Koaua ao Katei Aika A Aki Kakukureia te Atua

Tiaki te Temanna-n-teniman te Atua

1. A aki kairua koaua ao katei ni kabane. Ma a aki kariaiakaki iroun te Atua, ngkana a moan riki mairouia Aaro aika kewe, ke a bobuaka ma ana reirei te Baibara.—Mataio 15:6.

2. Te Temanna-n-teniman: Bon te Temanna-n-teniman Iehova—teniman aomata inanon te Atua ae tii temanna? Tiaki! Iehova ae te Tama, bon “te Atua ae ti temanna.” (Ioane 17:3; Mareko 12:29) Natina ae Ana karimoa Iesu, ao e aan taeka iroun te Atua. (1 I-Korinto 11:3) E kakannato riki te Tama nakon te Nati. (Ioane 14:28) Tiaki te aomata te taamnei ae raoiroi; boni mwaakan te Atua ae kakamwakuri.—Karikani Bwaai 1:2; Mwakuri 2:18.

A riki man Aaro aika kewe rimoa te Kiritimati ao te Itita

Akea bukina ae a riai n taromauriaki ke ni maakaki maate

3. Te Kiritimati ao Itita: E aki bungiaki n Ritemba 25 Iesu. E bungiaki tao n Okitoba 1, ae te tai are taani kawakini tiibu, a kawakina aia tiibu itinanikun aia auti maan, n te bong. (Ruka 2:8-12) E tuai man tuangia Kristian Iesu bwa a riai ni kauringa bungiakina. Ma e tuangia ana reirei bwa a riai ni kauringa ke n ururinga matena. (Ruka 22:19, 20) Kiritimati ao kateina ni kabane, a riki mairouia Aaro aika kewe rimoa. Ai arona naba ma katein te Itita, n aron kabonganan bunimoa ao rabiti. A aki ira karaoan te Kiritimati ke te Itita Kristian n te moan tai, ao a aki karaoia naba Kristian ni koaua ni boong aikai.

4. Reke-ni-bong: Reke-ni-bong aika uoua aika a taekinaki n te Baibara, a karaoaki irouia aomata aika a aki taromauria Iehova. (Karikani Bwaai 40:20-22; Mareko 6:21, 22, 24-27) A aki ira karaoan reke-ni-bong Kristian n te moan tai. Te katei ae karaoan te reke-ni-bong, e riki man Aaro aika kewe rimoa. Kristian ni koaua, a botaki n iraorao ma n anga bwaai n tituaraoi n taai tabeua riki inanon te ririki.

5. Maakakia Maate: A aki kona ni kakamwakuri ke n namakinaba maate. Ti aki kona ni buokiia, ao a aki kona ni kumeira. (Taian Areru 146:4; Te Minita 9:5, 10) E mate te taamnei; e aki maiu nako naba imwin te mate. (Etekiera 18:4) Ma n taai tabetai, anera aika buakaka aika aranaki bwa taimonio, a baka n riki bwa taamneia maate. A bure katei ni kabane aika iai rekerekeia ma maakakia ke taromauriaia maate.—Itaia 8:19.

6. Te Kaibangaki: E aki mate i aon te kaibangaki Iesu. E mate i aon te kai ke te boua. Te taeka n Erene ae rairaki bwa “kaibangaki” ni Baibara aika mwaiti, nanona te kai ae tii te kaina. Bannan te kaibangaki, e riki mairouia Aaro aika kewe rimoa. E aki kabonganaki ke n taromauriaki te kaibangaki irouia Kristian ake a maiu rimoa. Mangaia are, ko taku bwa e raoiroi, ngkana ko na kabongana te kaibangaki n te taromauri?—Te Tua-Kaua 7:26; 1 I-Korinto 10:14.

7. Tao e na kanganga kararoakim man koaua ao katei aikai tabeua. Tao am koraki ke raoraom, a na kataia n tuangko bwa ko na aki bita am koaua iai. Ma e kakawaki riki kakukureian nanon te Atua nakon kakukureian nanoia aomata.—Taeka N Rabakau 29:25; Mataio 10:36, 37.

Copyright © 2006 Watch Tower Bible and Tract Society of Pennsylvania. All rights reserved.