Ko Na Kanga Ni Kunea te Aro ae Koaua?

1. E katea te Aro ni Kristian ni koaua ae tii teuana Iesu. Mangaia are, ni boong aikai, e riai n tii teuana te rabwata ke te botaki, ae kaainaki irouia taan taromauria Iehova ae te Atua n te koaua. (Ioane 4:23, 24; I-Ebeto 4:4, 5) E reirei te Baibara, bwa tii tabeman aomata aika a toua te kawai ae wariki, ae nakon te maiu.—Mataio 7:13, 14.

2. E taetae ni burabetiaki n te Baibara, bwa imwin mateia abotoro, a na moanna n rin reirei aika kairua ao katei aika a aki boraoi ma te onimaki ni Kristian, nako nanon te ekaretia ni Kristian. Aomata, a na kairiia nako taan onimaki, bwa taan rimwiia, ao tiaki n rimwin Kristo. (Mataio 7:15, 21-23; Mwakuri 20:29, 30) Ibukin anne, ti nori Aaro aika mwaiti aika kakaokoro, aika a bane n taku bwa Kristian ngaiia. Ti na kanga ni kinaia Kristian ni koaua?

3. Te kanikina ae moan te kakannato ibukia Kristian ni koaua, bon te itangitangiri ni koaua imarenaia. (Ioane 13:34, 35) A aki reireiaki bwa ana iangoia i bon irouia bwa a raoiroi riki nakoia aomata aika a kaokoro aia reeti ke kuniia. Ao a aki reireinaki naba ribaakia aomata man aaba tabeua. (Mwakuri 10:34, 35) Mangaia are a aki irii taiani buaka. A tabeakinia raoi Kristian ni koaua bwa kaanga tariia ao mwaaneiia.—1 Ioane 4:20, 21.

A itangitangiri imarenaia Kristian ni koaua, a karinea te Baibara, ao a tataekina Ana Tautaeka N Uea te Atua

4. Te kanikina ibukin te Aro ae koaua teuana riki, bon karinean te Baibara irouia kaaina. A kakoaua te Baibara bwa Ana Taeka te Atua, ao a kakoaua ae taekinaki inanona. (Ioane 17:17; 2 Timoteo 3:16, 17) E kakawaki riki Ana Taeka te Atua irouia, nakon iango ao katei n aomata. (Mataio 15:1-3, 7-9) A kataia ni kaboraoi maiuia ni katoa bong ma ana reirei te Baibara. Mangaia are, a aki taekina te rongorongo teuana ma ni karaoa te bwai ae kaokoro ma ae a taekinna.—Tito 1:15, 16.

5. E riai n neboa aran te Atua, te Aro ni koaua. (Mataio 6:9) E kaotiota aran te Atua ae Iehova, nakoia aomata Iesu. A riai ni katotonga arona anne, Kristian ni koaua. (Ioane 17:6, 26; I-Rom 10:13, 14) Antai kaain am kaawa aika a tataekina aran te Atua nakoia aomata tabemwaang?

6. A riai n tataekina Ana Tautaeka n Uea te Atua Kristian ni koaua. Ngaia anne are e karaoia, Iesu. E aki toki n taetae ibukin te Tautaeka N Uea. (Ruka 8:1) E tuangia ana reirei bwa a na tataekina te rongorongo aio n aaba nako. (Mataio 24:14; 28:19, 20) Kristian ni koaua, a kakoaua bwa tii Ana Tautaeka n Uea te Atua ae na karekea te rau ao te mweeraoi nakon te aonnaba aei.—Taian Areru 146:3-5.

7. A riai n raurenako ma te aonnaba ae buakaka aei ana reirei Iesu. (Ioane 17:16) A aki reitaki ma tautaeka n te aonnaba aei ke aia kauntaeka natannaomata. A rawa nakon aroaro, katei ao iango aika a buakaka, aika a rangi ni bwainaki n te aonnaba ngkai. (Iakobo 1:27; 4:4) Ko kinaa te botaki n Aro n am tabo, ae iai irouna kanikinaean te Aro ni Kristian ni koaua aikai?

Copyright © 2006 Watch Tower Bible and Tract Society of Pennsylvania. All rights reserved.