Tqaya’ ruq’ij ri k’aslem chuqa’ ri kïk’

1. Ri k’aslem rik’in ri Jehová npe wi. Konojel ri k’o kik’aslem ja ri Tata’ixel e k’asb’ayon (Salmo 36:9). Chuwäch ri Tata’ixel janila ruq’ij ri k’aslem. Ke ri’ ruk’aslem jun nene’ ri majani taläx, ri xa k’a k’o chupam rute’, janila ruq’ij chuwäch ri Jehová. Chuwäch ri Tata’ixel xajan nakamisaj chib’anik ri ti ak’wal k’a ri’ ok nunuk’ ri’ (Salmo 127:3; 139:16).

Richin nkikot ri Tata’ixel qik’in, man ntqak’äm kïk’, man keqab’än tz’il taq b’anob’äl, chuqa’ man tqanim qi’ pa kamïk toq man k’atzinel ta

2. Ri qitzij taq runimanela’ ri Jesús ütz nkib’än chi re ronojel richin majun achike tusok ri’. Yekinik’ola’ (o yekinik’uj) ri kich’ich’ chuqa’ ri pa taq kochoch richin manäq ta achike nuk’äm pe ch’a’oj pa kiwi’ (Deuteronomio 22:8). Ri rusamajela’ ri Tata’ixel man nkinim ta kik’aslem pa kamïk ruma k’astajinïk. Ruma ri’ man yekib’än ta etz’anem ri chib’anik yesokotäj winäq, chuqa’ xa b’a achike chik na jun etz’anem ri nutïk oyowal (Salmo 11:5; Juan 13:35).

3. Ri Tata’ixel nuya’ chuqa’ ruq’ij kik’aslem ri chikopi’. Ri runimanela’ ri Jesús ütz yekikamisaj ri chikopi’ richin yekitïj, richin nkib’än kitzyaq chi re, richin nkitob’ej ki’ chi re yab’il o achike chik na jun k’ayewal (Génesis 3:21; 9:3; Éxodo 21:28). Ja k’a ri ye’aya’ pa tijoj poqonal o ye’akamisaj ruma etz’anem o ruma k’astajinïk man ütz ta (Proverbios 12:10).

4. Ri yasik’an, nakäch’ may, chuqa’ ri natïj aq’om ri nkich’ujirisaj ajolom, man ruk’amon ta nub’än jun qitzij nimanel. Re b’anob’äl re’ man e ütz ta ruma 1) jumul nuxïm jun winäq, 2) nkitzelaj ach’akul, chuqa’ 3) e tz’il taq b’anob’äl (Romanos 6:19; 12:1; 2 Corintios 7:1). K’o b’ey k’ayew nub’än yeqaya’ kan re b’anob’äl re’, ja k’a toq kan qitzij nqajo’ nqab’än ri nqa chuwäch ri Jehová k’o chi yeqaya’ kan.

5. Chuwäch ri Tata’ixel k’o chuqa’ ruq’ij ri kïk’. Rija’ nub’ij chi ri k’aslem k’o chupam ri kïk’. Ruma ri’ man ütz ta natïj kïk’. Man ütz ta chuqa’ natïj (o nak’ux) ruti’ jun chiköp ri man ütz ta elesan kan rukik’el. Toq jun chiköp xa choj xq’och ruqul o xa xkäm pa jun pata’y man ütz ta natïj. Toq ri chiköp xkamisäx rik’in jun ach’i’y (ul) o rik’in jun q’aq’ ütz chanin telesäx rukik’el richin ütz ntij (Génesis 9:3, 4; Levítico 17:13, 14; Hechos 15:28, 29).

6. ¿La itzel nya’öx kïk’ chawe? Toqa pa ajolom chi ri Jehová nub’ij chi man tqatïj kïk’. Re’ ntel k’a chi tzij, chi man ütz ta chuqa’ nqaya’ pa qach’akul rukik’el jun chik winäq. Ke ri’ chuqa’ ri qakik’el qa röj toq yakon kan (Hechos 21:25). Ruma ri’ ri qitzij taq runimanela’ ri Jesús man nkajo’ ta nya’öx kïk’ chi ke. Rije’ nkik’äm jun chik rub’eyal aq’omanïk, achi’el ri nya’öx pa kich’akul jun aq’om ri man ruk’wan ta kïk’. Nkajo’ yek’ase’, ja k’a man xtkiköl ta ri kik’aslem (o man xtkito’ ta ruwi’), toq xa nkiq’äj rutzij ri Tata’ixel (Mateo 16:25).

Copyright © 2011 Watch Tower Bible and Tract Society of Pennsylvania. All rights reserved.