Aia Botaki ao Aia Mwakuri ae Katobibia te Aonnaba
IAI waaki tabeua aika a kabonganaki ibukin kairan te mwakuri n tataekina te rongorongo n aaba aika a raka nakon 230 mwaitiia, ike e a tabe ni karaoaki ngkai. Te kairiri i aon te botaki ae tabwanin e karaoaki iroun te Rabwata n Tautaeka ae e mena ni kautun te botaki, are i Brooklyn, New York. Te Rabwata n Tautaeka e kanakoia ana tia tei nakon aonon te aonnaba tabeua ni katoa ririki, bwa a na maroro ma taani mwiokoaki ni mwaangan te Totaieti ake a mena n taabo akanne. N aobitin mwaanga aikai ni kabane, bon iai te Komete ibukin te Mwaanga ae e kaainaki irouia teniman nakon itiman aomata ake a tararua te mwakuri n aaba ake a mena i aan aia kawakin. Iai taabo ni boreeti ni mwaanga tabeua, ao tabeua a kabonganai mitiin ni boreeti ake a butimwaaka. Te aba ke te tabo ae e kawakinaki irouia taiani mwaanga aikai, e bwenauaki nakon aono aika bubura, ao aono akana a bubura akanne, a manga bwenauaki nakon aono aika uarereke riki. Iai i nanon aono aika uarereke, ekaretia aika tao 20 mwaitiia. Te mataniwi ibukin te aono ae bubura, e kawari aono ake a uarereke ni kabane ake a mena n ana aono, teuana imwin teuana. Iai ruunga aika uoua aika a karaoaki ni katoa ririki ibukin aono aika uarereke. Bon iai naba te mataniwi ibukin te aono ae uarereke, ao n angiin te tai, e kawari ekaretia nako n ana aono ae uarereke, uoua te tai ni katoa ririki, ao e buokia taani Kakoaua iai bwa a na bairea ma ni karaoa te mwakuri n tataekina te rongorongo n te tabo are e mwiokoaki te ekaretia anne iai.
Te ekaretia ao ana Maneaba n Uea ae mena n ana tabo, bon nibwan waakinan tataekinan te rongorongo n am kaawa. Taabo ni mwakuri aika a mwiokoaki iai ekaretia nako a bwenauaki nakon mwaabe aika uarereke. Mwaabe aikai a tibwaki nakoia taani Kakoaua ake a na kataia ni kawariia ma n taetae ma kaain mwenga nako ake a mena ni mwaaken mwaabe aikai. Bon iai unimwaane aika a mwiokoaki ni beku tabeua n ekaretia nako, ake a kaainaki irouia taani Kakoaua aika tii tabeman mwaitiia, ke e nako riki ni karokoa tao 200 mwaitiia. Taan tataekina te euangkerio n tatabemania nako bon aomata aika kakawaki n aia botaki Ana Tia Kakoaua Iehova. Taani Kakoaua n tatabemania nako, e ngae ngkana a beku ni kautun te botaki ibukin te aonnaba, ni mwaangana, ke n taian ekaretia, ma a boni karaoa naba te mwakuri aei ae tataekinan rongorongon ana Tautaeka n Uea te Atua nakoia aomata tabemwaang.
E kanakoaki ribootin te mwakuri aei nakon kautun te botaki ibukin te aonnaba, ao e katauraoaki ma ni boretiaki mai iai te Yearbook teuana ni katoa ririki. Te ribooti aei e boretiaki naba ni katoa ririki n Te Taua-n-Tantani ae bwain Tianuare 1. Ni katoa ririki, booki aika uoua aikai a kaotii rongorongon mwiin te mwakuri ibukin te ririki, ae e karaoaki ibukin kaotiotan taekan Iehova ma ana Tautaeka n Uea rinanon Kristo Iesu. I nanon ririki aika a tibwa nako, taani Kakoaua ao aika a kan ongora aika a roko mwaitiia n tao 14,000,000, a kaea te Kauring ibukin maten Iesu ae e karaoaki ni katoa ririki. Ana Tia Kakoaua Iehova a kakabanea te mwaiti n aoa ae raka i aon 1,000,000,000 ni katoa ririki, ibukin tataekinan te euangkerio, ao e a raka riki nakon 300,000, mwaitiia aomata aika boou ake a babetitoaki. Bubua ma bubua mirion mwaitin bwaai ni wareware aika boretiaki, ake a tibwaki nakoia aomata.
|
