Omudiaboli Eye Owaṋi?

1. Embo indi “omudiaboli” ri heya omundu ngu serekarera ovizeze ovihangundu ohunga nomundu warwe. “Satana” ri heya omunavita poo omupirure. Inga oomaheya nge yandjwa komunavita waMukuru ohongora. Kotjitenga, eye wa ri omuengeli ohomonena meyuru pu na Mukuru. Posi yokutja kombunda eye ee rivara tjinene nu wa vangere omerikotameno mousemba nga ri ouini waMukuru.—Mateus 4:8-10, EEP.

2. Omuengeli ingwi, Satana, wa hungira ku na Eva mokupitira monyoka. Mokumuraera ovizeze eye wa tjita kutja Eva ma rire omuhazuva ku Mukuru. Satana ku nai wa wira imbi mbi mavi isanewa kutja “ousemba womananeno” waMukuru, poo otjihako otja Ingwi Wokombandambanda. Satana wa pirura indi kutja Mukuru u honapara momuano omusemba mouṋingandu wovakarere Ve. Satana wina wa eta omakeyakeyero indu kutja omundu kangamwa ma kara omuṱakame ku Mukuru. Mokutjita imbi, Satana we ri tjita omuini omunavita naMukuru. Motjimbe tja nao, eye wa uta okuisanewa Satana Omudiaboli.—Genesis 3:1-5; Job 1:8-11; Omavandururiro 12:9.

3. Satana u kondjisa okuwovisa ovandu kutja ve rikotamene kuye. (2 Ovakorinte 11:3, 14) Omuano umwe mbwe pukisa nawo ovandu okupitira mongamburiro yoposyo. Indu ongamburiro tji mai hongo ovizeze ohunga naMukuru, oyo tjiri i tjinda ozondando zaSatana. (Johanes 8:44) Ovandu mbe ri ouṋepo wongamburiro yoposyo moukahu mave yenene okukambura kutja owo ve rikotamena ku Mukuru uatjiri. Nungwari owo mouatjiri ve karera Satana. Eye ‘omukuru wouye mbwi.’—2 Ovakorinte 4:4.

Ongamburiro yoposyo, ourozi, ongarera kotjiwaṋa vi pukisa ovandu

4. Ourozi owo omuano warwe Satana mbwe twa nawo ovandu kehi yomasa we. Owo mave yenene okuisana ozombepo okuvevatera, okuihamisa varwe, okuuka oruyaveze poo okutjita ovihimise. Satana ongu ri omasa omahangundu kongotwe yovitjitwa imbi avihe. Okuyandja onyuṋe ku Mukuru, eṱe katu sokukara notjiṋa nourozi.—Deuteronomium 18:10-12; Oviungura 19:18, 19.

5. Satana wina u pukisa ovandu mokupitira momerivarero omanene woumuhoko nomerikotameno kovira vyopolotika. Tjiva veripura kutja otjiwaṋa poo omuhoko wawo omusemba okukapita imbi ovyarwe. Nungwari imbi kauatjiri. (Oviungura 10:34, 35) Ovandu varwe ve tara kovira vyopolotika okukutura omaputi yovandu. Mokutjita imbi, owo ve pataṋa Ouhona waMukuru. Owo ombu ri onguturiro aiyerike komaputi wetu.—Daniel 2:44.

Pirukira Satana mokukaondja komeho okurihonga ohunga naJehova

6. Omuano warwe Satana mbwe pukisa nawo ovandu okuverora nozonḓuma zourunde. Jehova u tu raera okuyepa ovitjitwa vyourunde, mena rokutja eye ma tjiwa kutja mavi tu ihamisa. (Ovagalate 6:7, 8) Ovandu tjiva mave yenene okuvanga ove okurihitisa kuna wo movitjitwa ohamukwao na imbyo. Zemburuka, kutja tji ri oSatana ngu ma vanga kutja ove u tjite oviṋa imbi.—1 Ovakorinte 6:9, 10; 15:33.

7. Satana ma yenene okuungurisa omakongorerero poo omapirukiriro okutjita kutja ove u ise Jehova. Tjiva wovasuverwa voye mave yenene okupindika mena rokutja ove mokonḓonona Ombeibela. Varwe mave yenene oku ku toka. Nungwari omuinyo woye ouni owa uṋe? Satana u vanga okukutirisa kutja ove u yandise okurihonga ohunga naJehova. Ove o yandjere kutja Satana a taare! (Mateus 10:34-39; 1 Petrus 5:8, 9) Mokupirukira Omudiaboli, ove mo yenene okupa Jehova onyuṋe noraisa kutja u karera kousemba womananeno We.—Omiano 27:11.

Copyright © 2006 Watch Tower Bible and Tract Society of Pennsylvania. All rights reserved.