Mwakuri Aika Ribaaki Iroun te Atua

1. A tangiri bwaai aika raoiroi ana toro te Atua. Ma a riai naba n reireiniia ribaakin bwaai aika buakaka. (Taian Areru 97:10) Nanon aei, bwa a na rarawa nakoni mwaan tabeua aika ribaaki iroun te Atua. Baikara mwaan aikai tabeua?

2. Te Wene ni Bure: Te wene n taanga imwain te mare, te wene ni kimoa, te wene ni bure ma maan, te karikiraa, ao te wene ni bure iroun te mwaane ma te mwaane ke te aine ma te aine, bon buure aika rawawata imatan te Atua. (Nakoaia Ibonga 18:6; I-Rom 1:26, 27; 1 I-Korinto 6:9, 10) Ngkana a tekateka n taanga aomata ma a tuai ni mareaki, a riai n raure, ke ni karekea aia mare n te tua.—Ebera 13:4.

Te Atua e ribaa te koro ni manging, te ira, te takaakaro ma te mwane, ao mwakuri aika tiritiri

3. Te Kewekewe, te Takaakaro ma te Mwane, te Ira: E aki kona ni kewe te Atua ae Iehova. (Tito 1:2) Aomata aika a tangiria bwa a na akoaki irouna, a riai n rawa ni kewe. (Taeka N Rabakau 6:16-19; I-Korote 3:9, 10) Aekan takaakaro ma te mwane ni kabane, a boto i aon te mataai ni kanibwaibwai. Mangaia are, Kristian, a aki ira karaoan aekan takaakaro ma te mwane ni kabane, n aron te tiiketi, kauaia aoti, ao te bingo. (I-Ebeto 5:3-5) A aki iraei bwaai Kristian. A aki kabooi bwaai aika a ataia bwa a iraeaki man te tabo teuana, ao a aki anai aia bwaai aomata n akea aia kariaia.—Te Otinako 20:15; I-Ebeto 4:28.

4. Te Unun, te Iowawa ae Tiritiri: Te un n akea te taubaang, e kona ni kariki mwakuri n iowawa aika tiritiri. (Karikani Bwaai 4:5-8) E aki kona n raona te aomata ae tiritiri te Atua. (Taian Areru 11:5; Taeka N Rabakau 22:24, 25) E bure ngkana ti irantanga, ke ngkana ti manga karaoa ae buakaka nakoia aomata aika a tia ni karaoi bwaai aika buakaka nakoira.—Taeka N Rabakau 24:29; I-Rom 12:17-21.

5. Tabuneakia Aomata, ao te Tabunea: Aomata tabeman, a weteia anti bwa a na kabongana mwaakaiia ibukin kamaiuaia aoraki. Tabeman, a manga tabuneaia aia kairiribai ni kaaorakiia ke ni kamateiia. Boni mwaakan Tatan ae boutokai mwakuri aikai ni kabane. Mangaia are, a aki riai ni kabonganai bwaai aikai Kristian. (Te Tua-Kaua 18:9-13) Te anga ae te kabanea n raoiroi ae ko na katanaki man tabuneakim irouia tabemwaang, ngkana ko kaaniko riki ma Iehova.—Taeka N Rabakau 18:10.

6. Te Koro ni Manging: E aki bure te moi wain, biia ke aekani moi manging tabeua, ma te taubaang. (Taian Areru 104:15; 1 Timoteo 5:23) Ma e bure kabatian te moi manging, ao te koro ni manging, imatan te Atua. (1 I-Korinto 5:11-13; 1 Timoteo 3:8) Kabatiaan te moi manging, e kona n urua marurungin rabwatam ma n aki karaua am utu. E kona ni kairiko bwa ko na waekoa ni bwaka ni kariri tabeua riki.—Taeka N Rabakau 23:20, 21, 29-35.

7. “A aki kona ni karekea uean te Atua” aomata aika kakaraoi bwaai aika taekinaki iroun te Atua bwa a buakaka. (I-Karatia 5:19-21) Ngkana te koaua bwa ko tangira te Atua ao ko tangiria ni kakukureia nanona, ko kona ni kararoako mani mwaan aikai. (1 Ioane 5:3) Reireiniko aron ribaakin bwaai aika e taku te Atua bwa a buakaka. (I-Rom 12:9) Iraorao ma aomata aika bwaini aroaro aika tangiraki iroun te Atua. (Taeka N Rabakau 13:20) A kona ni buokiko Kristian aika a ikawai n te onimaki. (Iakobo 5:14) Ao ae moan te kakawaki, onimakina buokam mairoun te Atua ae kona n reke rinanon te tataro.—I-Biribi 4:6, 7, 13.

Copyright © 2006 Watch Tower Bible and Tract Society of Pennsylvania. All rights reserved.