Mba’épa ha’e Ñandejára Reino?

1. Jesús oĩrõ guare ko Yvy ári, ombo’e umi hendive oĩvape tojerure ñembo’épe ou hag̃ua Ñandejára Reino. España ñe’ẽme reino he’ise gobierno omoakãva peteĩ rey. Ñandejára Reino ha’e peteĩ gobierno ijojaha’ỹva. Yvágape oĩ henda ha upégui oisambyhýta ko Yvy. Osantificáta Ñandejára réra. Pe Reino rupi ojejapóta Ñandejára oipotáva Yvy ári yvágape ojejapoháicha. (Mateo 6:9, 10.)

2. Ñandejára oprometeva’ekue Jesús ha’etaha Rey Ñandejára Réinope. (Lucas 1:30-33.) Oĩrõ guare Jesús ko Yvy ári, ohechaukava’ekue ha’etaha peteĩ gobernante ipy’aporãva, ijústo ha iperféctova. Ojevýrõ guare yvágape, noñepyrũi upe jave ogoberna Ñandejára Reino. (Hebreos 10:12, 13.) Og̃uahẽvo 1914, Jehová ome’ẽ Jesúspe autoridad oprometeva’ekue chupe. Upe guive, Jesús ha’e Rey ogobernáva yvágape. (Daniel 7:13, 14.)

3. Jehová avei oiporavo ko Yvýgui kuimba’e ha kuña iñe’ẽrendúva oho hag̃ua yvágape. Ko’ã persona ogobernáta Jesús ykére, rey, juez ha sacerdóteicha. (Lucas 22:28-30; Revelación 5:9, 10.) Jesús ohenói ko’ã omoirũtava chupe irréinope “rebaño michĩva”. Ohupyty hikuái 144.000. (Lucas 12:32, NM; Revelación 14:1-3.)

4. Oñepyrũvo Jesús oisambyhy, omosẽ yvágagui Satanás ha umi ángel añápe ha opoi chupekuéra ko Yvy jerére. Upévare 1914 guive hetaiterei mba’e vai oiko ko Yvy ape ári. (Revelación 12:9, 12.) Guerra, ñembyahýi, peste, teko aña opárupi..., umi mba’e ojehúva ha’e peteĩ “señal” ohechaukáva Jesús oñepyrũmaha ogoberna, ha ko sistema og̃uahẽmaha hi’ára pahápe. (Mateo 24:3, 7, 8, 12; Lucas 21:10, 11; 2 Timoteo 3:1-5.)

5. Ko’ẽrõite Jesús oguerúta peteĩ juicio opavave ári, ha omboykéta chupekuéra ojapoháicha peteĩ pastor omboykérõ ovecha kavarágui. Ha’e oguerekóta “ovecha” ramo umi iñe’ẽrenduva’ekue chupe, ha ome’ẽta chupekuéra jeikove opa’ỹva ko Yvy ári. “Kavara” katu ha’éta umi omboykeva’ekue Ñandejára Reino. (Mateo 25:31-34, 46.) Jesús ohundipa potaite umi ikavara rekóvape. (2 Tesalonicences 1:6-9.) Reikosérõ Jesús “ovecha” ramo, rehenduva’erã pe mensaje Reino rehegua ha rejapo upe he’íva. (Mateo 24:14.)

Jesús gobierno guýpe ojeipáta py’aro ha joayhu’ỹ

6. Ko Yvy oñemboja’o heta tetãme ha opavave oguereko peteĩ gobierno. Umi tetã oñorairõ jepi oñondive. Ñandejára Reino katu oipe’apáta umi yvypóra gobierno ha opytáta hekovia. Ha’eñoite oisambyhýta ko Yvy tuichakue. (Daniel 2:44.) Upérõ ndaiporimo’ãvéima guerra, jejuka ha ñorairõ. Opa tapicha oikóta py’aguapýpe oñondivepa. (Miqueas 4:3, 4.)

7. Jesús Reinado Milenario aja, umi tapicha ojapova’ekue Ñandejára he’íva ohupytýta perfección ha Yvy tuichakuégui oikóta peteĩ vy’arenda. Og̃uahẽvo hu’ãme pe mil años Jesús ojapopátama Ñandejára oipotava’ekue. Upe rire ome’ẽta pe Reino Itúvape (1 Corintios 15:24.) Mba’érepa neremombe’úi Ñandejára Reino ojapótava umi ne amigokuérape ha nde rogayguápe?

Copyright © 2006 Watch Tower Bible and Tract Society of Pennsylvania. All rights reserved.