ТАГЪД
МÆНГÆ ДИН ФЕСÆФДЗÆНÆЙ!

Ци æй мæнгæ дин? Дини номæй ци фуддзийнæдтæ аразунцæ, уони уингæй дæ зæрдæ нæ ресуй? Кæд рæстдзийнадæ уарзис, уæд дин зин нæй, йæхе Хуцауи лæггадгæнæг ка хонуй, етæ тугъдтæлтæ æма терроризми фудгин ке ’нцæ, е? Дини косгутæ гæртанесгутæ ке ’нцæ, уобæл нæ мæстгун кæнис? Дин уойбæрцæ бæллæхти фудгин цæмæн æй?

Еци бæллæхти динтæ сегасæй фудгин не ’нцæ, фалæ æрмæст мæнгæ дин. Йесо Киристе, æгас дуйнейи дæр кæмæн кадæ кæнунцæ, е балæдæрун кодта, мæнгæ дин йæ лæгъуз гъуддæгтæй бæрæг ке уодзæнæй, раст лæгъуз бæласа йæ лæгъуз рæзæй бæрæг куд фæууй, уотæ (Матфейи 7:15–17). Матта циавæр «лæгъуз рæзæй» бæрæг æй мæнгæ дин?

Мæнгæ дин ...

ТУГЪДТÆЛТИ АРХАЙУЙ ÆМА ЙÆХЕ ПОЛИТИКИ ТЪУНСУЙ: «Азийи æма æндæр рауæнти, алли мадзæлттæй дæр бартæ йæхемæ райсунмæ ци дини разамонгутæ архайунцæ, етæ æнæфсæрмæй пайда кæнунцæ, адæймаги Хуцауæн табу кæнун ке фæндуй, уомæй»,– финсуй еу журнал (Эйшауик). Уæдта ма бафеппайдта: «Дуйнейæн исæрра унæй тæссаг æй». Америки зундгонд дини разамонæг загъта: «Террористти гъæуй марун, цæмæй етæ мабал маронцæ». Ци фæндæ имæ ес? «Цæгъдетæ сæ Хуцауи номæй». Библи ба ци финсуй: «Уотæ ка зæгъуй: „Æз Хуцауи уарзун“, уотемæй ба йе ’нсувæрæй йæ исæфт ка уинуй, ейæ æй хийнæйдзаг» (1 Иоанни 4:20). Йесо ма уотæ дæр загъта: «Уарзетæ уе знæгти» (Матфейи 5:44). Куд дæмæ кæсуй, тугъдтæлти ка нæ архайуй, уæхæн динтæ берæ ес?

МÆНГÆ АХУРÆДТÆ ПАРАХАТ КÆНУЙ: Динтæн сæ фулдæр амонунцæ, зæгъгæ, адæймагæн ес, йæ мæлæти фæсте цæргæ ка байзайуй, уæхæн уод. Уой фæрци динти разамонгутæ сæхецæн æхца косунцæ – ка рамардæй, уони уодтæн ке исковунцæ, уой туххæй син æхца бафедунцæ. Фалæ аци ахурадæн Библийи хæццæ æппундæр еумæйагæй неци ес. «Тæрегъæд ракæнæг уод – рамæлдзæнæй» (Иезекиль 18:4). «Уодæгæстæ æй зонунцæ, ке рамæлдзæнцæ, мæрдтæ ба æппундæр неци зонунцæ» (Екклесиаст 9:5). Киристе амудта мæрдтæ ке райгас уодзæнæнцæ. Кæд адæймагæн æцæгæй æнæмæлгæ уод ес, уæд ма æй æгас кæнун ба цæмæн гъæуй (Иоанни 11:11–25). Дæуæн дæр дæ дин уобæл ахур кæнуй, æма мæлæти фæсте уод нæ рамæлуй, зæгъгæ?

ÆНÆГЪДАУ МИУТÆМÆ КÆСУЙ КУДФÆНДИЙ ЦÆСТÆЙ: Еуæй-еу бæстæти аргъауæнтæ саугинтæй исæвæрунцæ, уæхæн лæгти, æма нæлгоймæгти хæццæ æмуат ка кæнуй кенæ уæхæн силгоймæгти, силгоймæгти хæццæ æмуат ка кæнуй. Уæдта ма аргъауантæ хецауади разæнгард кæнунцæ, цæмæй уæхæн адæймæгтæн загс кæнуни барæ уа. Кæд еуæй-еу аргъауантæ ихæлд миути нихмæ æнцæ, уæддæр кудфæндий цæстæй кæсунцæ, сæ дини разамонгутæй сувæллæнттæн тухмиуæ ка кæнуй, уонæмæ. Фалæ Библи ба цæбæл ахур кæнуй? Е комкоммæ дзоруй: «Уæхе ма сайетæ: нæдæр ихæлд адæм, нæдæр мæнгæхуцæуттæн ковгутæ, нæдæр, нæлгоймæгтæ ихæлд миутæ ци нæлгоймæгти хæццæ кæнунцæ, етæ; нæдæр, нæлгоймаг уогæй нæлгоймаги хæццæ ка исхуссуй, етæ... Хуцауи Паддзахадæмæ нæ бацæудзæнæнцæ» (1 Коринфиæгтæмæ 6:9, 10). Æнæгъдау миутæмæ кудфæндий цæстæй ка кæсуй, уæхæн динтæ зонис?

Ци исони бон æнгъæлмæ кæсуй, «æмбуд рæзæ» ка хæссуй, еци динтæмæ? Йесо Киристе бафæдзахста: «Хуарз рæзæ ци бæласæбæл нæ зайуй, уой ракалунцæ æма æй арти багæлдзунцæ» (Матфейи 7:19). Аци финстмæ гæсгæ, мæнгæ дин æдуедагæ истондзæнцæ æма æй фесафдзæнцæ! Фалæ куд æма кæд уодзæнæй е? Дзуапп иссердзинан Библийи Раргомади киунуги 17 æма 18 сæрти.

Мæнгæ дин куд фесæфдзæнæй?

Дæ цæститæбæл рауайун кæнай мæнæ ауæхæн нивæ: хæтагæ силгоймаг бадуй устур тасæфтауæг сирдбæл. Еци сирдæн ес авд сæри æма дæс сикъайи (Раргомадæ 17:1–4). Ка æй еци хæтагæ силгоймаг? Йæ барæ цæуй «зæнхон паддзæхтæбæл». Йæ уæле сæнтсурх хъумацæй дарæс, пайда кæнуй хуæрздæфагитæй æма æй хъæбæр гъæздуг. Уомæй уæлдай ма йæ кæлæнти фæрци «сайуй æгас адæмихаттитæ» дæр (Раргомадæ 17:18; 18:12, 13, 23). Библи нин лæдæрун кæнуй, еци хæтагæ силгоймаг фæсномугæй ке æвдесуй дуйнейи æгас динти дæр. Е еу дин нæй, фалæ «æмбуд рæзæ» ка хæссуй, еци динтæ имæ æгасæй дæр хаунцæ.

Хæтагæ силгоймаг ци сирдбæл бадуй, е æвдесуй дуйнейи политикон хецауæдти* (Раргомадæ 17:10–13). Мæнгæ дин бадуй политикон сирдбæл, ома фæндуй æй, цæмæй йæ унаффитæбæл æма куд разамунд кæнуй, уобæл йæ барæ цæуа.

Фалæ тагъд дессаги хабæрттæ æрцæудзæнæй. «Ду ци сирди æма ци дæс сикъайи фæууидтай, етæ хъахбайæй фæууиндзæнцæ сæ исæфт æма æй бацарæфтуд кæндзæнцæ, ниууадздзæнцæ æй бæгънæгæй, бахуæрдзæнцæ йин йæ фид, æма æй басодздзæнцæ арти» (Раргомадæ 17:16). Аци дуйнейи политикон хецауæдтæ æнæнгъæлæги мæнгæ дини нихмæ рацæудзæнцæ æма æй фесафдзæнцæ! Цæмæн? Библийи Раргомади киунугæ лæдæрун кæнуй: «Хуцау син сæ зæрдити ниввардта Йæ фæндон исæнхæст кæнун» (Раргомадæ 17:17). О, Хуцау мæнгæ динæй дзуапп æрдомдзæнæй, йæ номæй ци цъаммар миутæ фæккодта, уони туххæй. Хуцау рæстдзийнадæ ке уарзуй, уомæ гæсгæ мæнгæ динæн йæ политикон лимæнти йæ нихмæ искæндзæй æма æй уони къохæй фесафдзæнæй.

Кæд дæ мæнгæ дини хæццæ фесæфун нæ фæндуй, уæд дæ ци кæнун гъæуй? «Рацæуетæ уордигæй, Мæ адæм»,– разæнгард нæ кæнуй Хуцауи Нихас (Раргомадæ 18:4). Нур æй мæнгæ динæй рацæуни рæстæг! Фалæ кумæ æй дæ бон ба рацæун? Хуцау нæййес, зæгъгæ, ка дзоруй, уонæмæ нæ; ауæхæн адæммæ дæр хуарзæй неци æнгъæлмæ кæсуй (2 Фессалоникæгтæмæ 1:6–9). Æрмæстдæр раст дини ес иссерæн ервæзундзийнадæ. Фалæ раст дин ба базонæн куд ес?

Раст дин базонæн куд ес

Раст дин циавæр «хуарз рæзæ» гъæуамæ хæсса? (Матфейи 7:17).

Раст дин...

УАРЗОНДЗИЙНАДÆ ÆВДЕСУЙ ГЪУДДАГÆЙ: Хуцауи æцæг лæггадгæнгутæ «дуйнейæй не ’нцæ», аллихузон адæмихаттитæбæл нæ дехтæ кæнунцæ æма се ’хсæн ес уарзондзийнадæ (Иоанни 13:35; 17:16; Куститæ 10:34, 35). Кæрæдзей маргæ нæ, фалæ, ку багъæуа, уæд цæттæ æнцæ кæрæдзей туххæй рамæлун дæр (1 Иоанни 3:16).

ÆУУÆНДУЙ ХУЦАУИ НИХАСБÆЛ: Раст дин «æгъдæуттæбæл» æма «адæми æримисгæ фæдзæхститæбæл» нæ ахур кæнуй – йæ ахурæдтæ æнцайунцæ Хуцауи Нихас Библибæл (Матфейи 15:6–9). Цæмæн? Уомæн æма «æгас Сугъдæг Финст Хуцауи фæндонæй финст æрцудæй, æма агъаз æй ахурæн, аййептæ рабæрæг кæнунæн, раст надбæл ислæуунæн, рæстдзийнадæ ци æй, уой лæдæрунæн» (2 Тимофеймæ 3:16).

ÆНГОМДÆР КÆНУЙ БИНОНТИ ÆМÆ АГЪАЗ ÆЙ ХУÆРЗÆГЪДАУ ЦАРДÆН: Раст дин лæгтæн амонуй, цæмæй «сæхе бауæр куд уарзунцæ, уотæ уарзонцæ сæ уостити дæр»; силгоймæгти ба разæнгард кæнуй, цæмæй сæ «лæгти нимайонцæ», сувæллæнтти ба – цæмæй сæ ниййаргутæмæ игъосонцæ (Ефесæгтæмæ 5:28, 33; 6:1). Уомæй уæлдай ма гъæуама хестæртæ сæ хуæрзæгъдау цардæй иннетæн фæнзуйнаг уонцæ (1 Тимофеймæ 3:1–10).

Аци уагæвæрдтæмæ гæсгæ ка цæруй, уæхæн дин ес? 2001 анзи мухури ка рацудæй, еу уæхæн киунуги финст ес: «Иегъови Æвдесæнтæ ци игъосун кæнунцæ æма ци уагæвæрдтæмæ гæсгæ цæрунцæ, адæмæн сæ фулдæр уотæ ку цардайонцæ, уæд Холокост нæ аддайдæ æма еу адæм иннæ адæми некæдбал цæгъдидæ» (Holocaust Politics).

235 бæсти Иегъови Æвдесæнтæ Библийи уагæвæрдтæ æрмæст игъосун нæ кæнунцæ, фалæ ма цæргæ дæр уонæмæ гæсгæ кæнунцæ. Æфсæрми ма кæнæ, æма Иегъови Æвдесæнтæн зæгъæ, цæмæй дин банхус кæнонцæ, Хуцау ди ци домуй, уой базонун æма йин куд æмбæлуй, уотæ лæггадæ кæнун. Нур æнцад бадуни рæстæг нæй. Фæстеуат кæнæн нæййес. Тагъд мæнгæ дин фесæфдзæнæй! (Софони 2:2, 3).

*  Аци хабæрттæ бæстондæрæй æвзурст цæунцæ брошюри «Ма бафынæй ут!» (ирон.), 12, 13 фæрсти. Рауагътонцæ æй Иегъови Æвдесæнтæ.