Pathian Biak Awk i Na Biakhiahnak

1. Pathian hawikawm pakhat si khawh awkah, Baibal biatak hngalhnak a ṭhami na ngeih awk a si (1 Timote 2:3, 4), na hngalhmi kha na zumh lai (Hebru 11:6), na sualnak naa ngaichih lai (Lamkaltu 17:30, 31), cun na nunnak lam kha naa thleng lai. (Lamkaltu 3:19) Cun Pathian na dawtnak nih amah sinah nangmah le nangmah kha i pek awk in an hruai lai. Cucu nangmah pumpak theng tein, thlacamnak in, a duhnak tuah awkah amah sinah na pum naa peknak kha na chim lai tinak a si.—Matthai 16:24; 22:37.

2. Pathian sinah naa pumpeknak na tuah hnuin, tipil cu na in awk a si. (Matthai 28:19, 20) Tipil innak nihcun nangmah cu Jehovah sinah aa pumpe cangmi pakhat na si kha mi vialte a hngalhter hna. Cucaah a upa cangmi hna ca lawng ah a si. Mi pakhat cu tipil pek a si tikah, a pum dihlak cu caan tawite chung ti chungah phum awk a si lai.*—Marka 1:9, 10; Lamkaltu 8:36.

3. Pumpeknak na tuah dih hnuah, na biakamnak he aa tlakin nung dingah Jehovah nih an ruahchan lai. (Salm 50:14; Phungchimtu 5:4, 5) Rulhreu nih Jehovah na biaknak kha ngolter awkah an zuam lai. (1 Piter 5:8) Sihmanhsehlaw thlacamnak in Pathian kha naih ko. (Filipi 4:6, 7) Ni fatein a Bia kha cawng hna. (Salm 1:1-3) Khrihfabu he fek tein i kawm. (Hebru 13:17) Hi vialte na tuahnak thawngin, Pathian sinah zumhfek tein hmunh khawhnak ṭhawnnak cu na hmuh lai. Cuticun zungzal in zungzal tiang Pathian nih an halmi thil hna kha na tuah khawh hna lai!

Hngalhchap asiloah man lak lomi chungkhar Baibal cawnnak caah a tanglei i aa tlakmi caleng hmang in Watch Tower sinah ca na ṭial khawh. Caleng

* Zungzal Nunnak ah A Hruaimi Hngalhnak, asiloah Watch Tower Bible and Tract Society nih an chuahmi mah bantuk cauk kha tipil innak caah timhlamhnak ah cawn hmasa dingin forh a si.

Copyright © 2011 Watch Tower Bible and Tract Society of Pennsylvania. All rights reserved.