Diabolo be Daika?

1. Unai hereva “diabolo” ena anina be ma ta sivaraina koikoidia ia gwauraia tauna. “Satani” ena anina be ta ia inai henia eiava tuari henia tauna. Unai ladana ruaosi be Dirava inai henia tauna badana idia henia. Matamana ai, ia be aneru goevadaena ta, guba dekenai Dirava ida ia noho. To gabeai ia sibona ia laloa bada bona ia ura Dirava ese mai maoro ida ia biagua tomadiho henia karana ia abia.—Mataio 4:8-10.

2. Unai aneru, Satani, be gaigai ta ena amo Heva ia hereva henia. Hereva koikoidia ia hamaoroa dainai Heva ese Dirava ia gwau-edeede henia. Unai kara amo Satani ese Dirava ena “lohia siahuna” ia hepapahuahulaia eiava Ia, Atai Herea Diravana, ena dagi ia hepapahuahulaia. Satani ena hepapahuahu herevana be Dirava ese Ia naridia taudia Ia lohiadia maoromaoro bona edia namo Ia tahua eiava. Bona Satani ese ia havaraia daradara herevana ma ta be taunimanima be Dirava do idia badinaia noho eiava. Unai kara amo, Satani be sibona Dirava ia inai henia tauna ai ia lao. Unai dainai unai ladana Satani Diabolo ia abia.—Genese 3:1-5; Iobu 1:8-11; Apokalupo 12:9.

3. Satani be taunimanima ia koidia toho ia do idia tomadiho henia totona. (2 Korinto 11:3, 14) Taunimanima ia koidia dalana ta be tomadiho koikoi amo. Bema tomadiho oreana be Dirava sivaraina koikoidia ia hahedibalaia, ia be momokani Satani ena palani ia durua. (Ioane 8:44) Tomadiho koikoi oreana taudia be reana idia laloa idia be Dirava momokanina idia tomadiho henia. To idia be momokani Satani ena hesiai idia lao henia. Ia be “inai tanobada ena dirava.”—2 Korinto 4:4.

Tomadiho koikoi, babalau, bona bese abia isi karana ese taunimanima idia hakaua kerere

4. Satani ese iena siahu henunai taunimanima ia atoa dalana ma ta be babalau karadia. Reana lauma idia noia idia naridia totona, haida hadikaia totona, vaira gaudia gwauraia totona, eiava hoa karadia karaia totona. Satani be unai kara ibounai ia havaraia tauna dikana. Bema ita ura Dirava ita hamoalea, namona be babalau karadia ta ita abia dae lasi.—Deuteronomi 18:10-12; Kara 19:18, 19.

5. Satani ese taunimanima be edia bese heagilaia badabada karana bona politikol oreadia tomadiho henia karana amo ia koidia danu. Haida idia laloa edia bese ese ma bese haida idia hereaia. To unai be momokani lasi. (Kara 10:34, 35) Ma taunimanima haida idia laloa politikol oreadia ese taunimanima edia hekwakwanai do idia haorea. Unai bamona idia laloa neganai, Dirava ena Basileia idia dadaraia. Ia be iseda hekwakwanai haoredia dalana tamona.—Daniela 2:44.

Iehova oi dibaia noho, unai amo Satani do oi dadaraia

6. Satani ese taunimanima ia koidia dalana ma ta be ura dikadia amo ia dibagania. Iehova ese ita ia hagania kara dikadia do ita dadaraia, badina ia diba ita do idia hadikaia diba. (Galatia 6:7, 8) Reana taunimanima haida do idia ura unai kara lalodiai idia do oi bamoa. To, namona be oi laloatao, unai be Satani ia ura unai gaudia oi karaia.—1 Korinto 6:9, 10; 15:33.

7. Satani ese reana dagedage eiava oi idia inai henia karana do ia gaukaralaia Iehova oi rakatania totona. Reana emu lalokau taudia haida do idia badu dikadika badina Baibel oi stadilaia dainai. Reana haida ese oi do idia kirikirilaia. To daika ese emu mauri ia henia? Satani ia ura oi ia hagaria bena Iehova dibaia karana do oi hadokoa. Satani oi hakwalimua lasi! (Mataio 10:34-39; 1 Petero 5:8, 9) Diabolo oi dadaraia karana amo, Iehova oi hamoalea diba bona oi hahedinaraia Iena lohia siahuna oi abia isi.—Aonega Herevadia 27:11.

Copyright © 2006 Watch Tower Bible and Tract Society of Pennsylvania. All rights reserved.