Nje Ye Jo̲nge̲le̲ la Loba Ońola Wase e?

1. Yehova a weki nde nin wase ná bato ba benama ba bwane̲ longe̲ muńe̲nge̲ oten o bwindea. A ta a pula ná mundi ma wase mu tike jabe̲ na bato ba te̲m na sim, be pe̲ muńe̲nge̲. (Myenge 115:16; Yesaya 45:18) Wase e si me̲nde̲ bumbisabe̲ tom; e me̲nde̲ tika be̲ po̲ko̲po̲ko̲.—Myenge 104:5; Mulangwedi 1:4.

2. O biana Loba a maweka moto, A se̲le̲ nde o po̲so̲ epol’a wase esadi ewo̲ na mo̲ a po̲ngo̲ paradisi ńa bwam. A bele̲ mo̲ ná mōnda ma Ede̲n. Oten nde a we̲le̲no̲ mome na muto a boso, Adam na Eva. Loba a ta a pula ná ba be̲ yadi, ba londise̲ mundi ma wase mwe̲se̲. Son na son, ba wusa o timbise̲le̲ wase ńe̲se̲ paradisi.—Bebotedi 1:28; 2:8, 15.

Paradisi ni bo̲lo̲ne̲

3. Adam na Eva ba kwedi o bobe tongwea na kwe̲me̲ la mbend’a Loba na etoki. Na Yehova a panga babo̲ o mōnda ma Ede̲n. Ba bo̲lo̲ne̲ paradisi. (Bebotedi 3:1-6, 23) Nde Yehova a si dimbedi jo̲nge̲le̲ lao jombwea nin wase. A makakane̲ ná a me̲nde̲ timbise̲le̲ mo̲ paradisi, o wuma bato ba me̲nde̲no̲ ja o bwindea. Ne̲ni a me̲nde̲no̲ londise̲ nika e?—Myenge 37:29.

4. O biana nin wase e matimba paradisi, bato ba bobe bangame̲ne̲ se̲le̲ o sumwabe̲. (Myenge 37:38) Nika e me̲nde̲ bolane̲ o Armagedon, ńena ńe nde bila ba Loba o bo̲le̲ bobe. Ombusa nika, Satan a me̲nde̲ we̲le̲be̲ o beboa ońola 1 000 mbu. Nika e mapula nde o kwala ná mot’a bobe to̲ mō̲ a si me̲nde̲ pe̲ be̲ o ńamse̲ wase. Buka te̲ baboledi ba Loba nde ba me̲nde̲ kuse̲ jongise̲.—Bebīsedi 16:14, 16; 20:1-3.

5. Ombusa nika, Yesu Kristo a me̲nde̲ die̲le̲ nin wase ka Kiṅe̲ o pambo a ponda ńa 1 000 mbu. (Bebīsedi 20:6) Son na son, a me̲nde̲ sumwa bobe o myo̲ngo̲ na o mańolo masu. Di me̲nde̲ timba bato ba benama be ná ke̲nge̲nge̲ ka po̲ ka Adam na Eva oboso ná ba mako̲ o bobe. Maboa, bodun, na kwedi ba si me̲nde̲ pe̲ be̲. Baboedi ba me̲nde̲ bo̲lisabe̲, badun ba bato pe̲ ba me̲nde̲ pe̲te̲ timba beso̲mbe̲.—Hiob 33:25; Yesaya 33:24; Bebīsedi 21:3, 4.

6. Oteten’a Janea la Yesu la Ikol’a Mbu, bato ba jemea ba me̲nde̲ bola ebolo o timbise̲le̲ wase ńe̲se̲ paradisi. (Lukas 23:43) Lodun na lodun la bawedi pe̲ ba me̲nde̲ pumbwabe̲le̲ o wase. (Bebolo 24:15) Yete̲na ba londise̲ nje Loba a mengane̲no̲ babo̲, ke̲ ba me̲nde̲ tika be̲ longe̲ o wase o bwindea. Ye pe̲te̲ ná ke̲m, ke̲ ba me̲nde̲ kusa beńamsedi ba bwindea.—Yohane 5:28, 29; Bebīsedi 20:11-15.

7. Nika so̲ nde jo̲nge̲le̲ la Loba la boso ońola wase di me̲nde̲no̲ o londa. O me̲nde̲ to̲ndo̲ o be̲ne̲ dongo o min minam mi maye̲ e? Yete̲na ē, ke̲ e mapula ná o tike jokwa jombwea Yehova na we̲le̲ o ebolo nje a mengane̲no̲ wa. Jukea la mako̲to̲ne̲ o Ndabo a Janea ńa Mboṅ’a Yehova ńe wa be̲be̲ di me̲nde̲ jongwane̲ wa ná o bole nika.—Yesaya 11:9; Bonaheber 10:24, 25.

Ombusa Armagedon, wase e me̲nde̲ timba paradisi

Copyright © 2008 Watch Tower Bible and Tract Society of Pennsylvania. All rights reserved.