¿Achike rub’eyal nawïl ri qitzij nimab’äl k’u’x?

1. Ri Jesús xa xe jun qitzij nimab’äl k’u’x xutïk. Ruma k’a ri’, wakami, xa xe jun molaj winäq ri kan qitzij nuya’ ruq’ij ri Tata’ixel Jehová (Juan 4:23, 24; Efesios 4:4, 5). Ri Loq’oläj Wuj nub’ij chi xa e jub’a’ ok winäq e k’o chupam ri ko’öl ruwäch b’ey ri na’pon pa k’aslem (Mateo 7:13, 14).

2. Ri Loq’oläj Wuj xub’ij pe chi toq xkekäm el ri kab’lajuj taq tijoxela’, eqal xke’ok apo chupam ri moloj xutïk kan ri Jesús, tz’ukun taq na’oj chuqa’ itzel taq b’anob’äl. Xkek’oje’ achi’a’ xkekik’waj runimanela’ ri Jesús, xkekijäch k’a kan chi rij rija’ (Mateo 7:15, 21-23; Hechos 20:29, 30). Ruma k’a ri’ k’ïy kiwäch nimab’äl taq k’u’x e k’o wakami, nkib’ij chi e runimanela’ ri Jesús. ¿Achike rub’eyal nqatz’ët achike ri qitzij taq runimanela’ ri Jesús?

3. Ri kan tz’etel chi kij ri qitzij taq runimanela’ ri Jesús ja ri qitzij ajowab’äl k’o chi kikojöl (Juan 13:34, 35). Man k’utun ta chi kiwäch nkinimirsaj ki’ chi kiwäch ri winäq jun chik kijatzul o jun chik ntzu’un kich’akul. Chuqa’ man k’utun ta chi kiwäch itzel yekitz’ët ri winäq aj juk’an chik timamït (Hechos 10:34, 35). Ruma ri’ rije’ man nkiju’ ta ki’ pa nima’q taq oyowal o ch’a’oj. R i qitzij taq nimanela’ achi’el kach’alal ki’ nkina’ chi kiwäch (1 Juan 4:20, 21).

Ri qitzij taq runimanela’ ri Jesús nkajo’ ki’, nkiya’ ruq’ij ri Loq’oläj Wuj chuqa’ nkitzijoj Rajawaren ri Tata’ixel

4. Jun chik retal ri qitzij nimab’äl k’u’x ja ri ruwinaq nkiya’ nimaläj ruq’ij ri Loq’oläj Wuj. Chi kiwäch rije’ kan Ruch’ab’äl wi ri Tata’ixel, nkinimaj k’a ri nub’ij (Juan 17:17; 2 Timoteo 3:16, 17). Chi kiwäch rije’ ja ri Ruch’ab’äl ri Tata’ixel ja ri’ ri k’o ruq’ij chi kiwäch kina’oj o kib’anob’al ri winäq (Mateo 15:1-3, 7-9). Nkitij kiq’ij nkib’än pa kik’aslem ri nub’ij. Ruma k’a ri’ ri nkitzijoj ja ri’ ri nkib’än pa kik’aslem (Tito 1:15, 16).

5. Ri e k’o chupam ri qitzij nimab’äl k’u’x nkiya’ ruq’ij rub’i’ ri Tata’ixel (Mateo 6:9). Ri Jesús xuk’üt rub’i’ ri Tata’ixel, Jehová, ri qitzij taq runimanela’ k’o chi nkik’üt chuqa’ (Juan 17:6, 26). ¿Achike ri yetzijon rub’i’ ri Tata’ixel pa atinamit?

6. Ri qitzij taq runimanela’ ri Jesús nkitzijoj Rajawaren ri Tata’ixel. Ri Jesús ja ri’ xub’än. Rija’ xa xe ri Ajawaren xutzijola’ (Lucas 8:1). Chuqa’ xub’ij chi ke ri rutijoxela’ chi tb’ekitzijoj ri Ajawaren chuwäch ronojel Ruwach’ulew (Mateo 24:14; 28:19, 20, CO). Ri qitzij taq runimanela’ ri Jesús kiniman chi xa xe Rajawaren ri Tata’ixel ntikïr nk’amon pe ri qitzij uxlanib’äl k’u’x chi Ruwach’ulew (Salmo 146:3-5).

7. Ri rutijoxela’ ri Jesús man kiju’un ta ki’ chupam ri b’anob’äl ye’ajin chi ruwach’ulew (Juan 17:16). Man nkiju’ ta ki’ pa taq moloj yeb’an toq yecha’öx ri q’atöy taq tzij, chuqa’ man yeb’e ta kik’in ri winäq nkimöl ki’ richin yeb’ech’ojin. Man yekib’an ta itzel taq b’anob’äl, chuqa’ man nkib’än ta itzelal chi ke ri winäq (Santiago 1:27; 4:4). ¿Atz’eton rat jun nimab’äl k’u’x pa atinamit ruk’wan ketal ri qitzij taq runimanela’ ri Jesús?

Copyright © 2011 Watch Tower Bible and Tract Society of Pennsylvania. All rights reserved.