Mukuru Eye Owaṋi?

1. Ovandu ve rikotamena koviṋa ovingi. Nungwari Ombeibela i tu raera kutja pe na Mukuru UATJIRI umwe erike. Eye wa mema oviṋa avihe momayuru nokombanda yehi. Eye Umwe erike ngu twa sokurikotamena ko mena rokutja we tupa omuinyo.—1 Ovakorinte 8:5, 6; Omavandururiro 4:11.

2. Mukuru u na omaisaneno wondjozikiro omengi nungwari u na ena rimwe uriri. Ena ndo oro oJEHOVA. MozOmbeibela ozengi, ena raMukuru ra isamewa, na ri pingenisiwa po i omaisaneno wondjozikiro MUHONA poo MUKURU. Nungwari Ombeibela tji ya tjangwa, ena Jehova ra munika muyo ape ovikando 7 000!—Eksodus 3:15, NW; Epsalme 83:19, EEP.

3. Jehova u na orutu, nungwari ka ru ri tjimuna indwi orwetu. Ombeibela i tja “Mukuru eje Ombepo.” (Johanes 4:24, EEP) Ombepo ondungiro yomuinyo wokombanda tjinene okukapita imbwi owetu. Kape na omundu ngwa rora okumuna Mukuru. Jehova u kara meyuru, nungwari eye u muna oviṋa avihe. (Epsalme 11:4, 5; Johanes 1:18) Hapo nungwari indji ombepo ondjapuke otjikwatjike? Oyo kamundu tjimuna Mukuru. Nungwari oyo omasa waMukuru omaungure.—Epsalme 104:30, EEP.

4. Ombeibela i vandurura oundu waJehova kweṱe. Oyo i raisa kutja ovitjuukwa vyoundu vye orusuvero, ousemba, ounongo nomasa. (Deuteronomium 32:4; Job 12:13; Jesaja 40:26; 1 Johanes 4:8) Ombeibela wina i tu raera kutja eye omunatjari, u na omunyaṋutima, u isira ondjandje nu u na omuretima. Eṱe, otja ovanatje ovananḓuviro, twa sokukondjisa oku mu horera.—Ovaefese 5:1, 2.

Eṱe tu rihonga ohunga naMukuru okuza koviutwa nokuza mOmbeibela

5. Eṱe twa sokuripetera ko poo okukumba koviserekarerwa, oviperendero, poo ovikuramenapo momerikotameno wetu? Kako! (Eksodus 20:4, 5) Jehova u tja ngatu rikotamene kuye erike uriri. Eye ke na ku haṋa ondjozikiro ye ku na kangamwa omundu poo otjiṋa. Oviserekarerwa kavina omasa oku tu vatera.—Epsalme 115:4-8, EEP; Jesaja 42:8, NW.

6. Eṱe matu yenene vi okutjiwa Mukuru nawa? Omuano umwe omokutara moviṋa mbya mema natu ripura oukoto ohunga na imbi ovyo mbi mavi tu raere. Oviutwa vyaMukuru vi tu raera kutja eye u na omasa omanene nounongo. Eṱe tu muna orusuvero rwe mu imbi avihe mbya ungura. (Epsalme 19:1-6, EEP; Ovaroma 1:20, NW) Omuano warwe mbu matu yenene okurihonga ohunga naMukuru omokukonḓonona Ombeibela. Mu yo eye u tu raera mo ovingi ohunga nokutja eye Omukuru uṋe. Eye wina u tu raera ohunga nondando ye nokutja eye u vanga kutja eṱe tu tjite tjike.—Amos 3:7; 2 Timoteus 3:16, 17.

Copyright © 2006 Watch Tower Bible and Tract Society of Pennsylvania. All rights reserved.