Mga Saksi ni Jehova Kinsa Sila?—Unsay Ilang Gituohan?

Praktikal nga Kaayohan sa Maayong Balita Ngadto sa Imong Komunidad

SA KALIBOTAN karon kasagarang madungog nato ang gipahayag nga hunahuna: “Ang mga prinsipyo sa Kristiyanidad dili praktikal. Dili gayod kini mosaler sa komplikadong katilingban karon.” Apan, sa usa ka gikatahong kabildohay tali sa Hindung lider nga si Mohandas K. Gandhi ug sa kanhing Britanikong Viceroy sa India, si Lord Irwin, usa ka lahi kaayong opinyon ang gipahayag. Gikaingon nga gipangutana ni Lord Irwin si Gandhi kon unsay iyang gihunahuna nga makasulbad sa mga suliran tali sa Gran Britanya ug sa India. Gikuha ni Gandhi ang usa ka Bibliya ug gibuksan kini ngadto sa ikalimang kapitulo sa Mateo ug miingon: “Kon ang imong nasod ug ang akoa magkahiusa sa mga pagtulon-ang gihatag ni Kristo niining maong Wali sa Bukid, masulbad unta nato ang mga suliran dili lamang sa atong mga nasod kondili hasta ang iya sa tibuok kalibotan.”

Kanang maong wali naghisgot bahin sa pagtinguha sa espirituwalidad ug sa pagkamaaghop, pagkamakigdaiton, pagkamaluluy-on, pagkamahigugmaon sa pagkamatarong. Kini nagsaway dili lamang sa pagbuno kondili sa pagkayugot sa uban, dili lamang sa panapaw kondili sa maulagong mga hunahuna usab. Nagsulti kini batok sa iresponsableng mga pagdiborsiyo nga nagbungkag sa mga panimalay ug nag-apektar sa mga anak. Giingnan kita niini: ‘Higugmaa bisan kadtong wala makaangay kanimo, panghatag sa mga kabos, hunong sa pagpanghukom sa uban nga dili-maluluy-on, tagda ang uban sa paagi nga gusto nimong tagdon ka.’ Kining tanang tambag, kon ipadapat, magpatunghag daghang kaayohan. Kon mas daghang tawo sa imong komunidad ang magtuman niini, mahimong mas maayo ang imong komunidad!

Ang mga Saksi ni Jehova maoy usa ka impluwensiya niining bahina. Ang Bibliya nagtudlo kanila sa pagtahod sa kaminyoon. Ang ilang mga anak gibansay sa matul-id nga mga prinsipyo. Ang kahinungdanon sa pamilya gipasiugda. Ang hiniusang mga pamilya maoy panalangin sa imong komunidad, bisan sa imong nasod. Ang kasaysayan napuno sa mga pananglitan sa mga gahom sa kalibotan nga nangabungkag sa dihang mihuyang ang mga bugkos sa pamilya ug miuswag ang imoralidad. Kon mas daghang tawo ug mga pamilya ang maimpluwensiyahan sa mga Saksi ni Jehova sa pagkinabuhi sumala sa Kristohanong mga prinsipyo, mas menos ang delingkuwensiya, imoralidad, ug krimen diha sa imong komunidad.

Usa sa dagkong mga suliran nga nag-apektar sa mga komunidad ug mga nasod mao ang pagpihig sa rasa. Sa kasukwahi, si apostol Pedro miingon: “Naila ko nga ang Diyos dili mapihigon, apan sa matag nasod ang tawo nga mahadlok kaniya ug magabuhat sa pagkamatarong dalawaton kaniya.” Ug si Pablo misulat: “Walay Hudiyo ni Grego, walay ulipon ni tawong gawasnon, walay lalaki ni babaye; kay kamong tanan usa ka persona nga nahiusa kang Kristo Jesus.” (Buhat 10:34, 35; Galacia 3:28) Gidawat kini sa mga Saksi ni Jehova. Ang tanang rasa ug mga kolor nagkinabuhi ug nagtrabaho nga magkauban diha sa ilang tibuok-kalibotang hedkuwarter, sa mga sangang buhatan, ug sa mga kongregasyon.

Sa Aprika ang pipila ka tribo dili mahimong magkauban nga dili mag-away. Apan, sa mga asembliya sa mga Saksi ni Jehova didto, ang mga tawo gikan sa daghang nagkalainlaing mga tribo mangaon, mangatulog, ug magsimba nga magkauban diha sa bug-os nga panaghiusa ug mainit nga pag-ubanay. Ang mga opisyal sa gobyerno natingala sa dihang nakita nila kini. Usa ka pananglitan sa makapahiusang epekto sa matuod nga Kristiyanidad gikomentohan sa Amsterdam News sa New York sa Agosto 2, 1958. Mitungha kining maong komento human makapaniid sa internasyonal nga asembliya nga gihisgotan ganina diin kapin sa un-kuwarto sa usa ka milyong Saksi ang nagtigom sa New York City.

“Bisan diin ang mga Negro, puti ug mga taga-Sidlakan, gikan sa tanang kahimtang sa kinabuhi ug tanang dapit sa kalibotan, nag-ubanay nga malipayon ug libre. . . . Ang magsisimbang mga Saksi gikan sa 120 ka kayutaan nag-uban pagpuyo ug pagsimba nga malinawon, nga nagpakita sa mga Amerikano nga sayon ra diay kanang himoon. . . . Ang asembliya maoy usa ka maayo kaayong pananglitan nga ang mga tawo mahimong magtrabaho ug magpuyo nga magkauban.”

Daghan tingali ang moingon nga ang mga prinsipyo sa Kristiyanidad dili praktikal alang niining modernong kalibotan. Apan, aduna bay laing paagi nga misaler o mosaler? Ang Kristohanong mga prinsipyo mahimong tinuod lamang nga bililhon kon ipadapat sa imong komunidad karon, ug kini mahimong sukaranan sa paghiusa sa tanang ‘nasod, tribo, ug katawhan’ sa tibuok yuta ilalom sa pagmando sa Gingharian sa Diyos ibabaw sa katawhan.—Pinadayag 7:9, 10.

Copyright © 2006 Watch Tower Bible and Tract Society of Pennsylvania. All rights reserved.