Omaungurisiro Mukuru Nga Tonda

1. Ovakarere vaMukuru ve suvera imbi mbi ri oviwa. Nungwari owo wina va sokurihonga okutonda imbi mbi ri ovivi. (Epsalme 97:10) Ihi matji heye okuyepa omaungurisiro tjiva Mukuru nga tonda. Omaungurisiro ingo tjiva ooyeṋe?

2. Omavakirasaneno: Omararasaneno komeho yorukupo, omakatukiro worukupo, omararasaneno ku na ovipuka, omararasaneno pokati kovazamumwe, nomatundukiro wovavena novasuko avihe imbi ourunde ounene ku Mukuru. (Levitikus 18:6; Ovaroma 1:26, 27; 1 Ovakorinte 6:9, 10) Indu ovandu vevari mbe ha kupasanene tji ve kara pamwe, owo va sokuhaṋika poo tjarwe okutja va sokukupasana otja kotjiveta.—Ovaheberi 13:4.

Mukuru u tonda omapurukisiro womeva yamururu, ourunga, enyando rotjimariva, nozondjito zotjitandi

3. Omakorero wovizeze, Enyando rotjimariva, Ourunga: Jehova Mukuru ka kora ovizeze. (Titus 1:2, EEP) Ovandu mbe vanga omaitaverero we va sokuyepa omakorero wovizeze. (Omiano 6:16-19; Ovakolose 3:9, 10) Omyano avihe vyenyando rotjimariva vya hwangwa i oukorokope. Ku nai, Ovakriste kave kara norupa mu kangamwa enyando rotjimariva tjimuna oulotteries, ovikara vyoukambe nenyando ndi isanewa bingo. (Ovaefese 5:3-5) Nu imba Ovakriste kave sokuvaka. Owo kave randa oviṋa vyourunga amave tjiwa poo okutoora oviṋa nokuhina ousemba.—Eksodus 20:15; Ovaefese 4:28.

4. Omapindi, Ozondjito zOtjitandi: Omapindi nge hinomeritjaerero ye twara kondjito zotjitandi. (Genesis 4:5-8) Omundu omundandi kamaa rire epanga raMukuru. (Epsalme 11:5; Omiano 22:24, 25) Oposyo okutjita ongore poo okuyarura ouvi kouvi ovakwetu mbu ve tu tjiti.—Omiano 24:29; Ovaroma 12:17-21.

5. Omarovero nOurozi: Ovandu ve yenda kozombepo ozohamunika kokutja ve ka rore okuverukisa omitjise. Varwe ve rova ovanavita vawo kokutja ve vere poo okuvezepa. Omasa kongotwe omaungurisiro inga ayehe oSatana. Ku nai, Ovakriste otji ve ha sokukara norupa mu kangamwa vya imbi. (Deuteronomium 18:9-13) Okukara popezu naJehova oondjamo ombwa ndja rora okukara ko ku imba mbu mave tu rovo.—Omiano 18:10.

6. Omapurukisiro i omeva wamururu: Opo ka posyo okunwa omavinu omaṱiṱi, ombira poo omeva wamururu warwe. (Epsalme 104:15; 1 Timoteus 5:23) Nungwari omanwino wa tjinene nomapurukisiro womeva wamururu ye ri navi komurungu waMukuru. (1 Ovakorinte 5:11-13; 1 Timoteus 3:8) Okunwa tjinene okuvi kouveruke woye nu maku yenene okuhaṋa eṱunḓu roye. Oko wina maku yenene ku tjita kutja omarorero yeku kambure hakahana poo kamanga.—Omiano 23:20, 21, 29-35.

7. Ovandu mbe tjita oviṋa Mukuru mbye tja ovivi “kave na pu mave rumata ouhona uaMukuru.” (Ovagalate 5:19-21, EEP) Indu ove tjiri tjiwa suvera Mukuru nu tji movanga oku mu yorokisa, ove mo yenene okupoka komaungurisiro inga. (1 Johanes 5:3, EEP) Rihonga okutonda imbi Mukuru mbi matja ovivi. (Ovaroma 12:9) Kara pu na ovandu mbe novikaro vyokomuano waMukuru. (Omiano 13:20) Ovakriste vapamwe mba pama mave yenene okurira omburo yombatero. (Jakobus 5:14) Kombanda ya avihe, kara nomaundjiro kombatero yaMukuru okupitira mongumbiro.—Ovafilipi 4:6, 7, 13, EEP.

Copyright © 2006 Watch Tower Bible and Tract Society of Pennsylvania. All rights reserved.