Mba’éicha ikatu ñañemboja Ñandejárare ñembo’épe

1. Ñembo’e he’ise ñañe’ẽ humildemente Ñandejára ndive. Ñañembo’e py’ỹi va’erã chupe. Jajapórõ upéicha, ñañandúta ñaimeha ijykére peteĩ amigo ñanderayhúvaicha. Tuicha ha imbaretérõ jepe Jehová, ohendu ñane ñembo’e. Ndépa reñembo’e py’ỹi Ñandejárape? (Salmo 65:3 [65:2, NM ]; 1 Tesalonicenses 5:17.)

2. Pe ñembo’e oike avei ñande adoraciónpe. Upévare, Ñandejára Jehová añoitépe ñañembo’eva’erã. Oĩrõ guare Jesús ko Yvy ári, oñembo’e mante itúvape, chupe añoite. Ñande avei jajapova’erã upéicha. (Mateo 4:10; 6:9.) Pero ñañembo’e katuete va’erã Jesús rérape. Upéicha jahechauka jarrespetaha Jesúspe ha jaguerekoha fe omano hague ñanderehe. (Juan 14:6; 1 Juan 2:1, 2.)

3. Ñañembo’évo Ñandejárape, ñañe’ẽva’erã chupe ñane korasõite guive. Naiporãi jaiporu umi ñembo’e jaguerekómava ñane akãme térã ñamoñe’ẽva kuatiágui. (Mateo 6:7, 8.) Ikatu oimeraẽ ára ñañembo’e, oimehápe ha oimeháicha jahechauka guive respeto Ñandejárape. Ñandejára ohendu ñane ñembo’e jajapórõ jepe kirirĩháme, ñane korasõme. (1 Samuel 1:12, 13.) Ñañembo’évo ñandéve g̃uarãnte, iporã ñaime ndaiporihápe ayvu ha ñaneñohápe. (Marcos 1:35.)

4. Mba’e mba’érepa ikatu reñembo’e? Ikatu reñembo’e oimeraẽ mba’ére ikatuva’erã nemoĩ porãve Ñandejárandi. (Filipenses 4:6, 7.) Pe ñembo’e oñehenóiva padrenuestro ohechauka iporãha ñañembo’e Jehová réra ha ipropósitore. Ikatu avei jajerure tome’ẽ ñandéve umi ñaikotevẽva, tomboyke ñande pecado ha tañanepytyvõ ani hag̃ua ja’a tentaciónpe. (Mateo 6:9-13.) Ñañembo’évo naiporãi ñande egoísta. Jajerureva’erã umi mba’e oĩ porãva Ñandejára voluntad ndive. (1 Juan 5:14.)

5. Oimeraẽ ára hi’ã jave ne korasõme ikatu reñembo’e reme’ẽ hag̃ua agradecimiento térã alabanza Ñandejárape. (1 Crónicas 29:10-13.) Ani reheja ñembo’e rejejopy vai jave ha rehechárõ ojetyvyro pe fe reguerekóva. (Salmo 55:23 [55:22, NM ]; 120:1.) Iporã avei ñañembo’e jakaru mboyve. (Mateo 14:19.) Jehová he’i ñandéve: “Peñembo’e opa ára”. (Efesios 6:18, JMP.)

6. Ja’áramo peteĩ pecado guasúpe, katuete ñañembo’e ha jajerureva’erã Jehovápe ñandeporiahuvereko ha ñaneperdona hag̃ua. Ñandejára ‘oĩ ñane perdona hag̃ua’ ñamombe’úma guive chupe ñande pecado ha ñañeha’ãmbaitérõ ani hag̃ua ja’a jey. (Salmo 86:5, NM; Proverbios 28:13.)

7. Jehová ohendu umi hekopotĩva ñembo’e añoite. Ohendu hag̃ua ne ñembo’e, reñeha’ãmbaiteva’erã reiko Ñandejára ley he’ívare. (Proverbios 15:29; 28:9.) Reñembo’évo, ne humilde va’erã. (Lucas 18:9-14.) Ne rembiapo rupi ojehechava’erã rejaposeha pe rejeruréva Ñandejárape. Upéicha ojekuaáta reguerekoha fe ha ne sinceroha reñembo’évo. Upe rire añoite Jehová ome’ẽta ndéve pe rejeruréva. (Hebreos 11:6.)

Copyright © 2006 Watch Tower Bible and Tract Society of Pennsylvania. All rights reserved.