Mba’éichapa oñeorganiza testigos de Jehová

1. Testigos de Jehová historia ag̃agua oñepyrũ 1870 riremi. Iñepyrũme oñehenoiva’ekue Estudiantes de la Biblia, ha 1931 guive oiporu téra oĩva Bíbliape, testigos de Jehová. (Isaías 43:10.) Peteĩ ñepyrũ pokãmígui, pe organización okakuaa ohupyty peve heta millón opredicáva Ñandejáragui 230 tetã rupi.

2. Testigo de Jehová congregacionkuéra ijaty jepi tres veces cada semana. Nde avei ikatu reho umi reunionhápe. (Hebreos 10:24, 25.) Enseñanza oñeme’ẽva upépe oñeguenohẽ Bíbliagui. Oñepyrũ ha opa umi reunionkuéra peteĩ oraciónpe, ha upépe opurahéi jepi hikuái “purahéi Ñandejára rehegua” isincérova. (Efesios 5:18, 19, NM.) Upépe ikatu oike oimeraẽva ha ndojejapói colecta. (Mateo 10:8.)

3. Opavavenunga congregacionkuéra oguereko reunión Salón del Réinope. Umi Salón del Reino ha’e jepi peteĩ construcción isencíllova Testigokuéra voi omopu’ãva ojehepyme’ẽ’ỹre hembiapóre. Upépe nderehechamo’ãi ta’anga, kurusu ni mba’eve umichagua. Umi gasto ojeguerekóva ojepaga voluntariamente. Ome’ẽséva viru omoĩkuaa peteĩ caja de contribuciónpe. (2 Corintios 9:7.)

4. Oĩháme congregación oĩ avei ancianos, térã superintendentes, omotenondéva enseñanza oñeme’ẽva upépe. (1 Timoteo 3:1-7; 5:17.) Chupekuéra oipytyvõ umi siervos ministeriales. (1 Timoteo 3:8-10, 12, 13.) Ha’ekuéra noñemomba’eguasúi congregación ári. (2 Corintios 1:24.) Noñeme’ẽi chupekuéra mba’eveichagua título. (Mateo 23:8-10.) Ha’ekuéra oñemonde hapichakuéra oñemondeháichante avei. Noñeme’ẽi avei chupekuéra viru hembiapóre. Ancianokuéra oñangareko kyre’ỹme pe necesidad espiritual oguerekóva congregacionkuéra. Ome’ẽ hikuái consuelo ha dirección oĩ jave problema. (Santiago 5:14-16; 1 Pedro 5:2, 3.)

5. Testigos de Jehová oguereko avei cada año heta asamblea tuicháva. Umi asambléape ijaty heta congregacionkuéra ohendu hag̃ua peteĩ programa especial oñerenohẽva Bíbliagui. Umi asamblea jave ojebautiza avei temimbo’ekuéra pyahu. (Mateo 3:13-17; 28:19, 20.)

6. Central oguerekóva testigos de Jehová oĩ Nueva Yórkpe. Upépe oĩ Cuerpo Gobernante, kóva ha’e peteĩ grupo de ancianos oisambyhýva heta árama congregacionkuéra oparupigua. Avei, ko Yvy jerére oĩ cien rasami sucursalkuéra. Umi voluntario omba’apóva upe rupi oipytyvõ ojejapo ha oñemondo hag̃ua kuatiañe’ẽ Biblia rehegua. Upégui avei oñeorganiza predicación ojejapóva opárupi. Mba’érepa nereg̃uahẽmíri reikuaa hag̃ua peteĩ sucursal hi’ag̃uivéva nde rógagui?

Copyright © 2006 Watch Tower Bible and Tract Society of Pennsylvania. All rights reserved.