Kotou Fakafeofi Ki Le Atua i Le Faikole

1. Ko le faikole e ko se māsau fakapoipoi mo le Atua. E tonu ke kotou faikole tu’uma’u ki le Atua. E liliu loa a ia ko sokotou kaune’a mālie. Ko Seova e lasi ti mo makeke ’oki, kae e fakalogo ki atātou faikole! E kotou faikole tu’uma’u ki le Atua?–Pesalemo 65:2; 1 Tesalonika 5:17.

2. Ko le faikole e kau ki latātou tausi. Koia, e tonu ai ke tou faikole fa’i ki le Atua, ko Seova. I le temi leia na ma’uli ai Sesu i le kele, na faikole tu’uma’u ki lana Tamana, kae na se faikole a ia ki se tasi kese. E tonu ke toe fela’aki mo tātou. (Mateo 4:10; 6:9) Kae ko atātou faikole fuli e tonu ke fai aki le suafa o Sesu. E tou fakasā ai e tou fakapoipoi ki le tu’ulaga o Sesu ti e tou tui ki lona sakilifisio faitotogi.–Soane 14:6; 1 Soane 2:1, 2.

3. Ka tou faikole, e tonu ke tou māsau ki le Atua ki ne’a alā i lotātou loto. E se tonu ke tou ako faka’atamai ni faikole pe tou fai ni kole e lau i se tosi faikole. (Mateo 6:7, 8) E mafai ke tou faikole i le temi fuli, ti mo gāne’a fuli kae ke fakapoipoi atātou māsau ti mo atātou agaaga i na temi-la. E toe logo’i foki e le Atua a kole alā e tou fai fakalogologo i lotātou loto. (1 Samuele 1:12, 13) E mālie sakita afa se gāne’a e lāvaki ke tou faikole ai.–Maleko 1:35.

4. Ko ā a ne’a alā e kotou lava māsau kiai i akotou kole? E mafai ke kotou faikole o uiga mo ne’a fuli alā e mafai ke fakatupu veli ki lokotou vasa’a mālie mo ia. (Filipe 4:6, 7) E fakasā e le faikole faifaitaki o le Tamana e i selo, e tonu ke tou faikole o uiga mo le suafa o Seova ti mo lana fakatu’utu’u. E toe mafai ke tou toe kole ke ’aga a ia o soli mai a ne’a alā e ’aoga kia tātou i le potu fakatino, ke fakamolemole mai ki atātou agasala, ti mo tokoi mai kia tātou ke tou tau’i a le fakasala. (Mateo 6:9-13) E se tonu ke tou faikole o manatu fa’i kia tātou. E tonu ke tou faikole tafito o uiga mo ne’a alā e ano tasi mo le finegalo o le Atua.–1 Soane 5:14.

5. E le’aise temi kua fakatu’utu’u ke kotou faikole ai o fakafeta’i ti mo fakavikiviki ki le Atua, kae e fakalogo ki lokotou loto. (1 Koloniko 29:10-13) E tonu ke kotou faikole i le temi leia e kotou tau ai mo ni visia ti mo temi alā e ’asi’asi’i ai lakotou tui. (Pesalemo 55:22; 120:1) E mālie le faikole i mu’a o lakotou kakai. (Mateo 14:19) E fakaafe tātou e Seova ke tou faikole “i temi fuli.”–Efeso 6:18.

6. E ’aoga tafito ke tou faikole mo kapau na tou fai se agasala mamafa. I lakaga anā, e tonu ke tou kole mamae le manava’alofa o Seova ti mo kole ke fakamolemole mai kia tātou. Kapau e tou fakasā atātou agasala kiate ia ti mo tou faiga ke le’aise tou toe fai anā agasala-la, ko le Atua e “fakamolemole [gaofie]” kia tatou.–Pesalemo 86:5; Taagapati 28:13.

7. E fakalogo fa’i a Seova ki faikole alā a le fenua e faitotonu. Kapau e kotou loto ke fakalogo le Atua ki akotou faikole, ti e tonu ke kotou faiga makeke ke kotou mulimuli ki ana lao. (Taagapati 15:29; 28:9) E tonu ke kotou fakataulalo mokā kotou faikole. (Luka 18:9-14) E tonu ke kotou faiga ke kotou mulimuli ki ne’a alā na kotou faikole kiai. E kotou fakasā ai loa e kotou tui ti mo matala mālie ki le uiga o ne’a alā e kotou kole. Kapau e kotou fai anā ne’a, e tali loa e Seova akotou faikole.–Epeleo 11:6.

Copyright © 2006 Watch Tower Bible and Tract Society of Pennsylvania. All rights reserved.