1. Lagɔ a -gblɩnyɔ ΄kɔdɔ mɔɔ -lɛ “zuzukuzoku a ΄kifii” mɔ. Nɩkpa ΄mö “zuzukuzoku a ΄kifii” libhïnɩɛ yio ΄wʋ, ΄n ɔ nyima wa ΄nglɩ. ΄Mö wa la΄ɛ Sataa. Lagɔ a -gblɩnyɔ ΄kɔdɔ ΄mö wa ΄pää nglɩ ΄lɛ ΄sɔ -kpɔ. Lagɔzuzukwë a ma nɛnɩ a-a ΄mö ɔ glɩnɩ a-a tɛɛtɛɛdɔ΄wʋ -mä Lagɔ yɔwʋ ΄n ΄ɔ yiɛ bhabhanyɔ zʋ. Ɔ yɩbhä nɩɩ, sɛɛ nɩkpa ΄kää Lagɔ bʋbɔ, ΄mö wa nɩ bʋbɔ.— Matie 4: 8-10.
2. Tɩmɛ, ΄mö zuzukwëzokwë Sataa ghlɛnɩɛ ΄mö ΄n ΄ɔ -nyɛ Ɛɛvö ΄sɔ yiɛ bhïla. Ylʋ ɔ nɔɔ ΄n ΄ɔ yiɛ Lagɔ ΄klʋkpamö -sɛ. Lagɔ a “΄kämanɔ ΄kɔdʋʋ” ΄mö Sataa ΄yɩbhää ɔ ΄kä ΄wʋ ΄libhï, nza ɔ nʋä nɩɩ, Lagɔ ΄nɩɛ ΄kämanɩ sɛ -yi. Maa nɩkpaa ɔ ΄kämanɩɛ -gömö ɔ΄ɔɔ nʋa -li a -lii ΄wlu. ΄N Sataa yiɛ nʋ nɩɩ, mä΄ä dʋdʋ ΄wʋ a nɩkpɛ -bhlʋ a΄bhë ΄nɩɛ bhɛnɩ ɔ ΄kä Lagɔ dlɩ ΄tɛnɩ. Sa΄a sɩbhä Sataa zʋa ɔnyɩ Lagɔ ΄a -gblɩnyɔɔ ΄wʋ. Nza wa lɔɔ zuzukuzoku a ΄kifii Sataa.— Genèse 3: 1-5; Job 1: 8-11; ΄Klʋkälɩwɛlɩɩ12: 9.
3. Nɩkpa ΄mö Sataa nʋä ylʋ wa ΄kɔ bʋbɔ a za. (2Kɔlɛɛtɩ a -nʋa 11: 3, 14) Sɛ ɔ nʋä nɩkpa ylʋ
-sɩbhä ma nɩɩ: ΄Fʋ a lagɔgligbïï ΄mö Sataa ghlɛnɩɛ ΄mö ΄n ΄ɔ nʋä nɩkpa ylʋ. ΄N lagɔgligbë nɩ Lagɔ a dɔ΄wʋ nɩkpa gbëaa ΄cɩa, Sataa ΄a libhoo ΄mö a nʋä. (Zaah 8: 44) Nɩkpa -wa -wʋä -mä ΄fʋ a lagɔgligbë ΄mö, wa ΄pä -tiasɛ dlɩ nɩɩ, -tiamö a Lagɔ ΄mö wa bʋbɔ -tiamö, zɛglɛgbaa Sataa ΄mö wa bʋbɔɔ. Mɔ ‘΄kämanɩɛ mä΄ä ΄bhölɩɩ ΄mö a nɩkpa ΄wuë -gömö. 2Kɔlɛɛtɩ a -nʋa 4: 4.
 |
| ΄Fʋ a lagɔgligbïï, gukäkʋ -nyɛ ΄bhölɩ ΄wʋ tɛkpɔnɩ tɛkpɔnɛ ΄sɔ, mɩɩ dula nɩkpa. |
4. Gukäkʋ ΄mö Sataa ghlɛnɩ΄ɛ ΄mö, ΄n ΄ɔ ΄kämanɩɛ nɩkpa -gömö. -Mumuë mö zlii zɛmö wa ΄kä wanyɩ ΄wʋ ylɩɩ a za, wa ΄kä -mumuë gu ΄mö lɩbhä, ΄n wa ΄kä ΄wʋ ΄yɩbhä, wa nʋä zɩzɛ -lii. Sataa mɔɔ glɩnɩɛ mötɛɛnɩ zuzukwëzokwëa a -wʋä -li ΄la ΄wuë nimï. Zaa a -kä a ΄kä Lagɔ dlɩ yɔwʋ nɛnɩ nʋʋ, a nɩ tɩ gukäkʋ kɛ zɩ ΄lɩlɩlɩ. Deutéronome 18: 10-12; Tietiewaa a wɛlɩɩ 19: 18, 19.
5. Sataa mɔ nʋ΄ɛ nɩkpa ylʋ ΄n ΄ɔ ΄sunuä -mä, ΄n ΄wa tɛkpɔnɩɛ tenyii wanyɩ ΄wʋ. -Mä ΄bhölɩ
-gömö a politikö zɩkpöö, ΄mö wa zʋä wa dilaa -gömö. -Mumuë -tɔnɩ nɩɩ, wa ΄bhɩa mʋa kä dɛsɛ mʋa ziɛ -mumuë ΄wʋ. Maa ɛ΄ɛ -bhö -tiamö. (Tietiewaa a wɛlɩɩ 10: 34, 35) Nɩkpa -mumuë -wʋ -lɛ, -mä ΄bhölɩɩ -gömö a politikö zɩkpöö ΄mö wa ΄tɛɛnɩɛ dlɩ nzɩ yɩ kwä yɔlɔylʋ ΄mö -sɛ. ΄Wa sɛ wa nʋa da-a za, Lagɔ ΄a ΄kämanɔ -bhlʋ -kpɔ -wʋ -kanyɩɛ yɔlɔylʋ -gömö -sɛ, ΄mö wa panɩɛ -gömö.— Daniel 2: 44.
 |
| A nɩ panɩ Sataa -gömö, nzɩ a ΄kä ΄kwädlɩ Zoova yɩbhlɩnɩ. |
6. Dlɩpäsazoku ΄mö Sataa ghlɛnɩ΄ɛ ΄mö ɔ nʋä nɩkpa ylʋ. -Lizoku a nʋnʋɛ ΄nɩɛ bhɛnɩ yɩ -kanyɩ -li a -li ΄wlu nʋ, nza Zoova nʋä nɩɩ, -a nɩ tɩɩ nʋ. (Galatii a -nʋa 6: 7, 8) Nɩkpa -mumuë yɩbhä nɩɩ, a -nyʋä ΄sɔ nɩ nʋnɩ ΄nyinylolii ΄gämö. A nɩ ligba, Sataa mɔ yɩbhä nɩɩ, a nɩ nʋ -li ΄la ΄wuë.— 1Kɔlɛɛtɩ a -nʋä 6: 9, 10; 15: 33.
7. A ΄kä Zoova -gömö panɩ a za Sataa ghlɛnɩɛ -gblɩgblɛ ΄mö ɔ kanyɩ swɩ yɔwʋ ΄kuanɩ. A Biblë a ΄cɩɛcɩʋ ΄naa ΄kä -mumuë -wa kanyɩɛ dɛsɛ dlɩ yɔwʋ nɛnɩ, klɛ wa ΄kanyɩɛ yɔwʋ pänɩ. Nyɩɛnɩ
-mumuë kanyɩɛ nyɩɛnɩ. Maa -mɔ nyɩanyɩ bhä -bhölɩbhölɛ ΄nɩ? Sataa yɩbhä ɔ kanyɩ gua a ΄kä Zoova a yɩbhlɩnɩ yɩbhlɩnɛ ΄yi ΄tatinɩ. A nɩ tɩ Sataa ΄yi ΄tatinɩ ɔ tɩa ΄wlu ΄plɩ (Matie 10: 34-39; 1Piɛlɩ 5: 8, 9) ΄N a nɩ -kä Sataa nimï -sɛ, a yi Zoova ΄mäna dlɩ zɛmö ΄zʋ, mɩɩ tulanɩɛ ΄ylɩmö nɩɩ, a -wʋ ɔ ΄kämanɔ ΄kɔdʋʋ nimï ΄yize.—Proverbes 27:11. |
