?Wanem Samting We Baebol i Rili Tijim?

!EVRI niuspepa we yumi ridim tede, eni nius we yumi wajem long televisin, no we yumi harem long radio oli fulap long ol stori blong teroris, ol faet, mo rabis fasin! Tingbaot prapa laef blong yu mo ol trabol we yu wan yu gat. Maet yu sik no maet yu lusum wan famle no fren long ded. Ol samting ya oli mekem yu yu harem nogud. Maet yu harem olsem gudfala man ya Job, we i talem se ‘tingting blong hem i kam nogud finis’ from ol trabol we oli kasem hem.—Job 10:15.

Traem tingbaot ol kwestin ya:

• ?Hemia nao samting we God i wantem se i kamaot long laef blong mi mo long laef blong olgeta man long wol?
• ?Wanem i save halpem mi blong winim ol trabol blong mi?
• ?I gat janis i stap yet se wan dei bambae i gat pis long wol?

Baebol i givim ol stret ansa long ol kwestin ya.

SAMTING WE YU LUK LONG PIJA YA, HEMIA NAO SAMTING WE BAEBOL I TALEM SE GOD I WANTEM BLONG MEKEM, MO BAMBAE HEM I MEKEM OL SAMTING YA OLI KAMTRU LONG WOL YA.

“Hem bambae i ravemaot wota blong ae blong olgeta. Nao bambae i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem.”—Revelesen 21:4

“Olgeta we leg blong olgeta i nogud, bambae leg blong olgeta i kam gud bakegen, nao oli jamjam olbaot, oli danis.”—Aesea 35:6

“Ol blaen man bambae oli save lukluk.”—Aesea 35:5

“Ol dedman bambae . . . oli aot long beregraon.”—Jon 5:28, 29

“Bambae i no moa gat man . . . i save talem se hem i sik.”—Aesea 33:24

“Bambae i gat plante kakae long ples ya, we bambae ol hil oli fulap gud long hem.”—Ol Sam 72:16

OL TIJING BLONG BAEBOL OLI SAVE MEKEM I GUD LONG YU

I nogud yu hareap blong tingting se ol samting ya oli gud be oli wan drim nomo.

Baebol i save givhan long yu long plante narafala rod tu. Hem i save halpem yu blong harem gud long laef blong yu naoia. Tingbaot ol wari mo trabol we yu gat naoia. Maet hemia ol trabol long saed blong mane, famle, sik, no ded blong wan memba blong famle. Baebol i save halpem yu blong dil wetem ol trabol we yu kasem tede. Mo hem i save leftemap tingting blong yumi taem hem i givim ansa long ol kwestin olsemia:

• ?From wanem yumi safa?
• ?Olsem wanem blong mekem se ol wari blong laef oli no kam hevi tumas?
• ?Olsem wanem yumi save mekem famle blong yumi i hapi?
• ?Wanem i hapen long yumi taem yumi ded?
• ?Ol fren no famle blong yumi we oli ded finis, bambae yumi save luk olgeta bakegen samtaem?
• ?Olwem wanem yumi save sua se God bambae i mekem ol promes blong hem long fiuja oli kamtru?

From we yu yu stap ridim buk ya naoia, hemia i soem se yu yu wantem faenemaot samting we Baebol i tijim. Buk ya bambae i halpem yu. Bambae yu luk we ol kwestin we i stap daon long ol pej oli joen wetem ol wanwan haf long pej ya. Plante milian man oli glad blong tokbaot ol kwestin ya wetem ol Witnes blong Jeova, mo faenemaot ansa blong olgeta long Baebol. Mifala i glad sipos yu tu yu save mekem olsem. !Bambae God i blesem yu taem yu traem faenemaot wanem samting nao we Baebol i rili tijim!

SAVE BAEBOL BLONG YU

I GAT 66 buk mo leta long Baebol. Oli seraotem ol buk mo leta ya long ol smosmol haf we oli kolem japta mo vas. Rod ya i mekem i isi long yumi blong faenem ol toktok insaed long Baebol. Taem mifala i raetem wan vas blong Baebol long stadi buk ya, faswan namba we i stap afta long nem hemia i minim japta, mo nekis namba hemia i minim vas. Olsem nao, sipos yu luk “2 Timoti 3:16” hemia i minim namba tu leta blong Timoti, japta 3, vas 16.

Sipos yu jekemap olgeta vas long buk ya samting ya bambae i mekem we yu yu lanem blong yusum Baebol blong yu kwiktaem nomo. I gud tu sipos yu wokem wan program blong stat ridim Baebol evri dei. Sipos yu ridim 3 no 5 japta long wan dei, bambae yu save ridim ful Baebol long wan yia.