TIMMOODE DIINA
PEWOOWA
ƁADAKE!

Ko woni diina pewoowa? A ɗon sakli bee aybeeji mbaɗaɗi daliila diina na? Teema konu, ru’bu e fowraaku, caka yimɓe wia’ata ɓe ɗon ndewa Allah, ɗum ɗon sakla ma’tirɗe adilaaku ma na? Ngam ɗume diina pewoowa warti fofoodu cakle ɗuuɗɗe?

Aybe man, naa ngam diinaaji fuu, ammaa ngam diina pewoowa tan. Huloowo Allah, o tedduɗo, Yeesu Almasiihu, tindini yoo, diina pewoowa riman kuuɗe kalluɗe, kal kal bana “lekki kalluki boo ɗon rima ɓendalooje kalluɗe.” (Matta 7:15-17) Ɓendalooje ɗume diina pewoowa rimata?

Diina Pewoowa

DIINA PEWOOWA ƊON NAASTA KARAMNBAANI NDER KONU E NDER POLITIK: “Haa Asiya bana haa pellon feere,” fodde jariida Asiaweek, “suunaaɓe baawɗe ɗon mbaɗa hulɓe Allah ƴoyre ngam nafuuda maɓɓe.” Ngam maajum, jariida Asiaweek ɗon faamtina: “Duniyaaru ɗon naata nder taparku.” Arduɗo diina feere haa Amerika wi’i: “Sey on mbara warooɓe yimɓe hiddeko barduki dara.” Dabare maako? “Mbare ɓe fuu bee innde Allah.” Ammaa, Wolde Allah ɗon wi’a: “To goɗɗo wi’i: ‘mi yiɗi Allah’, ammaa ɗon wanya deerɗum, o pewoowo.” (1 Yuhanna 4:20) Yeesu maa wi’i: “Tokke yiɗugo konne’en mooɗon.” (Matta 5:44) Diinaaji noy a tammi yimɓe maaje waɗata konu?

DIINA PEWOOWA ƊON HIBRA EKKITINOL PEWOOWOL: Diinaaji ɗuuɗi ɗon ekkitina yoo, yoŋki, malla ruuhu, ɗum tergal neɗɗo sooynde gi’eteeɗum, ki ɗon yeeɗa fahin ɓaawo maayde goɗɗo. Bee ekkitinki ki’i, ɓurna diinaaji ɗi’i ɗon nyaama riba dow yimɓe maɓɓe, ɗon ƴama ceede ngam toraago dow yoŋki maayɓe. Ammaa, Wolde Allah ɗon anndina ekkitinol feere. “Yoŋki ki waɗata hakke—kaŋki feere maaki maayata.” (Ejekiyel 18:4) “Yeedɓe anndi ɓe maayan; Ammaa maayɓe anndaa koo ɗume.” (Gaajoowo 9:5) Yeesu ekkitini yoo, maayɓe ummitan. Ɓe marataano haaje ummitineeki to yoŋki maɓɓe maayataako. (Yuhanna 11:11-25) Diina maaɗa ɗon ekkitina yoo, yoŋki maayataako na?

DIINA PEWOOWA ƊON JAƁA NJEENU: Nder lesɗe ɗuuɗe, diinaaji ɗon yerda waaldooɓe gorko bee gorko e debbo bee debbo haa ɓe laata liman’en. Ɓe ɗon ɓiɗɗa ngomna’en ngam hokkugo ɓe laawol haa ɓe ɓaŋga caka maɓɓe, gorko bee gorko e debbo bee debbo. Koo diinaaji jey jaɓataano njeenu maa ɗon jaɓa arduɓe maɓɓe njamba ɓikkoy peetel peetel. Wolde Allah boo, ɗon ekkitina ɗume? Ɗum windi laaɓɗum: “Taa on eerga. Koo daakaaje, malla rewooɓe labbi, malla jenooɓe, malla waɗooɓe ko luuti ɗabiya, malla luudu’en . . . ronataa Laamu Allah.” (1 Korintu’en 6:9, 10) A anndi diinaaji jee jaɓata njeenu na?

Haa garanɗum, ko reenata diinaaji jee ɗon rima ɓendalooje kalluɗe? Yeesu anndini: “Lekki ki rimataa ɓendalooje boɗɗe, ɓe pe’an ki, ɓe cakkinan ki nder yiite.” (Matta 7:19) Ohoo, diina pewoowa yibban e halkan! Ammaa bana noy e ndey ɗum waɗoto? Gi’ki windi nder deftere Wahayu Yuhanna, fasluuji 17 e 18, hokkan-en jaawaabu.

Bana noy diina pewoowa timmoto?

Haanu seɗɗa. Daakaareejo ɗon jooɗi dow ndabbaawa kulniiŋga. Ndabbaawa nga’a woodi ko’e joweeɗiɗi e luwe sappo. (Wahayu Yuhanna 17:1-4) Moy woni daakaareejo o’o? O mari baawɗe “dow laamiiɓe lesdi.” O ɓorni limce boɗeeje, o pawniiɗo bee kaŋgeeri e o riski masin. Fahin, ngam hiilaaji pewooji maako, ‘o esti yimɓe ummaatooje fuu.’ (Wahayu Yuhanna 17:18; 18:12, 13, 23) Wolde Allah ɗon walla-en yi’ugo yoo, daakaareejo go, ɗum kawtal diinaaji duniayaaru fuu. Ɗum, naa diina gootal tan, ammaa diinaaji jee rimata ɓendalooje kalluɗe pat.

Ndabbaawa jee daakareejo wa”i, ɗum baawɗe politik duniyaaru. (Wahayu Yuhanna 17:10-13) Diina pewoowa ɗon wa’’a haa dow ndabbaawa politik, ngam handaago iinaaji maaji e waawtugo wakere fuu.

Yeeso seɗɗa, bee non fuu, hunnde kaydiniiɗum waɗan. “Luwe sappo ɗe ngi’ɗa e ndabbaawa laddeewa, ngaynan daakaareejo oo e ɓe koosan ko o mari fuu, ɓe accan mo o tembo, ɓe nyaaman kusel ɓandu maako, ɓe kalkan mo bee yiite.” (Wahayu Yuhanna 17:16) Nder fii, bee juhuki, baawɗe politik duniyaaru fuu hippan diina pewoowa e nattidinan ngal! Ɗume yerɓata yimɓe politik haa ɓe nattidina daakaareejo go law banani? Wolde Allah ɗon jaɓa: “Allah ɗowi ɓerɗe maɓɓe haa ɓe kuuwa muuyo maako.” (Wahayu Yuhanna 17:17) Ohoo, Allah waɗan banani bee diina pewoowa ngam kuuɗe kalluɗe ngal huuwi bee innde maako. Bee adilaaku tamam, Allah huuwtiniran waaye’en maako bana kuuwtinirɗum nattere.

Noy ngaɗata to a yiɗaa hawtugo nder hakkeeji diina pewoowa? “Ngurte, onon yimɓe am,” ɗon umra nelaaɗo Allah. (Wahayu Yuhanna 18:4) Fakat, jonta ɗum saa’i wurtaago diina pewoowa! Ammaa gal toy a yahata? Taa a laata geddoowo Allah, ngam yeddooɓe Allah boo maraay garanɗum. (2 Tessaloniiki’en 1:6-9) Hisrude ɗon gootel tan, ɗum bee diina gooŋgaha. E noy heɓtugo diina gooŋgaha?

Noy heɓtugo diina gooŋgaha?

Ɓendaloore booɗre ɗume diina gooŋgaha rimata? —Matta 7:17.

Diina gooŋgaha

DIINA GOOŊGAHA ANNDITIRAN BEE YIIƊE: Sujidooɓe gooŋga’en “nastataa haalaaji duniyaaru,” ɓe cenndindiraay ngam asŋgol malla al’aada, e ɓe ɗon ‘ngiɗindira.’ (Yuhanna 13:35; 17:16; Kuuɗe Nelaaɓe 10:34, 35) Ɓe pottaay ɓe mbarindira, ammaa ɓe ngiɗindira haa jaɓugo maayugo ngam deerɗiraawo, to kaanduɗum.—1 Yuhanna 3: 16.

DIINA GOOŊGAHA ƊON HOOLA WOLDE ALLAH: Diina gooŋgaha ekkititaa “tuuknol” e “umrooje ɓe yimɓe mbaɗi bana ekkitinol,” nga ɗon darna ekkitinol maagol nder Wolde Allah, waato Bibel Allah. (Matta 15:6-9) Ngam ɗume? Ngam “ko winda nder deftere man fuu, ɗum laati bee wahayu Allah. Ɗum wallan anndingo gooŋga, e waŋginan boofi, e wo’’itingo aybeeji.”—2 Timote 3:16.

DIINA GOOŊGAHA ƊON SA’TINA SAARE E ƊON IRNA SENAARE: Diina gooŋgaha ɗon irna worɓe ngam ɓe ‘ngiɗa rewɓe maɓɓe bana ɓalli maɓɓe,’ walla rewɓe maɓɓe ngam ɓe mara ‘teddinki lugguɗum ngam worɓe maɓɓe. E ɓe ekkitina bikkoy ngam ɓe ‘ɗowtana saarooji maɓɓe.’ (Efesu’en 5:28, 33; 6:1) Fahin, kaliifa’en ɗon dooli hollaago misaalu kilaamaaku.—1 Timote 3:1-10.

Woodi diina tokkata umrooje ɗe na? Deftere Holocaust Politics, wallifi hitaande 2001, ɗon wi’a : “To yimɓe ɗuuɗɓe ɗonno tokka ko Seedooɓe Yeehova ɗon ngaaza e ɗon kuuwa, cakuki yimɓe fottaayno waɗugo e barduki yarnataano yimɓe bone nder duniyaaru.”

Hakiika, nder lesɗe 235, Seedooɓe Yeehova ngaazataa ko windi nder Wolde Allah tan. Ɓe ɗon kuuwa ko ɓe ɗon ngaaza. Min ɗon irna ma ngam a yama Seeɗooɓe Yeehova haa ɓe walla ma ekkitingo ko Allah reenata haa ma, banani, a sujidan mo bana o yiɗi. Ɗum Jonta sa’i iinaago. Taa faasitit! Timmoode diina pewoowa ɓadake! —Sefaniya 2: 2, 3.