong Adam. Baibel i tok em i “baim bek” ol man. Em nau, rot i op na ol pikinini bilong Adam i ken lusim kalabus bilong indai. Olgeta man i bilip long Jisas, God inap lusim sin bilong ol na ol i ken kisim laip oltaim.—1 Timoti 2:5, 6; Jon 3:16; Rom 5:18, 19.

Jisas i skulim ol man, na wokim ol mirakel, na tu, em i givim laip bilong em olsem ofa bilong helpim yumi

5. Taim Jisas i stap long graun em i oraitim ol sikman, givim kaikai long ol man i hangre, na mekim i dai ol bikpela win na ren. Em i kirapim bek ol man i dai pinis. Bilong wanem em i wokim ol mirakel? (1) Em i sori long ol man i karim hevi, na em i laik helpim ol. (2) Ol mirakel i kamapim klia olsem em i Pikinini bilong God. (3) Ol mirakel i soim yumi long ol samting em bai mekim bilong helpim ol manmeri long taim em i bosim graun olsem King.—Matyu 14:14; Mak 2:10-12; Jon 5:28, 29.

6. Jisas i bin i dai, na God i kirapim em olsem wanpela spirit, na em i go bek long heven. (1 Pita 3:18) Bihain God i bin mekim em i kamap King. Klostu nau Jisas bai pinisim olgeta pasin nogut na ol hevi i stap long graun.—Song 37:9-11; Sindaun 2:21, 22.

Copyright © 2008 Watch Tower Bible and Tract Society of Pennsylvania. All rights reserved.