¿Nawajo’ yatok rusamajel ri Tata’ixel?

1. Richin yatok rachib’il ri Tata’ixel nk’atzin ronojel re’: nk’oje’ awetamab’al chi rij ri qitzij nuk’üt ri Loq’oläj Wuj (1 Timoteo 2:3, 4), nakuqub’a’ ak’u’x chi rij ri xawetamaj (Hebreos 11:6), ntzolin pe ak’u’x chi re ri amak (Hechos 17:30, 31), chuqa’ ye’aya’ kan ri itzel taq ab’anob’al (Hechos 3:19). Ri awajowab’äl chi rij ri Tata’ixel nub’än ta chi naläx pa awanima najäch awi’ pa ruq’a’. Re’ ntel chi tzij yach’on rik’in ri Tata’ixel pa ayonil, nab’ij chi re chi nawajo’ nab’än ri rurayib’al (Mateo 16:24; 22:37).

2. Toq xatijoj yan awi’ chi rij ri Loq’oläj Wuj, chuqa’ xajäch yan awi’ pa ruq’a’ ri Tata’ixel, k’a ri’ yaqasäx pa ya’ (Mateo 28:19, 20, CO). Ri yaqasäx pa ya’ nuya’ retal chi xab’ij yan chi re ri Jehová chi nawajo’ nab’än rurayib’al. Ruma ri’ xa xe yeqasäx pa ya’ ri k’o chik kina’oj richin nkinojij nkib’än rusamaj ri Tata’ixel. Toq jun winäq nqasäx pa ya’, ronojel ri ruch’akul nju’üx qa pa ya’ jun ch’uti ramaj* (Marcos 1:9, 10; Hechos 8:36).

3. Toq xajäch yan awi’ pa ruq’a’ ri Jehová, rija’ nrajo’ nab’än pa ak’aslem ri xab’ij chi re (Salmo 50:14; Eclesiastés 5:4, 5). Ri Satanás xtukanoj rub’eyal xtaya’ kan rub’anik rurayib’al ri Jehová (1 Pedro 5:8). Tato’ k’a awi’ rik’in ri Tata’ixel, kach’on rik’in (Filipenses 4:6, 7). Ronojel q’ij tasik’ij ri Ruch’ab’äl ri Jehová (Salmo 1:1-3). Jantape’ kak’oje’ kik’in ri awachib’il pa molojri’ïl (Hebreos 13:17). Ri nab’än ronojel re’, xtk’oje’ awuchuq’a’ richin xtab’än jantape’ ri nqa chuwäch ri Tata’ixel. Xkatikïr xtab’än richin jantape’ ri nrajo’ rija’.

¿K’o k’utunïk nawajo’ nab’än o narayib’ej jun atijonik chi rij ri Loq’oläj Wuj pa awochoch? Katz’ib’an el chupam ri ochochib’äl naqaj nub’än chawe. Direcciones