God Em i Husat?

1. Ol man i save lotu long planti samting. Tasol Baibel i tokim yumi olsem i gat wanpela TRUPELA God tasol. Em i bin wokim olgeta samting long heven na long graun. Em i givim laip long yumi, olsem na yumi mas lotu long em wanpela tasol.—1 Korin 8:5, 6; KTH 4:11.

2. God i gat planti biknem, tasol em i gat wanpela nem tasol. Dispela nem em JEHOVA. Long planti Baibel ol man i bin rausim nem bilong God na raitim BIKPELA o GOD. Tasol taim ol i bin raitim Baibel long pastaim, dispela nem Jehova i bin stap 7,000 taim long en!—Lukim sta daunbilo bilong Kisim Bek 3:15; Song 83:18, NW.

3. Jehova i gat bodi, tasol em i no olsem bilong yumi. Baibel i tok, “God em i Spirit.” (Jon 4:24) Laip bilong ol spirit i winim tru laip bilong yumi. No gat wanpela man i bin lukim God. Jehova i stap long heven, tasol em inap lukim olgeta samting. (Song 11:4, 5; Jon 1:18) Tasol spirit holi em i wanem samting? Em i no wanpela man olsem God. Em i strong bilong God.—Luk 24:49.

4. Baibel i kamapim long ples klia ol pasin bilong Jehova. Em i tok ol bikpela pasin bilong God em pasin sori, stretpela pasin, gutpela tingting na save, na bikpela strong. (Lo 32:4; Jop 12:13; Aisaia 40:26; 1 Jon 4:8) Baibel i tokim yumi olsem God i gat pasin marimari, na gutpela pasin, na em i save lusim rong bilong man, em i save givim planti samting long ol man, na em i no les kwik long man.—Efesus 5:1, 2.

Yumi ken kisim save long God long rot bilong ol samting em i bin wokim na long rot bilong Baibel

5. Olsem wanem? Taim yumi lotuim God, yumi ken brukim skru long ol imis o piksa samting? Nogat! (Kisim Bek 20:4, 5) Jehova i tok yumi mas lotuim em wanpela tasol. Em i no laik ol narapela man o wanpela samting i kisim biknem olsem em. Ol imis i no gat strong long helpim yumi.—Song 115:4-8; Aisaia 42:8.

6. Olsem wanem yumi ken save moa long God? Wanpela rot em i olsem: Yumi ken lukim ol samting em i bin wokim na nau yumi ken tingting gut, dispela ol samting i lainim yumi long wanem pasin bilong em? Ol samting God i bin wokim i soim yumi bikpela strong na save bilong em. Olgeta samting em i bin wokim i kamapim klia pasin sori bilong em. (Song 19:1-6; Rom 1:20) Narapela rot bilong kisim save long God em olsem: Yumi ken stadi long Baibel. Long Baibel em i tokim yumi olsem em i wanem kain God. Em i tokim yumi long laik bilong em na ol samting em i laik yumi mas mekim.—Amos 3:7; 2 Timoti 3:16, 17.

Copyright © 2008 Watch Tower Bible and Tract Society of Pennsylvania. All rights reserved.