Mba’e propósitopa oguereko Ñandejára ko Yvýpe g̃uarã?

1. Jehová ojapo ko Yvy yvyporakuéra ovy’a hag̃ua ipype eternamente. Ha’e oipotava’ekue oiko hi’ári tapichakuéra horýva ha ijústova. (Salmo 115:16; Isaías 45:18.) Yvy noñehundimo’ãi araka’eve; opytava’erã eternamente. (Salmo 104:5; Eclesiastés 1:4.)

2. Ojapo mboyve yvypórape, Ñandejára oiporavo ko Yvýgui peteĩ tenda michĩmi, ojapo chugui peteĩ vy’arenda iporãitereíva ha ohenói “jardín de Edén”. Upépe omohenda pe kuimba’e ha kuña ojapova’ekue iñepyrũme: Adán ha Eva. Ñandejára oipotava’ekue ita’ýra heta ha omyenyhẽ ko Yvy. Mbeguekatúpe ojapova’erãmo’ã hikuái peteĩ paraíso ko Yvy tuichakue rehe. (Génesis 1:28; 2:8, 15.)

Paraíso oñehundiva’ekue

3. Adán ha Eva ho’a pecádope omboykégui Ñandejára ley, oikuaa porãrõ jepe. Upe haguére, Jehová omosẽ chupekuéra jardín de Edéngui, ha oñehundi pe paraíso. (Génesis 3:1-6, 23.) Upevére Jehová ndahesarái ipropósitogui ko Yvýpe g̃uarã. Ha’e opromete ojapotaha ko Yvýgui peteĩ paraíso oiko hag̃ua tapichakuéra opa ára g̃uarã. Mba’éichapa ojapóta Ha’e upéva? (Salmo 37:29.)

4. Oiko mboyve ko Yvýgui peteĩ vy’a renda, oñehundipava’erã umi iñañáva. (Salmo 37:38.) Upéva oikóta Armagedónpe, ha’evahína Ñandejára guerra oipe’a hag̃ua opa mba’e vai. Upe rire oñembotýta Satanáspe mil áñore, upéva he’ise ndopytamo’ãiha avave iñañáva ombyai hag̃ua ko Yvy. Opytáta Ñandejára pueblo añoite. (Revelación 16:14, 16; 20:1-3.)

5. Upéramo Jesucristo ogobernáta Yvy mil áñore (Revelación 20:6) ha mbeguekatúpe oipe’áta ohóvo pecado ñane akã ha ñande retégui. Oikóta ñandehegui yvypóra perfecto, ha’ehaguéicha Adán ha Eva ho’a mboyve pecádope. Upéramo g̃uarã opáta mba’asy, tuja ha ñemano. Umi hasýva okueráta ha itujáva ipyahu jeýta. (Job 33:25; Isaías 33:24; Revelación 21:3, 4.)

6. Oisambyhy aja Jesús mil áñore, umi tapicha heko potĩva omba’apóta ojapo hag̃ua Yvy tuichakuégui peteĩ paraíso. (Lucas 23:43.) Avei hetaiterei omanova’ekue oñemoingove jeýta oiko hag̃ua Yvy ape ári. (Hechos 24:15.) Ojapórõ Ñandejára ojeruréva chuguikuéra, opytava’erã oiko hag̃ua opaite ára g̃uarã ko Yvy ári. Ndojapóirõ upéicha, omanoitéta hikuái. (Juan 5:28, 29; Revelación 20:11-15.)

7. Upéicha og̃uahẽta hu’ãme Ñandejára propósito ko Yvýpe g̃uarã. Hi’ãpa ndéve rehupyty umi mba’e porã? Upéicharamo, reikuaaveva’erã Jehovágui ha rejapova’erã rehóvo pe he’íva. Reho meme va’erã reunionhápe oguerekóva umi testigo de Jehová nde róga jerére. Upéva rejapórõ tuicha nepytyvõta. (Isaías 11:9; Hebreos 10:24, 25.)

Armagedón rire, ko Yvýgui ojejapóta peteĩ paraíso

Copyright © 2006 Watch Tower Bible and Tract Society of Pennsylvania. All rights reserved.