Hayi i Aniti?

1. I palabra “aniti” kumeke ilekña guaha kumuekuentos manailayen dinage siha pot otru petsona. “Satanas” kumeke ilekña un enemigu pat kontrariu. Este siha na’an mana’e i tatkilo’ na enimigon Yuus. Gi fine’nana, guiya un prifekto na anghet gi lañgit yan si Yuus. Lao, despues hahasso dimasiao pot guiya mismo ya hamalagu’e i adorasion nui dipotsi direchon Yuus.—Matthew 4:8-10.

2. Este na anghet, si Satanas, hakuentuse si Eba ginen i un kulepbla. Gi annai hasañgañgane gue’ siha dinage, hakombensi gue’ para ti uosge si Yuus. Si Satanas entonses haataka hafa i maagang “pueston,” Yuus pat posision komu i Tai Achaigua. Si Satanas hakuestiona kao si Yuus man manda gi minaolek na chalan yan gi itmas na interes pot i Manaotaoña siha. Si Satanas hafaisen lokkue’ kao guaha taotao para utachu fehman guatu as Yuus. Gi annai hachocho’gue este, si Satanas mismo hana’ enimigon Yuus gue’. Enao mina maagang gue’ i Aniti as Satanas.—Genesis 3:1-5; Job 1:8-11; Revelation 12:9.

3. Si Satanas hachagi para ulaime i taotao siha nui para umaadodora gue’. (2 Corinthians 11:3, 14) Un chalan nai hana’ fanabak i taotao siha i ti man magahet na relihion. Yangin i relihion hafa’na’gue dinage pot si Yuus, sen magahet na hasetbi i propositun Satanas. (John 8:44) Taotao siha nui membron i timan magahet na relihion siñaha’ na man sinseruru mahongge na maadodora i magahet na Yuus. Lao masesetbi gi minagahet si Satanas. Guiya ‘i yius pot este na systema.’—2 Corinthians 4:4.

Dakon relihion, espiritissimo, yan nasionalissimo mana’fanabak i taotao siha

4. Espiritissimo otru chalan nai hakonne’ si Satanas i taotao siha gi fuetsanña. Siñaha’ maagang i espiritu siha para ufan prinutehi, para una’ fanailaye otru siha, para umaapotsu i mamamaila’ pat para umacho’gue milagro siha. Si Satanas i tailaye na fuetsa gi taten todu este siha na cho’cho’. Para utakomplase si Yuus, debi di utasuhayi este siha i che’cho’ espiritissimo.—Deuteronomy 18:10-12; Acts 19:18, 19.

5. Si Satanas hana’ fanabak lokkue’ siha i taotao ginen i mampos banidat pot rasa yan i inadoran politikat inetnon siha. Guaha siha sumienti na i nasionñiha pat rasanñiha maolekña kinu i otru siha. Lao ti man magahet este. (Acts 10:34, 35) Otru siha na taotao maatan i inetnon politikat para usatba i prubleman taotao siha. Gi annai machocho’gue este, machachanda i Rainon Yuus. Esteha’ i uniku na resuttan i prublemata siha.—Daniel 2:44.

Renunsia si Satanas gi annai un kontinunua tumuñgo’ pot si Jehovah

6. Otru na chalan si Satanas hana’fanabak i taotao gi annai hatietienta siha nui motmot dinisean isao. Si Jehovah hasañgane hit para tasuhayi fina’tinas isao siha sa’ hatuñgo’ na enao para una’ tailaye hit. (Galatians 6:7, 8) Guaha na taotao siha siñaha’ mamalagu’e para undalak siha guennao na klasen cho’cho’. Lao, hasso, guiya si Satanas yuhe i mumalagu’e para uncho’gue este siha.—1 Corinthians 6:9, 10; 15:33.

7. Si Satanas siñaha’ hausa pinetsige pat kontra para una’diñgo hao as Jehovah. Siñaha’ guaha gi man guinaiyammu siha man senlalalo’ sa’ unestutudia i Biblia. Otru siha siñaha’ mafa’chalek hao. Lao giya hayi nai undidibe i lina’la’mu? Si Satanas hamalagu’e muna’ maa’ñao hao kosa ki para unpara tumutuñgo’ pot si Jehovah. Cha’mu muna’ fangagana si Satanas! (Matthew 10:34-39; 1 Peter 5:8, 9) Gi annai unrenununsia i Aniti, unna’ siña muna’ magof si Jehovah yan unna’ annok na unsustietieni i pueston Yuus.—Proverbs 27:11.

Copyright © 2006 Watch Tower Bible and Tract Society of Pennsylvania. All rights reserved.