Aiyuununeta Kede Inonosio Lu Itakadikinitos Edeke

Mam Edeke erai Etriniti

1. Mam aiyuununeta kede inonosio kere eroko. Konye mam Edeke ecamuni kes arai elomunitos kodiinin lukaisab, lu engeritos aisisianakineta nuka Obaibuli.—Matayo 15:6.

2. Triniti: Erai kereka Yawe Etriniti—itunga iuni kotoma odeke ediopet? Mam! Yawe, Papa nges bon “Edeke ediopet lokabeit” (Yokana 17:3; Marako 12:29) Yesu Nges Okoku Ke lokiai ido lo erimarit Edeke. (1 Ikorinton 11:3) Epol Papa adepar Okoku. (Yokana 14:28) Emoyo lokalaunan mam erai etunganan; konye erai agogong naka Edeke.—Ageune 1:2; Aswamisio 2:18.

Ekrismas kede Epaska ebunitos kodiinin lukaisab lukolosek

Emamei cut ajokis aima ikatwak karaida akuriau lukatwak

3. Ekrismas kede Epaska: Yesu mam euritai eraas aprasia 25 Desemba. Euritai nges diat 1 Okitoba, a pak nakekaru kicokiete ekecokok isipanin kec kware kokinga. (Luka 2:8-12) Mam Yesu icorakinit Ikristayon ainumunum aurio ke. Konye elimokinit ikesisiak aiitun atwanare ke. (Luka 22:19, 20) Ekrismas kede ikenonosio eponitos kodiinin lukaisab ngo kolosek. Kwapekwangin kes inonosio luka Epaska, kwapenat aitosom abee kede ipooi. Ikristayon lukolosek mam enumunumenenete Ekrismas araida Epaska karaida Ikristayon lukakwana.

4. Aparasia nuka aurio: Ipucito iarei luka aurio luinera Ebaibuli, kes apikakinitos itunga lumam amayete Yawe. (Ageun 40:20-22; Marako 6:21, 22, 24-27) Ikristayon lukolosek mam enumunumete aurio. Einono loka ainumunum aurio elomunit kodiinin lukaisab lukolosek. Ikristayon lukabeit einanakinete ainanakineta ido kolakara aparasia kere luka ekaru.

5. Akuriau Ikatwak: Ikatwan mam iswamai idio bore kere karaida aijen idiobore kere. Mam oni ipedori aingarakin kes, kes da mam epedorete aitican oni. (Isabulin 146:4 Ekalimonokinan 9:5, 10) Etau etwani, mam ejari akaulo naka atwanare. (Esekiel 18:4) Konye imalaikan lukarokok luenyaritai ajokin, kes ituluaros bala imoyoi kalukatwak. Edio koinono kere loijaikini akuriau, karaida aima ikatwak erono.—Isaia 8:19.

6. Emusalaba: Mam Yesu etwanikinit toma omusalaba. Etwanikinit nges okitoi araai opir loerioro. Ayonanit naijulitai “Emusalaba” kotoma Obaibulin luipu erai apolouke akitoi adiopet naerioro. Ejenunet loka emusalaba ebunit kodiinin lukaisab lukosek. Mam Ikristayon lukolosek itosomaitos nges karaida aima. Kanukangun, iwomit ijo ebe edolit aitosom emusalaba kotoma aima?—Ikisila 7:26; 1 Ikorinton 10:14.

7. Kati cepak etiono ajalakin aiyuununeta ka inonosio kwa kangun. Lukajena kede ipapero kon etamete alimokin ijo aigir aijulakin aiyuununetakon. Konye aisialamikin Edeke epol adepar aisialamikin itunga.—Awaragasia 29:25; Matayo 10:36, 37.

Copyright © 2008 Watch Tower Bible and Tract Society of Pennsylvania. All rights reserved.