Kaotan Karinean te Maiu ao te Raraa

1. Iehova bon Aan te Maiu. Mwiokoni maiuni bwaai aika maiu ni kabane, e mena iroun te Atua. (Taian Areru 36:9) E tabu te maiu iroun te Atua. E kakawaki naba iroun Iehova maiun te tei ae tuai ni bungiaki ae mena inanon biroton tinana. E bure imatan te Atua, kamatean te merimeri ae tabe n rikirake n aron anne.—Te Otinako 21:22, 23; Taian Areru 127:3.

Ibukin kakukureian nanon te Atua, ti riai n rawa nakon karinan te raraa, mwaan aika kamwara, ao mwakuri aika aki riai, aika a kona ni karika te kabuanibwai

2. A kataia ni kararoai kabuanibwai, Kristian ni koaua. A kawakini raoi aia kaa ao aia auti bwa a rawa ni karika te kabuanibwai iai. (Te Tua-Kaua 22:8) Ana toro te Atua, a aki karaoa aekan takaakaro ke aro ni kaki botu aika kona ni karika te kabuanibwai nakoiia. Mangaia are a aki ira karaoan takaakaro aika tiritiri aika a kona n ikoaki iai, aomata tabemwaang. A rawa ni mataku n aro ni kaki botu aika kaunga te tiritiri.—Taian Areru 11:5; Ioane 13:35.

3. A tabu naba maiuia maan iroun te tia Karikibwai. E kona n tiringia maan te Kristian ibukin kanana ke kunnikaina, ke ibukin kawakinan maiuna ke kararoan te aoraki. (Karikani Bwaai 3:21; 9:3; Te Otinako 21:28) Ma e bure karaoan mwakuri n iowawa nakoia maan, ke te takaakaro n tiringia maan.—Taeka N Rabakau 12:10.

4. A aki moko Kristian, a aki bwaronriaa te betel nut, ao a aki kabonganai drug ni kaki botuia iai. A bure mwaan aikai ibukina bwa (1) a kaauunganira, (2) a urua rabwatara, ao (3) a kamwara. (I-Rom 6:19; 12:1; 2 I-Korinto 7:1) E kona n rangi ni kanganga kakean mwaan aikai. Ma ti riai ni kaki mwaan aikai ngkana ti na kakukureia nanon Iehova.

5. E tabu naba te raraa imatan te Atua. E taku te Atua bwa te taamnei, ke te maiu, e mena n te raraa. Mangaia are, e bure kanakin te raraa. E bure naba kanakin irikon te maan ae e tuai ni katinakoaki raraana n te aro ae riai. E aki riai ni kakanaki te man ae e koonaki roroana, ke ae mate n te kai ni kabwaru. E riai ni waekoa ni katinakoaki raraana ngkana e teke n te kainiwai ke e katiiaki, ngkana e na kanaki.—Karikani Bwaai 9:3, 4; Nakoaia Ibonga 17:13, 14; Mwakuri 15:28, 29.

6. E bure naba kariaian karinan te raraa? Uringnga, e tua Iehova bwa ti na rarawa nakon te raraa. Nanon aei, bwa ti aki riai ni karina raraaia aomata inanora, ke bon raraara ae kaman anaaki man rabwatara, ma ni kawakinaki n te tabo teuana. (Mwakuri 21:25) Mangaia are Kristian ni koaua, a na aki butimwaea karinan te raraa. A na butimwai aekan bwainaoraki tabeua, n aron karinakin bwaai tabeua aika akea te raraa inanoia. A tangiria ni maiu, ma a na aki kataia ni kamaiuiia n te aro ae a urua ana tua te Atua.—Mataio 16:25.

Copyright © 2006 Watch Tower Bible and Tract Society of Pennsylvania. All rights reserved.