Nawẹ Hiẹ Sọgan Din Sinsẹ̀n Nugbo lọ Mọ Gbọn?

1. Jesu do sinsẹ̀n Klistiani tọn nugbo dopo ai. Enẹwutu to egbehe pipli, kavi ogbẹ́, sinsẹ̀n-basitọ Jehovah Jiwheyẹwhe tọn dopo wẹ dona tin. (Johanu 4:23, 24; Efesunu lẹ 4:4, 5) Biblu plọnmẹ dọ omẹ vude lẹ poun wẹ tin to aliho bibo he planmẹ sọyì ogbẹ̀ mẹ lọ ji.—Matiu 7:13, 14.

2. Biblu ko dọ jẹnukọn dọ to okú apọsteli lẹ tọn godo, nuplọnmẹ agọ̀ po walọ he mayin Klistiani tọn lẹ po na lin biọ agun Klistiani tọn mẹ vude vude. Gbẹtọ lẹ na dọn yisenọ lẹ nado hodo yé kakati nado hodo Klisti. (Matiu 7:15, 21-23; Owalọ lẹ 20:29, 30) Enẹwutu wẹ mí do nọ mọ sinsẹ̀n voovo susu sọmọ he sọalọakọn nado yin Klistiani lẹ. Nawẹ mí sọgan yọ́n Klistiani nugbo lẹ gbọn?

3. Ohia ayidego titengbe Klistiani nugbo lẹ tọn wẹ yindọ yé tindo owanyi nujọnu tọn na ode awetọ yetọn. (Johanu 13:34, 35) Yé ma yin pinplọn nado nọ lẹndọ yé pọnte hugan gbẹtọ akọ̀ devo lẹ tọn kavi sinmẹ agbasa tọn gba. Mọjanwẹ yè ma plọn yé nado gbẹwanna gbẹtọ otò devo lẹ tọn gba. (Owalọ lẹ 10:34, 35) Enẹwutu yé ma nọ tindo mahẹ to awhàn lẹ mẹ gba. Klistiani nugbo lẹ nọ yinuwa hẹ ode awetọ yetọn lẹ taidi mẹmẹsunnu po mẹmẹyọnnu lẹ po.—1 Johanu 4:20, 21.

Klistiani nugbo lẹ nọ yiwanna ode awetọ yetọn, na sisi Biblu, podọ nọ dọyẹwheho dogbọn Ahọluduta Jiwheyẹwhe Tọn dali

4. Ohia devo heyin sinsẹ̀n nugbo tọn wẹ yindọ hagbẹ etọn lẹ tindo sisi he siso na Biblu. Yé kẹalọyi i taidi Ohó Jiwheyẹwhe Tọn bo yí nuhe e dọ sè. (Johanu 17:17; 2 Timoti 3:16, 17) Yé nọ yinuwa hẹ Ohó Jiwheyẹwhe Tọn taidi nuhe yin titengbe hugan linlẹn po aṣa gbẹtọvi tọn lẹ po. (Matiu 15:1-3, 7-9) Yé nọ tẹnpọn nado nọgbẹ̀ sọgbe hẹ Biblu to gbẹzan egbesọegbesọ tọn yetọn mẹ. Enẹwutu yé ma nọ plọnmẹ onú de podọ to whelọnu lo wà onú devo gba.—Titu 1:15, 16.

5. Sinsẹ̀n nugbo sọ dona gbògbéna oyín Jiwheyẹwhe tọn. (Matiu 6:9) Jesu hẹn yinkọ Jiwheyẹwhe tọn, yèdọ Jehovah, zun yinyọnẹn na mẹdevo lẹ. Klistiani nugbo lẹ dona wà onú dopolọ. (Johanu 17:6, 26; Lomunu lẹ 10:13, 14) Mẹnu lẹ to lẹdo towe mẹ wẹ nọ dọhó na mẹdevo lẹ dogbọn oyín Jiwheyẹwhe tọn dali?

6. Klistiani nugbo lẹ dona dọyẹwheho dogbọn Ahọluduta Jiwheyẹwhe Tọn dali. Jesu wà mọ. E nọ saba dọho dogbọn Ahọluduta lọ dali. (Luku 8:1) E degbena devi etọn lẹ nado dọyẹwheho owẹ̀n ehe dopolọ tọn to aigba lẹpo ji. (Matiu 24:14; 28:19, 20) Klistiani nugbo lẹ yise dọ Ahọluduta Jiwheyẹwhe Tọn dopo kẹdẹ wẹ na hẹn jijọho po hihọ́ nugbo po wá aigba ehe ji.—Psalm 146:3-5.

7. Devi Jesu tọn lẹ ma dona yin apadewhe aihọn ylankan ehe tọn. (Johanu 17:16) Yé ma nọ tindo mahẹ to whẹho tonudidọ aihọn tọn lẹ po gufinfọn pọmẹ tọn lẹ po mẹ gba. Yé nọ dapana walọ, walọyizan, po jijọ awugblenamẹ tọn lẹ he gbayipe to aihọn mẹ lẹ po. (Jakobu 1:27; 4:4) Be hiẹ sọgan do pipli sinsẹ̀n tọn de hia to lẹdo towe mẹ he tindo ohia sinsẹ̀n Klistiani nugbo tọn ehelẹ ya?

Copyright © 2006 Watch Tower Bible and Tract Society of Pennsylvania. All rights reserved.