Lee̲le̲ la Edube Ońola Longe̲ na Mayá - Wum’a mibia i te̲se̲be̲ na Mbon’a Yehova

Wum’a mibia i te̲se̲be̲ na Mbon’a Yehova

Beliefs

Future

Nje Loba a Mabaise̲no̲ Biso̲ e?

Jokwa 12

Lee̲le̲ la Edube Ońola Longe̲ na Mayá
	Ne̲ni jangame̲nno̲ o jombwea longe̲ e? (1) Kwese̲ la deme̲ e? (1)
	Ne̲ni Kriste̲n i malee̲no̲ ná i mano̲ngo̲ jangame̲ye̲ e? (2)
	Mo̲ ye bobe o bwa ńama e? (3)
	Njika ńai a beboledi bena be si malee̲le̲ edube ońola longe̲ e? (4)
	Nje ye ka mbend’a Loba jombwea mayá e? (5)
	Mo̲ nika e mombwea pe̲ na tombe̲le̲ la mayá e? (6)

1. Yehova nde e Mpo̲lo̲lo̲ ma longe̲. Mambo me̲se̲ me longe̲ ma makusane̲ nde mo̲ Loba. (Myenge 36:9) Longe̲ le bosangi oboso ba Loba. To̲ longe̲ la muna nu dia oteten’a esal’a ńango pe̲ le tik’a lambo oboso ba Yehova. Boṅsane̲ la bwa ninka muna di si te̲nge̲n o miso̲ ma Loba.—Bebusedi 21:22, 23; Myenge 127:3.

O do̲lisane̲ Loba, jangame̲ne̲ o jiya tombe̲le̲ la mayá, bede̲mo ba mbindo na jokane̲ malonge̲ masu loko

2. Kriste̲n ya mbale̲ i mano̲ngo̲ jangame̲ye̲. I mawasa o be̲ mbaki ná mitoa na milongi mabu mi be̲ ńai ni si masengise̲ moto sese. (Ndimbisedi 22:8) Baboledi ba Loba ba si mokane̲ malonge̲ mabu loko buka te̲ ońola ná ba mapula bwa muńe̲nge̲. Na nika, ba si mano̲ngo̲ dongo o maloko ma njó mena ma masengise̲ bato bape̲pe̲ sese. Ba masamba beńe̲nge̲ be matute̲le̲ o njó.—Myenge 11:5; Yohane 13:35.

3. Longe̲ la ńama pe̲ le bosangi o boso ba Muwekedi. Kriste̲n ńena e bwa ńama ońola da na mbo̲ti to̲ o tata mo̲me̲ne̲ te̲nge̲ne̲ diboa na mbeu a ńolo. (Bebotedi 3:21; 9:3; Bebusedi 21:28) Nde ye bobe o takise̲ ńama to̲ bwa mo̲ buka te̲ ońola loko to̲ longe̲le̲ la ńolo.—Minia 12:10.

4. Ńo̲ la sika, ko̲ko̲ la mbanga ma bete̲l, na duta la banga o longe̲le̲ ńolo be mbenda ońola Kriste̲n. Ben beboledi be si te̲nge̲n ońola ná (1) be matimbise̲le̲ biso̲ bakom, (2) be mabolane̲ mańolo masu bobe, na ná (3) be ńakaka. (Roma 6:19; 12:1; 2 Korinto 7:1) Yena e we̲le̲ be̲ ndutu o jese̲le̲ ben bede̲mo. Nde jangame̲ne̲ bola nika o do̲lisane̲ Yehova.

5. Mayá pe̲ me bosangi o miso̲ ma Loba. Loba mo̲ ná mudī, to̲ so̲ longe̲, le nde o mayá. Ońola nika, e si te̲nge̲n o da mayá. E si te̲nge̲n pe̲ to̲ o da ńama ba si busise̲no̲ mayá bwam. Ńama e tim te̲, to̲ e wedi te̲ o lambi, e sangame̲n o dabe̲. E numabe̲ te̲ jo̲ngo̲ to̲ jangwabe̲ ngadi, ńangame̲n o ke̲be̲ mulopo dibokime̲ne̲ yete̲na ńangame̲n o dabe̲.—Bebotedi 9:3, 4; Levitiko 17:13, 14; Bebolo 15:28, 29.

6. Ye bobe o kasa tombe̲le̲ la mayá e? O̲nge̲le̲ ná Yehova a mapula ná jiye mayá. Nika ńe nde ná di sangame̲n o kasa mayá ma bato bape̲pe̲ o to̲ njika mbadi, to̲ ma biso̲ mo̲me̲ne̲ ba kombe̲no̲. (Bebolo 21:25) Ońola nika, Kriste̲n ya mbale̲ i titina i kasa tombe̲le̲ la mayá. I makasa to̲ njika ńai a myanga ipe̲pe̲ mi si be̲n mayá. I be̲n ńo̲ngi o be̲ longe̲, nde i si me̲nde̲ keka sunga malonge̲ mabu na kwe̲me̲ la mambenda ma Loba.—Mateo 16:25.

Busisabe̲ o mbu ma 1996
Copyright © 2008 Watch Tower Bible and Tract Society of Pennsylvania. All rights reserved.