KO’ẼRÕITÉMA
OÑEHUNDÍTA
RRELIHIÓN JAPU!

Mba’épa hína pe rrelihión japu? Nandepy’apýipa umi mba’e vai ojejapóva rrelihión rérape? Nanembopochýipa umi tapicha omoakãva gérra, terrorísmo térã korrupsión he’íramo oserviha Ñandejárape? Mba’érepa ha’ete ku rrelihióngui oúva heta provléma?

Ndaja’éi opa rrelihión upeichaha, pe rrelihión japu añónte ojapo umi mba’e vai. Jesucristo he’iva’ekue rrelihión japu hembiapo vaiha. Ha ombojojávo yvyra mátare he’i: “yvyra ivaíva katu hi’a vai” (Mateo 7:15-17).* Mba’e mba’épa ojapo rrelihión japu?

Rrelihión japu…

OIKE ÑORAIRÕ HA POLÍTIKAPE. “Asia ha heta hendápe avei, umi omoakãva rrelihión orekoségui ipoguýpe hetave mba’e ombotavy umi tapicha oserviséva Ñandejárape”, he’i pe rrevísta hérava Asiaweek. Avei he’i upévare “ko múndo itarovapotaitemaha”. Estados Unídospe peteĩ karai omoakãva rrelihión he’i: “Opa haĝua umi jejuka, ojejukapava’erã umi terrorísta”. Ha’e he’i ko mba’e: “Pejukapava’erã umíva Ñandejára rérape”. La Biblia katu he’i: “Oĩrõ he’íva: ‘Che ahayhu [Ñandejárape]’, ha upekuévo ndohayhúi hapichápe, ijapu” (1 Juan 4:20). Jesús he’iva’ekue avei: “Pehayhu umi pende rehe ija’e’ỹvape” (Mateo 5:44). Ohejápa umi rrelihión ojeho gerrahápe?

OMOSARAMBI JAPU. Heta rrelihión ombo’e jaguerekoha peteĩ álma térã espíritu omano’ỹva. Upéicha heta rrelihión oipe’a rei tapichakuéragui ipláta, okovrávo chupekuéra oñembo’e haĝua ihentekuéra omanova’ekuére. Péro la Biblia nombo’éi upéva. He’i guei: ‘Álma opekáva... upéva omanóta’ (Ezequiel 18:4, NM). “Oikovéva oikuaa omanova’erãha, omanóva katu ndoikuaái mba’eve” (Eclesiastés 9:5). Jesús ombo’eva’ekue oñemoingove jeytaha umi omanova’ekuépe, upéva noñekotevẽiva’erãmo’ã jarekórire peteĩ álma omano’ỹva (Juan 11:11-25). Ombo’épa ne rrelihión álma nomanoiha?

NDE’ÍRI IVAIHA TEKO VAI. Heta tetã rupi, oĩ rrelihión ohejáva omoakã chupekuéra kuimba’e oikóva hapicha kuimba’éndi térã kuña oikóva hapicha kuñándi. Avei ojopy mburuvichakuérape ikatu haĝua omenda hikuái. Umi rrelihión he’íva jepe teko vai naiporãiha, oheja omoakã chupekuéra umi ojavykýva mitãme. Péro, mba’épa he’i la Biblia? He’i porã: “Aníke pejejavy, umi oporoguerekóva menda’ỹ rehe, térã ta’anga omomba’eguasúva, térã omendáva ha oikóva ambue ndive, térã kuimba’e oguerekóva hapicha kuimba’épe […] ndoikemo’ãi […] Ñandejára rréinope” (1 Corintios 6:9, 10, BNP). Ndépa rehendúma oĩha rrelihión omoneĩva teko vai?

Mba’épa oikóta umi rrelihión hembiapo vaívare? Jesús he’iva’ekue: “Opa yvyra ndahi’aporãiva oñekytĩva ha oñemombo tatápe” (Mateo 7:19). Ha upéva oikóta, pe rrelihión japu oñekytĩta ha oñehundíta. Péro, mba’éichapa ha araka’épa oikóta ko mba’e? Peteĩ visión oĩva Ñandejára Ñe’ẽme, Apocalípsispe [Revelación], kapítulo 17 ha 18, omombe’u ñandéve.

Mba’éichapa oñehundíta rrelihión japu?

Epensamína rehechaha ko mba’e. Peteĩ kuña reko vai oguapýva peteĩ mymba ivaietereíva ári. Ko mymba siete iñakã ha diez hatĩ (Apocalipsis [Revelación] 17:1-4). Mávapepa orrepresenta ko kuña reko vai? Ha’e oreko ipoguýpe “mburuvicha guasu kuéra yvy ariguápe”, isái pytã, oiporu insiénso ha oreko hetaiterei mba’e. Avei, ipaje apópe ‘ombotavy opa tetãme’ (Apocalipsis 17:18; 18:12, 13, 23). La Biblia ohechauka ñandéve ko kuña reko vai orrepresentaha peteĩ aty guasúpe, oikehápe opa rrelihión hembiapo vaíva.

Pe mymba katu ha’e umi goviérno orekóva ko múndo ipoguýpe (Apocalipsis 17:10-13).^# Pe rrelihión japu oguapy hi’ári ha oñeha’ã ojapouka chupekuéra ha’e oipotáva.

Péro ko’ẽrõitéma oikóta peteĩ mba’e avave oha’arõ’ỹva. “Ha umi diez hatĩ, ha upe [mymba ñarõ] voi ndocha’emo’ãi pe kuña reko vaíre; ombyaíta ichupe oheja peve opívo; ho’úne pe ho’o ha ohapýne ichupe tatápe” (Apocalipsis 17:16, JMP). Oñeha’arõ’ỹve jave, umi goviérno opu’ãta pe rrelihión japúre ha ohundietéta chupe. Mba’érepa ojapóta hikuái ko mba’e? Pe lívro Apocalipsis omombe’u ñandéve: “[Ñandejára] omoĩ chupekuéra ipy’ápe ojapo haĝua pe ha’e oipotáva” (Apocalipsis 17:17). Upeichaite, Ñandejára ombohováita pe rrelihión japúpe hembiapo vaikuére. Ha omoĩta hustísia oiporúvo umi polítiko ohundi haĝua pe kuña reko vaípe.

Mba’épa rejapova’erã ani haĝua nderupyty pe oikótava rrelihión japúre? Ñandejára he’i: ‘Pesẽ chugui, peẽ chemba’éva’ (Apocalipsis 18:4). Upeichaite hína, ko’áĝa ñasẽva’erã rrelihión japúgui. Péro, mamo piko ikatu jaha? Ani jaha umi he’íva Ñandejára ndaiporiha rapykuéri, ha’ekuéra oñehundíta avei (2 Tesalonicenses 1:6-9). Jaikove haĝua jahekava’erã pe rrelihión añetéva. Mba’éichapa ikatu jatopa?

Mba’éichapa jatopáta pe rrelihión añetéva

Mba’e iporãvapa ojekuaava’erã rrelihión añetévare? (Mateo 7:17.)

Rrelihión añetéva…

OHECHAUKA MBORAYHU. Umi oservíva Ñandejárape ‘ndojehe’ái ko múndore’, ndoikovaíri irrása térã ikostúmbre rehe, ‘ojoayhu’ katu hikuái (Juan 13:35; 17:16; Hechos 10:34, 35). Ojojukarangue, oĩ omano haĝuáicha hapichakuéra rehehápe (1 Juan 3:16).

OJEROVIA ÑANDEJÁRA ÑE’ẼRE. Ombo’erangue yvypóra ‘omoĩvante ojejapo haĝua’, rrelihión añetéva ombo’e la Biblia he’íva (Mateo 15:6-9). Mba’érepa? ‘Ñandejára Ñe’ẽ niko henyhẽ ipu’akágui, ha iporã ñambo’e ha ñañemoñe’ẽ haĝua ñande rapichápe, japorohekombo’e ha ñaporomoarandu haĝua hekopete’ (2 Timoteo 3:16).

OIPYTYVÕ OJEIKO PORÃ HAĜUA OGAPÝPE HA OMOMBA’E TEKO POTĨ. Rrelihión añetéva ombo’e menakuérape ‘ohayhu haĝua hembirekópe, ha’ekuéra ojehayhuháicha ijupe voi’, oipytyvõ tembirekokuérape ‘omomba’e haĝua iménape’, ha mitãnguéra iñe’ẽrendu haĝua ituvakuérape (Efesios 5:28, 33; 6:1). Avei umi omoakãva heko potĩ va’erã (1 Timoteo 3:1-10).

Oĩpa peteĩ rrelihión ojapóva ko’ã mba’e? Pe lívro hérava Holocaust Politics, osẽva’ekue 2001-pe, he’i: “Heta tapicha oikórire testigos de Jehová ombo’e ha oikoháicha, ndoikoiva’erãmo’ã pe Holocausto [umi nazi ojukárõ guare hetaite hudíope Segunda Guerra Mundial aja], ha ko múndope ndaiporiva’erãmo’ã jejuka guasu”.

Upéicha, testigos de Jehová oĩva 235 tetãme ndaha’éi opredikánteva la Biblia he’íva, oiko avei upépe he’iháicha. Iporãiténepa rejeruréramo chupekuéra tanepytyvõ reikuaa haĝua mba’éichapa Ñandejára oipota ñamomba’eguasu chupe. Ko’áĝa jajapova’erã ko mba’e. Aníke reha’arõ upearã. Ko’ẽrõitéma oñehundíta rrelihión japu! (Sofonías 2:2, 3.)

*  Ñandejára Ñe’ẽ ojeporúva ko kuatiañe’ẽme Sociedad Bíblica Paraguaya, upeicha’ỹrõ Buenas Nuevas para el Paraguay, Versión Popular, BNP, Jesucristo Marandu Porã, JMP (grafía y gramática actualizadas) ha Traducción del Nuevo Mundo de las Santas Escrituras, NM.

^#  Reikuaa porãve haĝua ko mba’e, ikatu rehecha pe folléto Peñatende porãke peikóvo!, páhina 12 ha 13, omosarambíva testigos de Jehová.