Jump’ejl xchumtʌl mu’ bʌ i mulan Dios

1. Jini Biblia mi yʌl cha’an jini winic jiñʌch i jol i cha’año bʌ (1 Corintios 11:3). Jini winic juntiquil jach yom mi’ pʌy i yijñam, i yom ñujpuñijem ti juez (1 Timoteo 3:2; Tito 3:1).

2. Jini winic yom mi’ c’uxbin i yijñam che’ bajche’ mi’ bajñel c’uxbin i bʌ. Yom mi’ cʌntan che’ bajche’ Jesús mi’ cʌntan xcʌnt’añob i cha’an (Efesios 5:25, 28, 29). Ma’anic ba’ ora yom mi’ jats’ mi yomic i p’unp’un tic’lan. Yom mi’ c’uxbin yic’ot mi’ q’uel ti ñuc (Colosenses 3:19; 1 Pedro 3:7).

Jini tatʌl xc’uxbiya bʌ mi’ yʌq’uen chuqui an to yom i cha’año’ bʌ i cha’an mi’ cʌñob Jehová

3. Jini tatʌl yom tsʌts mi’ cha’len e’tel cha’an mi’ mʌc’lan i cha’año’ bʌ. Yom mi’ yʌc’ bʌlñʌc’ʌl, i bujc i pislel yic’ot i chumlib i yijñam yic’ot i yalobilob. Yic’ot ja’el yom mi’ ch’ʌm ti’ wenta cha’an mi’ cʌñob Dios i cha’año’ bʌ (1 Timoteo 5:8). Yom ñaxan mi’ yʌc’ i bʌ ti’ tojlel i cha’año’ bʌ, cha’an mi’ cʌñob Dios yic’ot Chuqui mi caj i mel (Deuteronomio 6:4-9; Efesios 6:4).

4. Jini x’ixic yomʌch juntiquil wem bʌ xcoltaya cha’an i ñoxi’al (Génesis 2:18). Yom mi’ coltan i ñoxi’al cha’an mi’ comol tic’ob i yalobilob (Proverbios 1:8). Jehová yom cha’an jini x’ixic mi’ cʌntan i cha’año’ bʌ yic’ot c’uxbiya (Proverbios 31:10, 15, 26, 27; Tito 2:4, 5). Jini x’ixic yom mi’ wen q’uel ti ñuc i ñoxial (Efesios 5:22, 23, 33).

5. Dios mi’ chʌn c’ajtiben jini alobob cha’an mi’ jac’beñob i t’an i tat i ña’ (Efesios 6:1-3). Dios mi’ pijtan cha’an jini tatʌlob mi’ toj’esañob i yalobilob. Jini tatʌlob yom mi’ ñusañob q’uin yic’ot i yalobilob cha’an mi’ chajpañob jini Biblia yic’otob, mi’ ch’ʌmob ti’ wenta cha’an mi’ cʌñob Dios yic’ot mi tijicñayobʌch i pusic’al (Deuteronomio 11:18, 19; Proverbios 22:6, 15). Ma’anic ba’ ora yom tsʌts mi’ tic’ob i yalobilob (Colosenses 3:21).

Dios mi’ pijtan jini tatʌlob cha’an mi’ cʌntesañob i yalobil yic’ot cha’an mi’ toj’esañob majlel

6. Che’ ba’ ora jini winic yic’ot x’ixic muc’o ti leto, jini ñumen uts’at bʌ ti jac’ol jiñʌch jini tic’ojel am bʌ ti Biblia. Jini Biblia mi’ subeñonla cha’an mi laj c’uxbin lac bʌ yic’ot cha’an mi lac ñusʌben lac bʌ lac mul (Colosenses 3:12-14). Jini t’an Dios ma’anic mi yʌl cha’an mi lac poj cʌy lac bʌ che’ bʌ an ts’ita wocol. Pero tajol jini x’ixic mi mejlel i poj tʌts’ i bʌ ti’ ñoxi’al mi 1) mach chʌn yomix i mʌc’lan i cha’año’ bʌ, 2) wen jontol jini winic i bʌbʌq’uen an chuqui mi’ cha’len o mi’ chʌmel jini x’ixic o 3) ma’anic mi mejlel i ch’ujutesan Jehová cha’an mi’ mʌctan i ñoxi’al (1 Corintios 7:12, 13).

7. Jini winic yic’ot x’ixic yom xuc’ul mi yajñelob. Jini ts’i’lel jiñʌch jump’ejl mulil wen tsʌts bʌ ti’ contra Dios yic’ot ti’ contra jini winic o x’ixic mach bʌ anic tsi’ cha’le mulil (Hebreos 13:4). Jini Biblia mi yʌl cha’an cojach mi tsi’ cha’le ts’i’lel jini winic o x’ixic mi mejlel i yʌpob i bʌ ti jun cha’an libre mi’ cʌytʌl cha’an mi’ cha’ ñujpuñijel (Mateo 19:6-9; Romanos 7:2, 3). Ya’ ti Biblia mi yʌl cha’an Jehová mi’ ts’a’len che’ an majqui mi’ to’ol yʌpob i bʌ ti jun, i mi’ ñujpuñijel yic’ot yambʌ (Malaquías 2:14-16).

Copyright © 2009 Watch Tower Bible and Tract Society of Pennsylvania. All rights reserved.