Jehovap Nalunaajaasui qanoq aaqqissuussaasut

1. Nalitsinni upperisarsioqatigiit Jehovap Nalunaajaasui 1870-ikkunni aallartipput. Aallaqqaammut Biibilimik atuaqqissaartartunik taaneqartarput. 1931-mili taaguut Biibilimik tunngaveqartoq, Jehovap Nalunaajaasui, taaguutigilerpaat. (Jesaja 43:10, NV) Aallaqqaammut ikittunngooriarlutik ullumikkut nunani 230-nit amerlanerusuni oqaluussisartut eqiasuitsut millionilikkuutaanngorsimapput.

2. Jehovap Nalunaajaasuisa ilagiivisa amerlanersaat sapaatit-akunneri tamaasa pingasoriarlutik ataatsimiittarput. Ataatsimiinnerinut aggernissannut tikilluaqqusaavutit. (Eprîarit 10:24, 25) Ataatsimiinnerni ajoqersuutigineqartartut Biibilimik tunngaveqarput. Ataatsimiinnerit qinunermik aallarnerneqarlutillu naggaserneqartarput. Aamma ataatsimiinnerit amerlanersaanni ’erinniukkat anersaap pii’ uummammit pisumik erinarsuutigineqartarput. (Evfisumiut 5:18, 19) Iserneq akeqanngilaq, aningaasanillu katersuiniartitsisoqarneq ajorpoq. — Matîuse 10:8.

3. Ilagiit amerlanertigut naalagaaffilersaartarfimmi ataatsimiittarput. Naalagaaffilersaartarfiit illuliaapput kusassagarsuunngitsut, Jehovap nalunaajaasuinit kajumissutsiminnit sulisunit sananeqarsimasut. Naalagaaffilersaartarfinni inuusaliaqanngilaq, sanningasuleqarani tamakkuluunniit assigisaannik soqarani. Aningaasartuutit kajumissutsimit tunissutinit matussutissinneqartarput. Kajumissutsiminnit tunissuteqarusuttut nakkaatitsivinnguamut nakkartitsisinnaapput. — 2 Korintumiut 9:7.

4. Ilagiinni tamani utoqqaanertaqarpoq, imaluunniit nakkutilliisoqarpoq. Taakkua ilagiinni ajoqersuineq siuttuuffigaat. (1 Timûtiuse 3:1-7; 5:17) Ilagiinni kiffartortunit ikiorneqartarput. (1 Timûtiuse 3:8-10, 12, 13) Angutit taakkua ilagiinnut ilaasortaasunit allanit nuimanerunngillat. (2 Korintumiut 1:24) Immikkut taaguuteqartinneqanngillat. (Matîuse 23:8-10) Allanit allaanerusunik atisaqarneq ajorput. Aamma suliaminnut akissarsiaqanngillat. Utoqqaanertat kajumillutik nuannaarlutillu ilagiit anersaakkut pisariaqartitaannik isumaginnittarput. Ajornartorsiortoqaraangat tuppallersaallutillu ikiuisinnaasarput. — Jâko 5:14-16; 1 Pîtruse 5:2, 3.

5. Jehovap Nalunaajaasui aamma ukiut tamaasa ataatsimeersuartarput ataatsimeersuaarartarlutillu. Ilagiit amerlasuut katersuuttarput Biibilimut tunngasumik immikkut ilinniartinneqarniarlutik. Ataatsimeersuarnerni ajoqersukkat nutaat kuisittarput. — Matîuse 3:13-17; 28:19, 20.

6. Jehovap Nalunaajaasuisa nunarsuarmut tamarmut qullersaqarfiat New Yorkimiippoq. Tassaniipput Siulersuisoqatigiit, utoqqaanertat misilittagaqarluartut eqimattat nunarsuaq tamakkerlugu ilagiinnut siuttuusut. Nunarsuarmi tamarmi 100-nit amerlanerusunik immikkoortortaqarfeqarpoq. Tamakkunaniipput kajumissutsiminnit sulisut atuagassianik Biibililersaarutinik naqiterinermut nassiussuinermullu suleqataasut. Oqaluussineq immikkoortortaqarfinnit aaqqissuunneqartarpoq. Immikkoortortaqarfimmut qaninnerusanniittumut pulaarnissannut tikilluaqqusaavutit.

Copyright © 2008 Watch Tower Bible and Tract Society of Pennsylvania. All rights reserved.