1. Ovanene weyo osunza Mbibiliani dhilobo dhinji dha pama. Eziwelo eji enofanyela wukurutxa wila otameletxe mweddelo wekristu. (Efeso 4:22-24) Eziwelo eji eli yofuneya wila wakele egumi yamukalakala. (Joau 17:3) Mwa dhaene, athu enaguwa vina anofanyela oziwa dha muthaka obu wapama wila moligana vina awodhe ovuneya. Akristu otene a ebaribari anofanyela ovaha onamona wa athu ena. Nthi nlamulo na Mulugu.—Roma 10:10; 1 Korinto 9:16; 1 Timoteo 4:16.
2. Weyo poddi oroma ovuwiha muthaka obu wapama onsunziwe wa athu ali vakuvi na weyo. Kaloga esi na amudhawo, amarho, akwawo oskola vina omabasani. Kakosa eji na mukalelo woderetu ovilela. (2 Timoteo 2:24, 25) Kobuwela wila athu mudhidhi mwinjene anañganetxa mweddelo wa muthu othiya esile dhinlogie. Mwa dhaene, mweddelo wawo wa pama onele owodha wakurutxa athu ena wiwa nzu ninawaddeliwe.—Mateus 5:16; 1 Peduru 3:1, 2, 16.
3. Na mudhidhi, weyo onele okana onoñgonoñgo wila orome olaleya vamodha na mulogo wa vakukuvi wa Anamona a Yehova. Eji tharho yofuneya vaddiddi yodhowa vasongorho vawo. (Mateus 24:14) Oziveliwa gani onakane weyo owodha omukamiha muthu okala mudhari a Yehova vina othambira egumi ya mukalakala!—1 Tesalonika 2:19, 20. |
