Jini i winicob Dios yomʌch sʌcob

1. Jehová Dios sʌc yic’ot ch’ujul. Dios mi’ pijtan cha’an jini mu’ bʌ i ch’ujutesañob sʌc yom mi yajñelob ti’ ch’ujutesaya, ti’ melbalob, ti’ ña’tʌbalob yic’ot ti’ bʌc’talob (1 Pedro 1:16). Yom mi lac cha’len wersa cha’an sʌc mi la cajñel ti’ wut Dios. Chumulonla ti jump’ejl pañimil wen bibi’ bʌ. Yic’ot ja’el, añʌch jump’ejl laj contra, jiñʌch ti’ melol chuqui tac mach wen. Pero mach yomic mi lac lujb’an.

2. Sʌc bʌ lac ch’ujutesaya: Mi la com lac melbel i ye’tel Jehová, mach yomic mi’ cʌytʌl la quic’ot mi jump’ejlic cʌntesa o costumbre tilem bʌ ya’ ti mach bʌ isujmic ñopbalʌl. Yom mi lac loq’uel ya’ ti mach bʌ isujmic ñopbalʌl yic’ot ma’anic mi lac wis coltan (2 Corintios 6:14-18; Apocalipsis 18:4). Che’ mi tsa’ix laj cʌñʌ isujmlel bʌ cha’an Dios, yom mi laj cʌntan lac bʌ cha’an ma’anic mi’ lotiñonla jini mu’ bʌ i cha’leñob lot bʌ cʌntesa (2 Juan 10, 11).

3. Sʌc bʌ lac melbal: Jehová yom cha’an jini mu’ bʌ i ch’ujutesañob mi’ pʌsob i bʌ bajche’ isujm bʌ xñopt’añob ti’ pejtelel ora (1 Pedro 2:12). Jehová mi’ lu’ q’uel ti pejtelel chuqui mi lac mel, yic’ot ja’el mu’to i q’uel chuqui mucul mi lac mel (Hebreos 4:13). Mach yomic mi lac cha’len ts’i’lel yic’ot yan tac bʌ i melbal ili pañimil bibi’ bʌ (1 Corintios 6:9-11).

4. Sʌc bʌ lac ña’tʌbal: Mi muc’ʌch lac but’ jini lac ña’tʌbal ti chuqui tac sʌc, jini lac melbal ja’el sʌc mi cajel lac pʌs (Filipenses 4:8). Pero mi woli lac chʌn ña’tan jini mach bʌ wentaquic, mi caj i c’otel lac mel chuqui mach wen (Mateo 15:18-20). Mach yomic mi lac mel jini alas tac mu’ bʌ mejlel i bib’esan lac ña’tʌbal. Mi muc’ʌch lac chajpan jini i T’an Dios, mi caj lac but’ jini lac ña’tʌbal ti chuqui tac sʌc.

5. Sʌc bʌ lac bʌc’tal: Come jini xñopt’año’ bʌ mi’ pʌsob i bʌ ti’ cha’año’ bʌ Dios, yomʌch cha’an sʌc mi yajñelob ti bʌc’tal yic’ot i pislelob. Yomʌch mi lac poc laj c’ʌb che’ tsa’ix ujti laj c’ʌn jini baño, yic’ot ja’el che’ mu’to caj laj c’ux lac waj o che’ maxto lac tʌlʌ. Mi ma’anic drenaje ti jini otot, mi’ mejlel i top’bentel i lumil ba’ mi yujtel wutstʌl (Deuteronomio 23:12, 13). Che’ sʌc mi laj cajñel mi yʌc’ wen bʌ laj c’oc’lel. Jini i yotot xñopt’añob yom cha’an sʌc mi yajñel yic’ot wen much’quibil i cha’an i mal yic’ot ti jumpatlel. Yom wen cʌmbilob cha’an sʌcob ya’ baqui chumulob.

6. Sʌc bʌ lac t’an: Jini xñopt’añob i cha’an Dios yom ti pejtelel ora mi yʌlob chuqui i sujmlel. Jini xlotob ma’anic mi cajel i yochelob ti’ Yumʌntel Dios (Efesios 4:25; Apocalipsis 21:8). Jini xñopt’añob mach jiñobic mach bʌ wenic muc’ob ti t’an. Ma’anic mi’ ñich’tañob mi’ muq’uic i yʌlob chuqui tac bibi’. Q’uexel mi’ q’uejlelob baqui muc’o ti e’tel, ya’ ti escuela, ya’ baqui chumulob cha’an sʌc chuqui mi yʌlob (Efesios 4:29, 31; 5:3).

Jini xñopt’añob i cha’an Dios yom sʌcob ti pejtelel

Copyright © 2009 Watch Tower Bible and Tract Society of Pennsylvania. All rights reserved.