Ol Witnes Bilong Jehova—Ol i Husat? Ol i Bilip Long Wanem Samting?

Ol i Bilip Long Wanem Samting?

OL WITNES BILONG JEHOVA i bilip long God i Gat Olgeta Strong, Jehova, em Man bilong wokim heven na graun. Ol narakain gutpela gutpela samting i stap long ples antap na long graun i kamapim klia olsem wanpela Man i gat bikpela save na strong i bin wokim olgeta dispela samting. Ol samting ol man na meri i wokim i kamapim pasin bilong ol, na olsem tasol ol samting God Jehova i bin wokim i kamapim ol pasin bilong em. Baibel i tok, “ol man i lukim ol samting em i bin wokim. Long dispela rot ol man inap save long sampela pasin bilong God i stap hait.” Na tu, maski skai i no save toktok, em “i soim yumi olsem God em i nambawan tru.”—Rom 1:20; Song 19:1-4.

GRAUN . . . Jehova i wokim . . . ol man i save lukautim . . . ol man bai stap oltaim long en

Ol man i no save wokim nating ol sospen graun o televisen na kompiuta, i gat as na ol i wokim ol dispela samting. Graun na ol diwai na plaua na ol animal samting i bikpela samting moa. Skin bilong man wantaim planti trilion sel bilong en, em wanpela samting man i no inap save gut long en—na kru bilong yumi em i narakain gutpela samting tru! Sapos i gat as na ol man i wokim ol liklik samting bilong ol, i gat as tru na God Jehova i wokim ol narakain gutpela samting, a? Sindaun 16:4 i tok, ol samting em i wokim i gat as bilong en: “Bikpela i bin wokim olgeta samting, na ol i gat wok bilong ol.”

I gat as na Jehova i wokim dispela graun, olsem em i bin tokim namba wan man na meri: “Yupela i mas kamap planti na i go sindaun long olgeta hap bilong graun. . . . Mi putim ol pis na ol pisin na olkain animal bilong graun aninit long yupela.” (Stat 1:28) Ol i sakim tok bilong God, olsem na ol i no inap kamapim ol famili i bihainim stretpela pasin na lukautim gut dispela graun na ol diwai na animal samting. Tasol dispela i no mekim na laik bilong Jehova i no inap kamap. Planti tausen yia bihain, wanpela man i raitim tok: “Em i bin wokim skai na graun . . . Em i no wokim graun bilong i stap nating. Nogat. Em i wokim bilong olgeta samting i ken i stap long en.” Graun i no inap bagarap, nogat; em bai stap “oltaim.” (Aisaia 45:18; Saveman 1:4) Ol samting Jehova i laik mekim long dispela graun bai kamap tru: “Sapos mi laik mekim wanpela samting, orait mi save mekim tasol. Na i no gat wanpela samting inap pasim mi long mekim dispela samting.”—Aisaia 46:10.

Olsem na ol Witnes Bilong Jehova i bilip olsem graun bai stap oltaim na ol manmeri—ol man i stap laip na ol man i dai pinis—em ol i bihainim laik bilong Jehova ol bai kisim laip oltaim long graun. Olgeta manmeri i kisim sin long Adam tupela Iv, olsem na yumi man bilong mekim sin. (Rom 5:12) Baibel i tok: “Sin i save givim pe long ol wokboi bilong en. Dispela pe em dai tasol.” “Ol man i gat laip . . . ol i save bai ol i dai. Tasol ol man i dai pinis, ol i no inap save long wanpela samting.” “Sapos wanpela man i mekim sin, dispela man tasol i mas i dai.” (Rom 6:23; Saveman 9:5; Esekiel 18:4, 20) Tasol olsem wanem ol inap i stap laip gen bilong kisim ol blesing bilong graun? Long rot bilong ofa Krais Jisas i mekim bilong baim bek ol man, em i tok: “Kirap bek, em mi yet. Na laip, em mi yet. Na man i bilip long mi, maski sapos em i dai, em bai i stap laip yet.” “Olgeta manmeri i stap long matmat ol bai i harim maus bilong Pikinini, na ol bai i lusim matmat na i kam ausait.”—Jon 5:28, 29; 11:25; Matyu 20:28.

Ol dispela samting bai kamap olsem wanem? “Gutnius bilong kingdom,” em Jisas i bin kirap autim tok long en taim em i stap long graun, i stori gut long ol dispela samting. (Matyu 4:17-23) Tasol long nau ol Witnes Bilong Jehova i save mekim bikpela wok bilong autim gutnius.

OL SAMTING OL WITNES BILONG JEHOVA I BILIP LONG EN

Bilip	Tok Bilong Baibel
Baibel em Tok Bilong God na tok bilong en i tru	2 Ti. 3:16, 17; 2 Pi. 1:20, 21; Jo. 17:17
Yumi inap bilip long Baibel, winim bilip tumbuna	Mt. 15:3; Kl. 2:8
Nem bilong God em Jehova	Sng. 83:18, KJ; Ais. 26:4, NW; 42:8, NW; Kis. 6:3, NW
Krais em i Pikinini bilong God na em i aninit long Em	Mt. 3:17; Jo. 8:42; 14:28; 20:17; 1 Ko. 11:3; 15:28
Krais em i namba wan samting God i wokim	Kl. 1:15; KTH 3:14
Krais i dai long diwai pos, i no long diwai kros	Ga. 3:13; Ap. 5:30
Laip bilong Krais em i pe bilong baim bek ol man i bihainim tok	Mt. 20:28; 1 Ti. 2:5, 6; 1 Pi. 2:24
Krais i givim ofa wanpela taim tasol na em inap	Ro. 6:10; Hi. 9:25-28
Krais i kirap bek long matmat olsem spirit i no inap i dai	1 Pi. 3:18; Ro. 6:9; KTH 1:17, 18
Taim Krais i kam i stap em i wanpela spirit	Jo. 14:19; Mt. 24:3; 2 Ko. 5:16; Sng. 110:1, 2
Nau yumi stap long “taim bilong las de”	Mt. 24:3-14; 2 Ti. 3:1-5; Lu. 17:26-30
Kingdom long han bilong Krais bai bosim graun long stretpela pasin na long pasin isi	Ais. 9:6, 7; 11:1-5; Dan. 7:13, 14; Mt. 6:10
Kingdom bai kamapim gutpela sindaun hia long graun	Sng. 72:1-4; KTH 7:9, 10, 13-17; 21:3, 4
Graun i no inap bagarap olgeta na ol manmeri i no inap pinis olgeta	Sav. 1:4; Ais. 45:18; Sng. 78:69
God bai bagarapim ol samting bilong dispela graun long pait bilong Armagedon	KTH 16:14, 16; Sef. 3:8; Dan. 2:44; Ais. 34:2; 55:10, 11
Ol man nogut bai bagarap olgeta	Mt. 25:41-46; 2 Te. 1:6-9
Ol man God i orait long ol bai kisim laip oltaim	Jo. 3:16; 10:27, 28; 17:3; Mk. 10:29, 30
I gat wanpela rot i go long laip	Mt. 7:13, 14; Ef. 4:4, 5
Sin bilong Adam i as na ol man i save dai	Ro. 5:12; 6:23
Taim man i dai em i no i stap moa	Ese. 18:4; Sav. 9:10; Sng. 6:5; 146:4; Jo. 11:11-14
Hel i makim matmat	Jop 14:13, Dy; KTH 20:13, 14, KJ (long arere)
Ol man i dai pinis bai kirap bek	1 Ko. 15:20-22; Jo. 5:28, 29; 11:25, 26
Indai Adam i kamapim bai pinis	1 Ko. 15:26, 54; KTH 21:4; Ais. 25:8
Liklik lain olsem 144,000 tasol bai go long heven na mekim wok king wantaim Krais	Lu. 12:32; KTH 14:1, 3; 1 Ko. 15:40-53; KTH 5:9, 10
Lain 144,000 ol i kamap nupela gen olsem ol pikinini spirit bilong God	1 Pi. 1:23; Jo. 3:3; KTH 7:3, 4
God i wokim nupela kontrak wantaim Israel bilong spirit	Jer. 31:31; Hi. 8:10-13
Krais yet em i as bilong kongrigesen bilong Krais	Ef. 2:20; Ais. 28:16; Mt. 21:42
Yumi mas beten long Jehova tasol long rot bilong Krais	Jo. 14:6, 13, 14; 1 Ti. 2:5
No ken yusim ol imis bilong lotu long God	Kis. 20:4, 5; Wkp. 26:1; 1 Ko. 10:14; Sng. 115:4-8
Yumi mas sakim ol wok bilong ol spirit nogut	Lo 18:10-12; Ga. 5:19-21; Wkp. 19:31
Satan em i hetman bilong dispela graun	1 Jo. 5:19; 2 Ko. 4:4; Jo. 12:31
Ol Kristen i no ken insait long pasin bilong bung wantaim ol narapela lotu	2 Ko. 6:14-17; 11:13-15; Ga. 5:9; Lo 7:1-5
Ol Kristen i no insait long ol samting bilong graun	Jems 4:4; 1 Jo. 2:15; Jo. 15:19; 17:16
Bihainim ol lo bilong man i no pait wantaim ol lo bilong God	Mt. 22:20, 21; 1 Pi. 2:12; 4:15
Kisim blut long rot bilong kaikai o long rot bilong drip i brukim lo bilong God	Stt. 9:3, 4; Wkp. 17:14; Ap. 15:28, 29
Mas bihainim ol lo bilong Baibel long stretpela pasin	1 Ko. 6:9, 10; Hi. 13:4; 1 Ti. 3:2; Snd. 5:1-23
Lo bilong Sabat i bilong lain Israel tasol na i pinis wantaim Lo Bilong Moses	Lo 5:15; Kis. 31:13; Ro. 10:4; Ga. 4:9, 10; Kl. 2:16, 17
I no stret lain bikman bilong lotu i gat ol biknem	Mt. 23:8-12; 20:25-27; Jop 32:21, 22
Man i no kamap nating tasol God i wokim em	Ais. 45:12; Stt. 1:27; Mt. 19:4
Yumi mas bihainim pasin bilong Krais long lotuim God	1 Pi. 2:21; Hi. 10:7; Jo. 4:34; 6:38
Go insait tru long wara bilong kisim baptais i makim man i dediket pinis	Mk 1:9, 10; Jo. 3:23; Ap. 19:4, 5
Ol Kristen i amamas long autim tok i tru bilong Baibel	Ro. 10:10; Hi. 13:15; Ais. 43:10-12

Wokim long 2001