Mulugu Onaddameliwa Dhavi Mu Nlobelo

1. Olobela entapulela ologa wovievia na Mulugu. Weyo onofanyela olobela wa Mulugu mudhidhi oli wotene. Dhaene onele wona wi ohimwaddamela vaddiddi ninga mukwawo wouzivela. Yehova munddimuwa vaddiddi vina dda guru dhotene, mbwenye iyene onovuruwana malobelo ehu! Onolobela wa Mulugu mudhidhi oli wotene?—Salmo 65:2; 1 Tesalonika 5:17.

2. Nlobelo ninokosa epaddi ya webedha wehu. Mwa dhaene, ninfanyelela olobela wa Yehova Mulugu bahi. Yezu agali elabo ya vati, iyene anlobelavi wa Babe, kaliwo mwina. Iyo ninofanyela okosa yakakene. (Mateus 4:10; 6:9) Mwa ejene, malobelo ehu otene anofanyela oddoddobeliwa mu nzina na Yezu. Dhaene n’nolagiha wi ninoriha mburo wa Yezu wi nihikana nroromelo wa mukutho waye wonobola iyo.—Joau 14:6; 1 Joau 2:1, 2.

3. Nigalobelaga, ninofanyela ologa wa Mulugu na mmirimani mwehu. Kaninfanyela oddoddobela malobelo akakene, ne wengesa munivuruni na malobelo. (Mateus 6:7, 8) Ninowodha olobela na mikalelo dhinjidhene dha nriho, mudhidhi oli wotene vina mburo mburovi. Mulugu onofiyedha wiwa malobelo ofwaseya, ankosiwa mmirimani. (1 Samueli 1:12, 13) Egaikala pama oveda mburo wofwaseya, wolapela na athu ena, wi nikose malobelo ehu amuthu yeka.—Markos 1:35.

4. Dhilobo gani dhili dhofanyela weyo olobela? Mwa dhotedhene dhili mwari mwa omarho wawo na iyene. (Filipi 4:6, 7) Nlobelo na nlagiho ninowoniya wi ninofanyela olobela wa nzina na yofuna ya Yehova. Jofuneya vina okumbira wi dhireye dhofuna dhehu dhomaningoni, okumbira wi dhothega dhehu dhileveleliwe vina okamiedhiwa nigasegedheya na dhoweha. (Mateus 6:9-13) Malobelo ehu kanfanyela wi akale ovithukulela. Nilobelele bahi dhilobo dhili dhowiwanana na yofuna ya Mulugu.—1 Joau 5:14.

5. Weyo poddi olobela vanfuneliwe venevo vanuwaddela murima wawo wi omutamalele obe omuthithimihe Mulugu. (1 Kronika 29:10-13) Onofanyela olobela ogakana makathamyo akala nroromelo nawo ninowehiwa. (Salmo 55:22; 120:1) Eli yofanyela olobela nihinathi oja. (Mateus 14:19) Yehova ononikukusela olobela “mwa mudhidhi wotene”.—Efeso 6:18.

6. Nihikana ofuna wavawoka wa olobela nigakosa yothega enddimuwa. Midhidhi esi, ninofanyela omunlela Yehova wi anikanele thagaraga vina anilevelele. Nigambwekela dhothega dhehu vina banigakosa guru wi nineyelele, Mulugu onele okala “owimela wi alevelele”.—Salmo 86:5; Vimarya 28:13.

7. Yehova onvuruwana malobelo a aligani bahi. Wila malobelo awo avuruwaniwe na Mulugu, weyo onofanyela ovilibiya venjene bugakala owiwanana na malamulo Aye. (Vimarya 15:29; 28:9) Enofuneya okala ovieviha ogalobelaga. (Lukas 18:9-14) Onofanyela okosela guru ejile enlobelela weyo. Dhaene onele weha wi oikana nroromelo wi txibaribarene onloga ebaribari. Dhaene bahi malobelo awo anele otanaliwa na Yehova.—Aebreo 11:6.

Copyright © 2006 Watch Tower Bible and Tract Society of Pennsylvania. All rights reserved.