1. Jatet tsa’ix a cʌñʌ cabʌl chuqui tac wen ya’ ti Biblia. Jini tsa’ix bʌ a cʌñʌ ya’ ti Biblia yom mi’ coltañet, cha’an ma’ ñop a lajin bajche’ Cristo (Efesios 4:22-24). Yic’ot ja’el, che’ ma’ taj a ña’tʌbal ñucʌch i c’ʌjñibal cha’an ma’ taj a cuxtʌlel mach bʌ anic mi’ jilel (Juan 17:3). Yic’ot ja’el jini a pi’ʌlob yom mi’ yubiñob jini wen t’an cha’an mi’ tajob i coltʌntel. Ti pejtelel jini xñopt’añob yom mi’ cha’leñob subt’an. Jiñʌch jump’ejl i mandar Dios (Romanos 10:10; 1 Corintios 9:16; 1 Timoteo 4:16).
2. Mi mejlel a tech a subeñob jini wen tac bʌ t’an woli bʌ a cʌn yic’ot jini winicob x’ixicob lʌc’ʌl bʌ añob a wic’ot. Subeñob jini a cha’año’ bʌ ti a wotot, a wamigojob, a pi’ʌlob ti escuela, yic’ot a pi’ʌlob ti e’tel. Mele yic’ot i yutslel a pusic’al yic’ot yom a wujil pijt (2 Timoteo 2:24, 25). Yom c’ajal a cha’an jini winicob x’ixicob mi’ ñumen q’uelob chuqui mi’ mel juntiquil lac pi’ʌl che’ bajche’ muc’ jach bʌ yʌl. Jini cha’an, jini wem bʌ a melbal mi mejlel i mel cha’an mi’ ñich’tañob jini wen t’an woli bʌ a suben yaño’ bʌ (Mateo 5:16; 1 Pedro 3:1, 2, 16).
3. Tajol ti jump’ejl bʌ q’uin chajpʌbiletix cha’an ma’ tech subt’an, yic’ot jini i congregación i testigojob Jehová ba’ ma’ tempan a bʌ. Iliyi jiñʌch junchajp cha’an ma’ c’ʌjquel majlel (Mateo 24:14). ¡Wen tijicñajax che’ muq’uic a coltan juntiquil cha’an mi yochel ti’ winic Jehová yic’ot cha’an mi’ taj i cuxtʌlel mach bʌ anic mi’ jilel! (1 Tesalonicenses 2:19, 20.) |
