Okutumbuka Ku Mukuru mOngumbiro

1. Ongumbiro omahungiriro wa ku na Mukuru momerisusuparisiro. Ove wa sokukumba ku Mukuru aruhe. Momuano mbwi otji mo yenene okukara popezu naye tjimuna kepanga esuverwa. Jehova eye omunene tjinene nomunamasa, nu pendje yanao eye u puratena kozongumbiro zetu! Ove u kumba ku Mukuru aruhe?—Epsalme 65:2; 1 Ovatesalonika 5:17.

2. Ongumbiro oyo orupa romerikotameno wetu. Ku nai, eṱe otji twa sokukumba ku Mukuru, Jehova erike. Indu Jesus tja ri kombanda yehi, eye aruhe aa kumbu kuIhe, nu kaku kangamwa omundu warwe. Eṱe twa sokutjita otjingetjo. (Mateus 4:10; 6:9) Posi yokutja, ozongumbiro zetu azehe za sokuhungirirwa mena raJesus. Ihi tji raisa kutja eṱe tu raisa ondjozikiro kotjihako tjaJesus nu kutja eṱe tu na ongamburiro mombunguhiro yotjisuta tje tjonguturiro.—Johanes 14:6; 1 Johanes 2:1, 2.

3. Eṱe tji matu kumbu, twa sokuhungira ku na Mukuru okuza momitima wetu. Eṱe katu sokukumba ozongumbiro okuza mourizemburuka wetu poo okulesa okuza membo rozongumbiro. (Mateus 6:7, 8) Eṱe matu yenene okukumba mongaro kangamwa yondengero, kangamwa indji oiri na kangamwa indwi oruveze. Mukuru nandarire u yenena okuzuva ozongumbiro zakumwi momutima wetu. (1 Samuel 1:12, 13) Oko okokuwa okupaha oruveze orupore, kokure novandu varwe okukumbira po ozongumbiro zetu zapeke.—Markus 1:35.

4. Oviṋa viṋe ove mbi u sokukumba ohunga navyo? Otjiṋa kangamwa tji matji yenene okuṱuna koupanga woye ku na ye. (Ovafilipi 4:6, 7, EEP) Ongumbiro indjo yotjihorera i raisa kutja eṱe twa sokukumba ohunga nena raJehova nondando ye. Eṱe wina matu yenene okuningira ovihepwa vyetu vyonyama okupewa, ourunde wetu okuisirwa na kombatero okupirukira omarorero. (Mateus 6:9-13) Ozongumbiro zetu aze rire zokurisuvera oveni. Eṱe twa sokukumba ohunga noviṋa mbi ri mombwaneno nonḓero yaMukuru uriri.—1 Johanes 5:14.

5. Ove mo yenene okukumba kangamwa indu omutima woye tji we ku hingi okuyandja ondangu poo okuhivirika Mukuru. (1 Ekuruhungi 29:10-13) Ove wa sokukumba indu ove tji u na omaputi nu indu ongamburiro yoye tji mai rorwa. (Epsalme 55:22; 120:1, EEP) Oko ku ri nawa okukumba ngunda au hi ya rya ovikurya vyoye. (Mateus 14:19) Jehova u tu ṋanga okukumba “aruhe.”—Ovaefese 6:18, EEP.

6. Eṱe tjinenenene matu hepa okukumba indu tjitwa tjiti ourunde ounene. Poruveze ohamukwao na indo eṱe twa sokuriheka kotjari nondjesiro yaJehova. Eṱe tjitwa hepura ourunde wetu kuye natu roro pu matu yenene okuhina ku u yarukira po rukwao, Mukuru eye “u ri kamwaha okuisira.”—Epsalme 86:5, NW; Omiano 28:13.

7. Jehova u puratena kozongumbiro zovandu ovasemba uriri. Kokutja ozongumbiro zoye ze zuvirwe i Mukuru, ove wa sokurora pu mo yenene okuhupa otja kozoveta ze. (Omiano 15:29; 28:9) Ove wa sokurira omurisusuparise tji mokumbu. (Lukas 18:9-14) Ove mohepa okukara mombwaneno na imbi ove mbi mokumbire. Ku nai ove otji mo zikamisa kutja ove u na ongamburiro nu kutja tjiri u heya imbi mbi mohungire. Orondu tji pe ri nao uriri Jehova otji ma ziri ozongumbiro zoye.—Ovaheberi 11:6, EEP.

Copyright © 2006 Watch Tower Bible and Tract Society of Pennsylvania. All rights reserved.