¿Achike ri Jesucristo?

1. Toq k’a majani toqa ri Jesús chi Ruwach’ulew, jun wi xamanil winäq chi kaj. Rija’ ri nab’ey xb’an ruma ri Tata’ixel; ruma ri’ «nab’ey» Ralk’wal ri Tata’ixel nb’ix chi re (Colosenses 1:15; Apocalipsis 3:14). Ri Jesús xa xe rija’ ri K’ajol ri kan ja ri Tata’ixel xb’anon richin, majun achike ta xto’on richin. Toq ri Jesús k’a k’o wi chi kaj, ri Jehová xukusaj richin xok ‹nimaläj rusamajel›. Rija’ xto’on rik’in ronojel ri samaj chi kaj chuqa’ chi Ruwach’ulew (Proverbios 8:22-31; Colosenses 1:16, 17). Ri Tata’ixel xukusaj chuqa’ richin xch’on pa rub’i’. Ruma ri’ ri Jesús xb’ix ri «Ch’ab’äl» chi re (Juan 1:1-3; Apocalipsis 19:13).

2. Ri Tata’ixel xutäq pe ri Ruk’ajol chi Ruwach’ulew. Xuq’asaj pe ri ruk’aslem pa rute’ rupam ri María. Ruma ri’ ri Jesús man jun ta achin chi ruwach’ulew rutata’, chuqa’ ruma ri’ man xuk’äm ta ri mak, rija’ tz’aqät. Ri Tata’ixel xutäq pe ri Jesús oxi’ ruma: 1) Richin xuk’üt chi qawäch ri qitzij chi rij ri Tata’ixel (Juan 18:37), 2) richin xub’än ri choj pa ruk’aslem, stape’ chi kiwäch nima’q taq k’ayewal, ke ri’ xuya’ kan jun tz’etb’äl chi qawäch (1 Pedro 2:21), chuqa’ 3) richin xuya’ ruk’aslem pa kamïk, ke ri’ xojruköl chi re ri mak chuqa’ ri kamïk. ¿Achike ruma nk’atzin wi ri kamïk ri’? (Mateo 20:28.)

3. Toq ri nab’ey achin, Adán, man xub’än ta ri xub’ij ri Tata’ixel, xtzaq chupam ri jun b’anob’äl ri Loq’oläj Wuj nub’ij «mak» chi re. Ruma k’a ri’ ri Tata’ixel xuq’ät tzij richin kamïk pa ruwi’ ri Adán (Génesis 3:17-19). Ruma man xtik’ïr ta chik xub’än ri nrajo’ ri Tata’ixel, xok k’a qa ajmak. Eqal eqal xrijïx qa, k’a ri’ xb’ekäm k’a. Ri Adán xuq’asaj ri mak pa kiwi’ ri ralk’wal. Ruma k’a ri’ röj chuqa’ yojrijïx, yojyawäj, chuqa’ yojkäm. ¿Achike rub’anik yekolotäj o yesolq’opix wi ri winäq? (Romanos 3:23; 5: 12.)

4. Toq xk’oje’ ri Jesús chi ruwach’ulew jun wi tz’aqät achin, achi’el wi ri Adán. Ri man junan ta ri Jesús rik’in ri Adán, ja ri kina’oj. Ri Jesús jantape’ xunimaj o xutaqej rutzij ri Tata’ixel, stape’ chuwäch nima’q taq tijoj poqonal. Ja k’a ri Adán man xniman ta. Ruma k’a ri’ ri Jesús ntikïr wi nuya’ ri chojmiläj ruk’aslem pa kamïk richin nutoj rumak ri Adán. Ri Loq’oläj Wuj nub’ij «kolotajïk» chi re ri b’anob’äl ri’. Ja ri’ k’a rub’eyal ralk’wal ri Adán yetikïr yekolotäj chuwäch ri kamïk. Konojel ri nkikuqub’a’ kik’u’x rik’in ri Jesús nkïl rukuyutajik kimak, chuqa’ nkïl ri k’aslem man k’isel ta (1 Timoteo 2: 5, 6; Juan 3:16; Romanos 5:18, 19).

Jujun chi ke ri samaj xerub’än ri Jesús ja ri xerutijoj winäq, xerupab’a’ kaq’iq’ taq jöb’, chuqa’ xuya’ ruk’aslem quma röj

5. Toq ri Jesús xk’oje’ chi Ruwach’ulew xeruk’achojrisaj yawa’i’, xerutzüq ri yenum, chuqa’ xerupab’a’ kaq’iq’ taq jöb’. Xeruk’asoj chuqa’ ri kaminaqi’. ¿Achike ruma xerub’än ronojel re’? 1) Ruma nupoqonaj wi kiwäch ri winäq nkitïj poqonal, chuqa’ nrajo’ wi yeruto’, 2) ri samaj xerub’än xuya’ retal chi ruk’ajol ri Tata’ixel, chuqa’ 3) xkik’üt ri xtub’än pa kiwi’ ri nimanel taq winäq toq xtuq’ät tzij pa ruwi’ ri Ruwach’ulew (Mateo 14:14; Marcos 2:10-12; Juan 5:28, 29).

6. Xkäm ri Jesús, xk’asöx ruma ri Tata’ixel achi’el xamanil, k’a ri’ xtzolin k’a chi kaj (1 Pedro 3:18). Xb’e na juna’, k’a ri’ ri Tata’ixel xub’än Q’atöy tzij chi re. Xa jub’a’ chik, ri Jesús xtuk’is k’a ruwäch ri itzelal chuqa’ ri tijoj poqonal chi Ruwach’ulew (Salmo 37:9-11; Proverbios 2:21, 22).

Copyright © 2011 Watch Tower Bible and Tract Society of Pennsylvania. All rights reserved.